როგორც გვითხრეს, ჩოხატაურის პოლიციის სამმართველო მოკვლევას ატარებს იმის დასადგენად, კანონიერი იყო თუ არა ჟურნალისტებისთვის გადახდილი “კვების ქირა” (იხილეთ სტატია). ჩვენი ინფორმაციით, ჩოხატაურის მუნიციპალიტეტის გამგებლის მოვალეობის შემსრულებელმა, თამაზ ჯინჭარაძემ აღნიშნული თანხა, წარმომადგენლობითი ხარჯებიდან გასცა, რისი უფლებაც არ ჰქონდა. შესაბამისად, გამოძიება უპირველესად სწორედ ამ საკითხს სწავლობს.
როგორც ჩოხატაურის პოლიციის სამმართველოში განგვიმარტეს, ისინი მხოლოდ გამოკითხვას ატარებენ და შემდგომ ამისა, საქმეს ფინანსურ პოლიციას გადაუგზავნიან ქვემდებარეობის გამო.
გამოძიება იმის დადგენასაც ცდილობს, როგორ მოხდა, რომ დოკუმენტზე ხელი ქმრის ნაცვლად ცოლმა მოაწერა, როგორც ამას გამგებელი ამტკიცებს.
შეგახსენებთ, რომ 5 ნოემბერს გაცემულ ინვოისზე, აღნიშნულია, რომ ე.წ. სასტუმროს მეპატრონემ, ავთანდილ კოტრიკაძემ თანხა ხელზე ფულის სახით მიიღო. თუმცა, სალაროს შემოსავლის ორდერი, სადაც წერია, რომ მუნიციპალიტეტის სტუმრების კვების ღირებულება ავთანდილ კოტრიკაძემ ჯინჭარაძისგან მიიღო, 4 ნოემბრით თარიღდება. ამასთან ერთად კოტრიკაძე “გურია ნიუსთან” საუბრისას ამბობდა, რომ მას თანხა არ ჰქონდა მიღებული. დოკუმენტზე არსებულ მის ხელწერაზე კი ჯინჭარაძემ ასეთი კომენტარი გააკეთა:
_ ზუსტი დეტალები მეც არ ვიცოდი. თქვენი შეკითხვის შემდეგ გავარკვიე, რომ საბუთზე ხელი, კოტრიკაძის ნაცვლად, მისმა მეუღლემ მოაწერა და კულტურის სამსახურის უფროსმა პირადად გადასცა ეს ფული. თანაც ქეთევან გიორგაძე ამ ოჯახის რძალია, საკმაოდ ახლო ნათესავია და არანაირი პრობლემა არ არის. ოჯახმა გაწეული მომსახურების ანაზღაურება მიიღო. დოკუმენტზე კოტრიკაძის ნაცვლად, მეუღლის ხელმოწერა იმან გამოიწვია, რომ თავად 4 ნოემბერს არ იმყოფებოდა ჩოხატაურში.
საზოგადოებრივი მაუწყებლის დირექტორის მოვალეობის შემსრულებელი, თამაზ ტყემალაძე ამტკიცებს, რომ ფინანსური დახმარება არავისთვის უთხოვია და აღნიშნავს, რომ მუნიციპალიტეტს ” არავინ არ სთხოვს ამ თანხების დახარჯვას და ვინც ხარჯავს, იმას მოსთხოვონ” (იხილეთ სტატია)
საქართველოს პარლამენტის წევრი, იურისტი თამარ კორძაია კი მიიჩნევს, რომ მსგავსი დაფინანსება არის თანხების, არა თუ არამიზნობრივი ხარჯი, არამედ, უკანონო განკარგვა.
_ გადაცემა, რომლის დაფინანსების საშუალებაც არა აქვს საზოგადოებრივ მაუწყებელს, ეთერში არ უნდა გადიოდეს, მიუხედავად იმისა, რომ საზოგადოებრივი მაუწყებელი არის სსიპ და მას აქვს დაფინანსების სხვა წყაროების მოძიების უფლება. მას აქვს დადგენილი განსაზღვრული წესები და ის შეზღუდულია მოიპოვოს დაფინანსება სახელმწიფო დაწესებულებებიდან, შესაბამისად, მსგავსი მოთხოვნის უფლება საზოგადოებრივ მაუწყებელს არ აქვს. გარდა ამისა, მსგავსი ხარჯის გაწევის უფლება არც ადგილობრივ თვითმმართველობას აქვს, რადგან დარწმუნებული ვარ, ასეთი სახის ხარჯები ჩოხატაურის ბიუჯეტში არ იქნება გათვალისწინებული.
მოკლედ, მსგავსი დაფინანსება არის თანხების, არა თუ არამიზნობრივი ხარჯი, არამედ, უკანონო განკარგვა, _ აღნიშნა “გურია ნიუსთან” საუბრისას თამარ კორძაიამ.
