მურღულია აღნიშნავს, რომ მას ინფრომაცია აქვს იმის შესახებ, თუ რა ხდება ამ კომისიაში და იმაზეც, ვინ და რატომ არის კომისიის მუშაობით უკმაყოფილო. “გურია ნიუსის” შეკითხვაზე ენდობა თუ არა ის კომისიის მუშაობას და სჯერა თუ არა იმ კანდიდატების კვალიფიციურობის, რომელსაც მერიის სხვადასხვა სამსახურებისთვის კომისია შეარჩევს, მურღულია აცხადებს, რომ ის კანდიდატებთან ინდივიდუალურ გასაუბრებას გაივლის და იმ შემთხვევაში თუ რომელიმე მათგანი არ დააკამყოფილებს ვაკანსიის შესაბამის კვალიფიკაციას, თანამდებობაზე მათი დანიშვნა არ მოხდება. მისი თქმით, ამ შემთხვევაში საკონკურსო კომისიამ ქალაქის მერის მოსაზრებებიც უნდა გაითვალისწინოს.
“იმ ადამიანების ნაწილი, რომელსაც ამ კომისიამ გაუწია რეკომენდაცია, წარმოდგენილია. დანიშვნას რაც შეეხება, ეს კანონით არის გათვალისწინებული და ნიშნავს მერი. ამ შემთხვევაში მერის მოვალეობის შემსრულებელი ანუ მე. გადავხედე ვინ არიან ეს კანდიდატები. მინდა მათ შევხვდე, გავესაუბრო და წარმოდგენა მქონდეს. შეიძლება ზოგი არ იყოს ჩემთვის მისაღები ამა თუ იმ პოზიციაზე. ყველა მოქმედება კანონით გათვლაისწინებულ ფარგლებში უნდა მოხდეს. ამიტომაც ვსწავლობ ამ თემას, ბევრი მესმის და ეს თემა ბევრი კუთხიდანაა მოსული ჩემთან. ყველაფერს გამოაჩენს ის კადრები, ვინც არიან წარმოდგენილნი. შეიძლება რაღაც ნაწილში დავეთანხმო კომისიას და მივიღო მათი პოზიცია, რაღაც ნაწილში – არ დავეთანხმო.
კომისიის თავმჯდომარესთან მაქვს კონსულტაციები, რომელიც ასევე საკრებულოს თავმჯდომარეა და საკმაოდ მჭიდრო თანამშრომლობით გავდივარ ამ საკითხებს. მიმაჩნია, რომ როდესაც ადამიანი იღებს პასუხისმგებლობას მაგალითად ჩემს შემთხვევაში, მინიმუმ, არ უნდა იყოს გადაწყვეტილება მიღებული, თუ ამაში მისი მოსაზრებაც არ იქნა გათვალისწინებული. აბსოლუტურად ლოგიკურია იმიტომ, რომ მე იმ გუნდთან ერთად უნდა ავიღო პასუხისმგებლობა. მე ჩამოსული ვარ იმისთვის, რომ საქმე გავაკეთო და არა იმისთვის, რომ წარუმატებლობები ვინმეს გადავაბრალო. ჩემი მოსაზრება უნდა იყოს გათვალისწინებული და მე არ დამაყენონ ფაქტის წინაშე, რომ ამ ადამიანთან უნდა იმუშაო და შენი მოსაზრება საერთოდ არ გვაინტერესებს,” _ განაცხადა შოთა მურღულიამ.
რაც შეეხება პარტია “საქართველოს პატრიოტთა ალიანსს” და მათ უმრავლესობას საკრებულოში, ასევე, პარტიის ლიდერ გოჩა თევდორაძის პერსონას, რომელიც საკმაოდ აქტიურად მოიაზრება საკრებულოს მმართველ ფარულ ძალად, შეგახსენებთ, რომ მან საკუთარი პარტიული უმრავლესობით ჯერ ბესო ბრეგაძე დაამტკიცა ქუთაისის მერად, შემდეგ იგივე შემადგენლობით იმპიჩმენტი გამოუცხადა აღნიშნულ მერს. იგივე უმრავლესობამ ასევე ქალაქის მერად სრული მხარდაჭერით მოიყვანა დიმიტრი კოპალიანი. თუმცა, ცოტა ხანში იგივე უმრავლესობა კოპალიანის იმპიჩმენტის საკითხს არ გამორიცხავდა.
“გურია ნიუსი” დაინტერესდა, არის თუ არა მზად ქალაქის ახალი მერი რომ “პატრიოტთა ალიანსის” საიმპიჩმენტო პრაქტიკა ურჩ მერებთან მიმართებაში, მასზეც განხორციელდეს? ამ საკითხზე შოთა მურღულია აღნიშნავს, რომ ის მერიას მართავს და არ ეშინია ისეთი გადაწყვეტილებების მიღების, რომელმაც შესაძლოა მისი იმპიჩმენტის საკითხი დააყენოს დღის წესრიგში.
“საკმაოდ პრინციპული ადამიანი ვარ და რასაც ვფიქრობ, იმას ვამბობ და ვაკეთებ. ანუ იმის, რომ ჩემი იმპიჩმენტის საკითხი არ დადგეს არ მეშინია, მივიღო ის გადაწყვეტილება, რაც მე მიმაჩნია სწორად, ზოგადად სადაც მიმუშავია ვუსმენ ძალიან ბევრს. ვისმენ ადამიანებს და მერე ვღებულობ გადაწყვეტილებებს და დასკვნებს. რა თქმა უნდა, ყველაფერი კანონიერ ჩარჩოში უნდა იყოს ჩასმული. ვიხელმღვანელებ კანონიდან და საზოგადოების ინტერესიდან გამომდინარე. შესაბამისად, ვსწავლობ ამ თემას და რაიმე ისეთი შიშის ფაქტორი, რომ მე რამე გადაწყვეტილება ვერ მივიღო, ის რაც სწორად მიმაჩნია, ამას საერთოდ არც განვიხილავ,” _ განაცხადა ქუთაისის მერმა შოთა მურღულიამ.
შეგახსენებთ, რომ შოთა მურღულია ქუთაისის მერის მოვალეობას საკრებულოს თავმჯდომარის თამაზ მარგველაშვილის ბრძანების თანახმად, 21 ნოემბრიდან ასრულებს. ის ადგილობრივ თვითმმართველობაში რეგიონული განვთარებისა და ინფრასტრუქტურის სამინისტროდან მოვიდა.
