წყარო ამტკიცებს, რომ ეს გადაწყვეტილება ახალ პრემიერ-მინისტრს ეკუთვნის.
_ უკვე დაზუსტებულია, რომ გამგებლები სამივე მუნიციპალიტეტში შეიცვლებიან. ამის მიზეზი კი ის გახლავთ, რომ მთავრობა გამგებლების მუშაობის ტემპით უკმაყოფილოა; თანაც ახალ პრემიერს საკუთარი გუნდით სურს მოსვლა, _ ამბობს ჩვენი წყარო.
ამ ეტაპზე დაზუსტებული არ არის ახალი გამგებლების ვინაობა ოზურგეთსა და ჩოხატაურში. წყაროს თქმით, ლანჩხუთის გამგებლად კობა მჟავანაძეს ამზადებენ. მჟავანაძე წარმოშობით სოფელ სუფსიდანაა და ის პოლიტიკური პარტია “ქართული ოცნების” წევრია.
წყარო იმასაც ამბობს, რომ ოზურგეთსა და ჩოხატაურში გამგებლად, ადგილობრივი, პოლიტიკური სახეები არ დაინიშნებიან: _ შემიძლია დაზუსტებით გითხრათ, რომ გამგებლებად არ დანიშნავენ პოლიტიკური პარტიების ადგილობრივი ორგანიზაციის ხელმძღვანელებს. კანდიდატურების შერჩევა ძირითადად დედაქალაქში ხდება.
გარდა იმისა, რომ ლანჩხუთში გამგებელი შეიცვლება, როგორც წყარო ამბობს, არ არის გამორიცხული ამჟამინდელ გამგებელს, ზაზა ურუშაძეს გამოძიების კითხვებზე მოუწიოს პასუხის გაცემა: _ მთავრობის განკარგულებით ერთ პირთან მოლაპარაკების წესით, სტიქიის შედეგების სალიკვიდაციოდ რამდენიმე ტენდერი გაფორმდა. ასიათასობით ლარზეა საუბარი. დაახლოებით ნახევარ მილიონ ლარზე გაუფორმეს ერთ პირს ხელშეკრულება. სამუშაო შესაბამისად არ არის შესრულებული, რის გამოც ურუშაძეს პასუხისგება მოუწევს. გარდა ამისა, არის კიდევ ერთი ტენდერი, 800 000 ლარის ღირებულების, რომელიც გზას ეხება და რომელიც ვადებში ვერ ჯდება. გამგებელს ამის გამოც მოსთხოვენ პასუხს. თუმცა, რიგ შეკითხვებზე უკვე მოუხდა პასუხის გაცემა, _ უთხრეს “გურია ნიუსს”.
ლანჩხუთის მუნიციპალიტეტის გამგებელი, ზაზა ურუშაძე ამბობს, რომ არც ტენდერებთან და არც ერთ პირთან მოლაპარაკების წესით გაცემულ ხელშეკრულებებთან დაკავშირებით ზემდგომს კითხვები არ ჰქონია:
_ მე არ ვიცი, თქვენ ვინ რას გეუბნებათ, მსგავსი შეკითხვა არავის ჰქონია. კარგად გადაამოწმეთ.
_ გადამოწმება რომ გვინდა, ამიტომაც გირეკავთ ბატონო ზაზა. რატომ ბრაზობთ?
_ რა ვიცი. ასეთ რაღაცეებს მეკითხებით და…
_ გვითხრეს, რომ რამდენიმე ათასლარიანი ხელშეკრულება ერთ პირთან მოლაპარაკების წესით არის გაფორმებული. თანხები საკმაოდ დიდია და ჩვენი ინფორმაციით, სამუშაოები ხარისხიანად არ არის შესრულებული. ამბობენ იმასაც, რომ რამდენიმე შემთხვევაში, ამ წესით, ხელშეკრულება თქვენი ახლობელსაც გაუფორმდა…
_ არცერთი ის ადამიანი, რომელსაც ხელშეკრულება გაუფორმდა, ჩემი ახლობელი არ არის. მაგ ხელშეკრულებების გაფორმება მოხდა კომისიური წესით და სამუშაოები შესრულებულია ხუთიანზე.
_ 800 000 ლარიან გზის ტენდერზე რას გვეტყვით? როგორც ვიცით, სამუშაოები არ სრულდება….
_ ეგ საკითხი, მინისტრის ჩათვლით, ყველასთვის ცნობილია. ტენდერი მოიგო კომპანიამ, რომელიც ვერ ასრულებს სამუშაოებს. 4-ში უთავდება ვადა და გავაუქმებთ ხელშეკრულებას. მაგ ტენდერთან მე არანაირი შეხება არ მაქვს და ვინ რა პასუხი უნდა მომთხოვოს?!
_ ბატონო ზაზა, ჩვენი ინფორმაციით, იანვრიდან თანამდებობის დატოვება მოგიწევთ, რადგან ხელისუფლება თქვენი მუშაობით უკმაყოფილოა…
_ საიდან მოგაქვთ ეს ინფორმაციები? პირველად მესმის თქვენგან, _ გვითხრა ურუშაძემ.
ლანჩხუთის გამგებლის მსგავსად, შესაძლო გათავისუფლებაზე ინფორმაციას არ ფლობს ოზურგეთის მუნიციპალიტეტის გამგებლის მოვალეობის შემსრულებელი კონსტანტინე შარაშენიძე: _ პირველად მესმის და არ არის ეგ სწორი ინფორმაცია. ვერ გყოლიათ ინფორმირებული წყარო, _ გვითხრა შარაშენიძემ.
აღნიშნულის შესახებ ინფორმაციას არც ჩოხატაურის მუნიციპალიტეტის გამგებლის მოვალეობის შემსრულებელი, თამაზ ჯინჭარაძე ფლობს.
