პარლამენტის პრესსამსახურის ინფორმაციით, წელს, სახელმწიფო სტრუქტურები, რომლებიც ქვეყნის განვითარების და აღმშენებლობის პროექტებს ახორციელებენ, ასევე წარმატებული კომპანიები, რომლებიც კულტურის, ხელოვნების და სპორტის განვითარებას უწყობენ ხელს და სოციალურ პროექტებში მონაწილეობენ, ღონისძიების ფარგლებში ჯილდოვდებიან. პროექტის მიზანია, გამოავლინოს ის კომპანიები, სახელმწიფო და საგანმანათლებლო სტრუქტურები, ხელოვნების მოღვაწეები და მედიაპროექტები, ვინც აქტიური როლი ითამაშა ბოლო წლის განმავლობაში ქვეყნის განვითარების პოზიტიურ პროცესებში და აღმშენებლობაში.
წელს, პარლამენტის ადამიანის უფლებათა დაცვისა და სამოქალაქო ინტეგრაციის კომიტეტი და მისი თავმჯდომარე, ეკა ბესელია, ნომინაციაზე ადამიანის უფლებათა დაცვის კუთხით განხორციელებული ყველაზე მნიშვნელოვანი “ამნისტიის პროექტით” წარადგინეს და მას საჩუქრად ცერემონიალის ჯილდო – ფრთებაწეული მარმარილოს მამლის ქანდაკება და დიპლომი, ასევე, უწმინდესის და უნეტარესის, სრულიად საქართველოს კათოლიკოს-პატრიარქის ლოცვა–კურთხევით მოჭედილი ხატი გადასცეს.
_ ამნისტიის პროექტი ამ წლის განმავლობაში სახელმწიფო ნომინანტებს შორის ყველაზე მნიშვნელოვანი და ხმამაღალი განხორციელებული პროექტია, რომელიც საზოგადოებაზე ზრუნვას გამოხატავს, – განაცხადა ღონისძიების ორგანიზატორმა.
_ პარლამენტის როლის გამოკვეთა წლის სასიკეთო საქმეებში არის მნიშვნელოვანი. ადამიანის უფლებათა დაცვისა და სამოქალაქო ინტეგრაციის კომიტეტის საქმიანობის აღიარება არის პარლამენტის, როგორც უმნიშვნელოვანესი ინსტიტუტის როლის ხაზგასმა და აღიარება. ამ გამარჯვების თანამონაწილე არის მთელი გუნდი. ძალიან მნიშვნელოვანი და საპასუხისმგებლოა იმ ნომინაციის მიღება რასაც სოფლის, ანუ ქვეყნის მაშენებელი ჰქვია, – აღნიშნა ეკა ბესელიამ.
წლის სახელმწიფო წარმატებული პროექტების ნომინანტთა სიაში ადამიანის უფლებათა დაცვისა და სამოქალაქო ინტეგრაციის კომიტეტის გარდა, შრომის, ჯანმრთელობისა და სოციალური დაცვის და სოფლის მეურნეობის სამინისტროებიც დასახელდა.
