საქართველოს მოქალაქეების დაკავებას და გამყოფ ხაზზე რუსი სამხედროების მიერ ტრაფარეტების დადგმას გამოეხმაურა სახელმწიფო მინისტრი რეინტეგრაციის საკითხებში პაატა ზაქარეიშვილი და განაცხადა, რომ რუსეთი აგრძელებს გამომწვევ ქმედებებს.
“გრძელდება ოკუპაცია. აქამდე რუსი სამხედროები კონკრეტულ ტერიტორიებზე პატრულირებას ახორციელებდნენ, ამჟამად ისინი ამ ხაზს აფიქსირებენ მავთულხლართებით და ტრაფარეტებით. გამყოფ ხაზზე რუსი სამხედროების მიერ ტრაფარეტების დადგმა და საქართველოს მოქალაქეთა დაკავება რუსეთის მხრიდან გამომწვევი ნაბიჯების გაგრძელებაა. ამ ვითარებაში ჩვენ ან უნდა ვივაჭროთ, რომ ეს ხაზი არა აქ, არამედ, მაგალითად, რამდენიმე ასეული მეტრით უკან გადის, რაც ჩვენთვის ყოვლად დაუშვებელია, ან კვლავ მთელი საერთაშორისო თანამეგობრობის გასაგონად განვაცხადოთ, რომ ეს არის ოკუპაციის რეალიზაცია. რუსეთი ყველანაირად ცდილობს, საქართველოს მხრიდან აგრესიული ქმედებების პროვოცირება მოახდინოს, რათა ევროპას შეექმნას შთაბეჭდილება, რომ საქართველო არ არის სახელმწიფო, რომელსაც შეუძლია მათკენ ნაბიჯები გადადგას”.
ზაქარეიშვილი აცხადებს, რომ საჭიროა ევროპამ დააჩქაროს საქართველოს მის ოჯახში გაწევრიანება, წინააღმდეგ შემთხვევაში რუსეთის პირისპირ მარტოდ დარჩენილ საქართველოს გაცილებით მეტი და სერიოზული პრობლემები ექნება რუსეთის მხრიდან. მინისტრმა განაცხადა, რომ რუსი სამხედროების მიერ დაკავებული საქართველოს მოქალაქეების საკითხს შინაგან საქმეთა სამინისტრო აკონტროლებს.
აფხაზეთის ლეგიტიმური ხელისუფლების სამეგრელო–ზემო სვანეთის წარმომადგენლობის პრესასთან და მედიასთან ურთიერთობის სამსახურის უფროსის მოადგილის ხათუნა გუჩუავას თქმით კი, გამტაცებლები უკვე დაუკავშირდნენ ოჯახს და გამოსასყიდი თანხა მოსთხოვეს, თუმცა მისი ოდენობა ჯერ–ჯერობით არ ხმაურდება.
რუსეთის მხრიდან მოსალოდნელ ზეწოლის ბერკეტებზე გაამახვილა დღეს ყურადღება ექსპერტმა მამუკა არეშიძემ. მისი თქმით, რუსეთს საქართველოს წინააღმდეგ შეუძლია გამოიყენოს სამხედრო-პოლიტიკური ბერკეტები.
“რუსეთს შეუძლია ღობე გააბას მისი რუკებით. ამ შემთხვევაში ეს ღობე გავა გორი-თბილისის ტრასაზე, სოფელ ორჭოსანთან. ჩვენს ხელისუფლებას არ შეუძლია სამხედრო წინააღმდეგობა გაუწიოს რუსეთს და აპელაციას დასავლეთზე აკეთებს, ეს უკანასკნელი კი ვერ არის იმდენად ეფექტური რუსეთთან მუშაობის დროს, რომ რაიმე სერიოზული გავლენა მოახდინოს. ასეთი მუშაობის შემდეგ დიდი-დიდი მავთულხლართი შეიცვალოს ღობით”.
ექსპერტის განცხადებით ვილნიუსის სამიტის შემდეგ საქართველოს მარტო დატოვებას რუსეთის პირისპირ არ დაუშვებს ევროპა, რადგან დიდი თანხები აქვს ჩადებული ჰიდროელექტროენერგიის კუთხით, მაგრამ ევროპაში არ არის ერთი პირი.
“ევროპაში არ არის ერთი პირი. თუ მაგალითად პოლონეთი, რუმინეთი საკმაოდ აგრესიუl და მკაფიო განცხადებებს აკეთებს, პასიურია იტალია, ხშირად გაუგებარია გერმანიის ქმედებები”.
ექსპერტმა ასევე ყურადღება გაამახვილა მოახლოებულ ვილნიუსის სამიტსა და ასოცირების ხელშეკრულების პარაფირებაზე. მისი თქმით, საჭიროა გათვლილი იქნას როგორც დადებითი, ისე უარყოფითი შედეგები და ყველაზე მთავარია საზოგადოების ინფორმირებულობა.
“საზოგადოებამ უნდა იცოდეს, რას მოგვიტანს ამ დოკუმენტზე ხელის მოწერა, რა პლიუსები და მინუსები აქვს, ეკონომიკური თუ პოლიტიკური ურთიერთობების თვალსაზრისით. საქართველოს საზოგადოების დიდმა ნაწილმა არ იცის რაზე აწერს ხელს საქართველოს ხელისუფლება და ჰგონია, რომ ისეთივე დოკუმენტია, როგორიც უკრაინის. მარტივად რომ ვთქვათ, უკრაინა ხელს აწერს გადაწყვეტილი დამეგობრების დოკუმენტს, საქართველო კი “ხომ არ გვემეგობრას” დოკუმენტს,” _ განაცხადა მამუკა არეშიძემ.
