სხდომის დღის წესრიგის წაკითხვის შემდეგ, საკრებულოს თავმჯდომარემ, ალეკო მამეშვილმა მოკლე კომენტარი გააკეთა: “მოგეხსენებათ, ახალბედები ვართ, მაგრამ საქმეში, ვფიქრობ, მართლაც წარმატებულები. დღეს ჩემი და გამგებლის მხრიდან გაკეთდება ანგარიში. თქვენ იცით, რომ ერთი წელი შესრულდა ახალი მოწვევის საკრებულოს მიერ მუშაობის დაწყებიდან და გამგებლის არჩევიდან. გვინდა, შეგახსენოთ ის საქმიანობები, რომელიც ჩავატარეთ თქვენთან ერთად, ამ ერთი წლის განმავლობაში”, _ აღნიშნა საკრებულოს თავმჯდომარემ და სიტყვა თემურ სალუქვაძეს მას შემდეგ გადასცა, რაც ამ უკანასკნელმა, საკითხების დეტალურად განხილვამდე, სიტყვით გამოსვლა ითხოვა.
ოზურგეთის მუნიციპალიტეტის საკრებულოს წევრმა, “თავისუფალი დემოკრატების” ლიდერმა თემურ სალუქვაძემ კონფესიებისადმი სტატუსის მინიჭების საკითხი გააპროტესტა: “ბოლო დღეებში განვითარებული მოვლენები, რომელიც ეხება კონფესიებისადმი სტატუსის მინიჭებას, ცხადყოფს, რომ “ნაციონალური მოძრაობა”, თავისი ქმედებებით ავლენს არაქართულ, არასახელმწიფოებრივ ხასიათს. უგულებელყოფილია საქართველოს ეკლესიის, კათალიკოს პატრიარქის წინადადება. პარლამენტმა ერთპიროვნულად მიიღო გადაწყვეტილება. ცალსახად შეიძლება ითქვას, რომ ეს გადაწყვეტილება არ ემსახურება, როგორც საქართველოს დედაეკლესიის, ასევე სახელმწიფოებრივ სიმტკიცეს. ასეთი მნიშვნელოვანი გადაწყვეტილებების მიღება დაუშვებელია საქართველოს საპატრიარქოსთან და საზოგადოებასთან შეთანხმების გარეშე. ხელისუფლების მიერ გახორციელებული ქმედება ეწინააღმდეგება დემოკრატიულ პრინციპებს, მაგრამ ეს ქმედება განსაკუთრებულია თავისი მნიშვნელობით. მე, როგორც საკრებულოს დეპუტატი, “თავისუფალი დემოკრატების” სახელით გამოვთქვამ პროტესტს და ვუერთდები საპატრიარქოს მოთხოვნას. მოგიწოდებთ, საკრებულომ დააფიქსიროს თავისი პოზიცია აღნიშნულ საკითხთან დაკავშირებით. ასევე მივმართავ, ეგრეთ წოდებულ, “ნაციონალურ მოძრაობას”, მის წევრებსა თუ მხარდამჭერებს, გააკეთონ ანალიზი, გამოიტანონ შესაბამისი დასკვნები და მიხვდნენ, თუ რას ემსახურებიან. ადრე თუ გვიან, ყველამ თვალი უნდა გაუსწოროს სიმართლეს და მიიღოს შესაბამისი გადაწყვეტილება”, _ აღნიშნა სალუქვაძემ.
მან კოლეგებს მათი პოზიციის დაფიქსირება სთხოვა, თუმცა, დეპუტატებმა იმ მოტივით, რომ არაფერი სმენიათ აღნიშნული კანონის შესახებ, მოსაზრებების დაფიქსირებისგან თავი შეიკავეს და თქვეს, რომ კომენტარებს მას შემდეგ გააკეთებენ, როცა საკმარისად ინფორმირებულნი იქნებიან საკითხის ირგვლივ.
“გმადლობთ. თავისუფალი ბრძანდებით. ძალიან დიდი მადლობა, პასუხებსაც მიიღებთ ეგრეთწოდებული გამოსვლისთვის, ბატონო თემურ. კარგით, დავიწყოთ ძირითადი საკითხი. კარგი იყო მოსმენა, კარგია, რომ დეპუტატი იყენებს ტრიბუნას. მე ჩემის მხრიდან გავაკეთებ რეაგირებას ბატონი თემურის ასეთი გამოსვლისთვის. ეპითეტებს შემდეგ გამოვიყენებ,” _ თქვა მამეშვილმა და ოზურგეთის მუნიციპალიტეტის საფინინასო-საბიუჯეტო სამსახურის უფროსს, ლია ქათამიძეს ბიუჯეტში შესატან ცვლილებებზე საუბარი სთხოვა.
ოზურგეთის მუნიციპალიტეტის გამგებელმა გია ტაკიძემ სალუქვაძეს, მსგავსი განცხადებების გაკეთებისგან, თავის შეკავება ურჩია: “არ შემიძლია, ბატონი თემურის გამოსვლას არ გამოვეხმაურო. უბრალოდ, ბატონო თემურ, შეურაცხმყოფელია პირადად ჩემთვის, როცა ამბობთ _ “ეგრეთწოდებული, ნაციონალური”. არ შეიძლება ასე _ ყველანი ადამიანები ვართ, ვინც ამ სახელმწიფოს ვემსახურებით. მე ვარ ნაციონალური მოძრაობის ოზურგეთის რაიონული ორგანიზაციის თავმჯდომარე”, _ განაცხადა ოზურგეთის მუნიციპალიტეტის გამგებელმა.
ლელა ნაცვალაძე: _ ბატონო გია, თქვენ ნაციონალური მოძრაობის წევრი ბრძანდებით?
გია ტაკიძე: _ ერთიანი ნაციონალური მოძრაობის ოზურგეთის რაიონული ორგანიზაციის თავმჯდომარე.
ლელა ნაცვალაძე: _ ესე იგი, ყველა გამგებელს ეს თანამდებობა მემკვიდრეობით გადაეცემა?
გია ტაკიძე: _ ამას გადაწყვეტს ნაციონალური მოძრაობის საბჭო და აღმასრულებელი მდივანი.
ამ დროს მოქალაქე გოჩა ჩხაიძემ მათ 26 მაისი შეახსენა: “დაისჯებით თქვენ ამისთვის. გრცხვენოდეთ, როცა 26 მაისს წამების დღეს ავღნიშნავდით, თქვენ თეატრალურ მოედანზე რალის ყურებით ერთობოდით.”
ალეკო მამეშვილი: _ რას ლაპარაკობთ, კი მარა, რას აკეთებთ, რა უფლება გაქვთ?
გოჩა ჩხაიძე: _ მოქალაქე ვარ.
ალეკო მამეშვილი: _ კი, მაგრამ რას ლაპარაკობთ მერე?! დაჯექით და მოგეცემათ სიტყვა.
ამის შემდეგ ჩხაიძეს მამეშვილმა დარბაზის დატოვებისკენ მოუწოდა.
_ ჩემით მივდივარ, _ შეეპასუხა ჩხაიძე, ტაკიძემ კი მას “უზრდელი” უწოდა.
_ იამაყეთ, ბატონო თემურ, თქვენი თანაპარტიელებით, _ თქვა სალუქვაძის მისამართით საკრებულოს თავმჯდომარემ.
_ მე თქვენ გაცალეთ საუბარი და არ მინდოდა ამ საკითხზე გამოხმაურება, მაგრამ როცა პარლამენტი საკითხს ამტკიცებს, ამას მხოლოდ წინასწარი კონსულტაციების და საჯარო განხილვების შემდეგ აკეთებს. როგორც ვიცი, ასეც მოხდა, _ აღნიშნა გამგებელმა.
ტაკიძემ და მამეშვილმა საკრებულოს მუშაობის ერთი წელი შეაჯამეს და “არა ერთ წარმატებულ პროექტზე” რამდენიმე საათის განმავლობაში საუბრობდნენ. ამ საუბრის დროს არავის უხსენებია “წარუმატებელი” პროექტები.
_ ჩვენ 24 საათის განმავლობაში ხალხის სამსახურში ვართ და გეგმის მიხედვით ვასრულებთ თითოეულ აქტივობას, _ აღნიშნა ტაკიძემ და ბიუჯეტის მიმოხილვა დეტალურად მუხლების მიხედვით დაიწყო.
ოპოზიციონერმა ლელა ნაცვალაძემ თავის გამოსვლაში საკრებულოს წევრებს ცხვრები უწოდა, რამაც აღნიშნულ ორგანოში კიდევ ერთი დაპირისპირება გამოიწვია. მას საკრებულოს თავმჯდომარის მოადგილე ავთანდილ მექვაბიშვილი შეეპასუხა და შეურაცხმყოფელი სიტყვების წარმოთქმისგან თავის შეკავება ურჩია.
აღსანიშნავია, რომ სხდომას არასამთავრობო ორგანიზაციების არც ერთი წარმომადგენელი არ ესწრებოდა. სხდომის დასრულების შემდეგ კი ხელისუფლებამ საკრებულოს თავმჯდომარის სამუშაო კაბინეტში “სადღესასწაულო ტორტზე” ჟურნალისტები მიიწვია, ხოლო მუშაობის ერთი წლისთავი, საღამოს, ფართო წრეში, რესტორან “გურიაში” აღნიშნა.
საკრებულოს სხდომა _ გიორგი გირკელიძის ვიდეორეპორტაჟი
ლელა ნაცვალაძის გამოსვლა საკრებულოს სხდომაზე _ გიორგი გირკელიძის ვიდეორეპორტაჟი
