“კიდევ ერთხელ დარწმუნდება პატარკაციშვილების ოჯახი, თუ რა ცუდად გამოიყენეს ისინი და ვინ იდგა ამ უკანონო ქმედებების უკან. მე არ ვამბობ, რომ უახლოეს მომავალში, მე ვამბობ, ზუსტად ორ დღეში გაიგებთ, ვანო ჩხარტიშვილის მიმართ შანტაჟის, ზეწოლისა და ფულის გამოძალვის ფაქტების შესახებ და ამას მიეცემა სერიოზული სამართლებრივი რეაგირება.
ჩვენ არაერთხელ ვთხოვეთ პატარკაციშვილებს დავმსხდარიყავით მოლაპარაკების მაგიდასთან და ისე გაგვერკვია ყველა სადავო საკითხი, მაგრამ ისინი ამაზე არ წამოვიდნენ და სხვა გზა აირჩიეს. სწორედ ამიტომ მოხდა, რომ მათ წააგეს სასამართლო პროცესები ვანო ჩხარტიშვილის წინააღმდეგ.
გამოვთქვამ ვარაუდს და ვფიქრობ, არც ისე უსაფუძვლოს, რომ იმ სკანდალურ “გრიფით საიდუმლო” გარიგებაში ვანო ჩხარტიშვილის წინააღმდეგ დაგეგმილ კამპანიაზეც არის საუბარი. აქვე გეტყვით, რომ პატარკაციშვილების ოჯახისგან განსხვავებით, ვანო ჩხარტიშვილი არასდროს შეკვრია და გარიგებია წინა ხელისუფლებას და სწორედ ამიტომაც აიძულეს ის 2010 წელს, რომ წასულიყო საქართველოდან” _ განაცხადა დიმიტრი გაბუნიამ. ადვოკატისვე თქმით, ვანო ჩხარტიშვილი დღესაც მზადაა ამ მოლაპარაკებისთვის.
“იყო მუქარები და იყო სარფიანი შემოთავაზებებიც, მაგრამ ვანო ჩხარტიშვილი არასოდეს წასულა კომპრომისზე მოძალადე რეჟიმთან, განსხვავებით გარდაცვლილი ბადრი პატარკაციშვილის ოჯახისგან, რომელიც 2011 წლის 6 ივლისს ე.წ. გრიფით საიდუმლო ხელშეკრულებით გაურიგდა სააკაშვილის ხელისუფლებას. ჩხარტიშვილთან ბრძოლა ამ გარიგების ნაწილად იქცა, რადგანაც კომბინაცია-“ქვრივი ჩხარტიშვილის წინააღმდეგ” სააკაშვილის პროპაგანდისტული პიარ-მანქანისთვის ბიზნესმენის რეპუტაციის შელახვის კარგი საშუალება იყო. სწორედ ამის შემდეგ, ბატონ ბადრის გარდაცვალებიდან მეოთხე წელს, ჩნდება პრეტენზიები და იძაბება მანამდე არსებული ნორმალური ურთიერთობები ოჯახთან.
ვანო ჩხარტიშვილმა მაშინვე შესთავაზა პატარკაციშვილებს, შეერჩიათ მსოფლიოს ყველაზე ავტორიტეტული 5 აუდიტორული კომპანიიდან ერთ-ერთი, რათა დეტალურად მომხდარიყო ერთობლივი საქმიანობის ნიუანსებისა და წარმოშობილი პრეტენზიების საფუძვლიანობის შესწავლა, მაგრამ ამაოდ. სააკაშვილის რეჟიმს და მასთან გარიგებაში მყოფ ქვრივის ზურგსამოფარებულ სუბიექტებს არანაირად აწყობდათ საკითხის სამართლიანი მოგვარება. ასე დაიწყო დავები და სარჩელების შეტანა სხვადასხვა ინსტანციებში.” _ განაცხადა დიმიტრი გაბუნიამ.
შეგახსენებთ, რომ ბრიტანეთის ვირჯინიის კუნძულების სასამართლოში პატარკაციშვილების ოჯახსა და ვანო ჩხარტიშვილს შორის მიმდინარე დავა გასული თვის 24 რიცხვში დასრულდა. საკითხი ყულევის ტერმინალის აქციებს ეხებოდა, რომელთა შესახებ სარჩელები ოჯახმა 2011-2012 წლებში ქართულ და ბრიტანეთის ვირჯინიის კუნძულების სასამართლოებში შეიტანა. მიმდინარე წლის 10 ივნისს პატარკაციშვილებმა სარჩელი ქართული სასამართლოდან გაიტანეს. ანალოგიურად მოიქცნენ ისინი ბრიტანეთის სასამართლოშიც.
როგორც ვანო ჩხარტიშვილის პრესსამსახური აცხადებს: “ბრიტანეთის ვირჯინიის კუნძულების სასამართლოში პატარკაციშვილების ოჯახი იძულებული გახდა სადავო საკითხზე მკაფიო პოზიციები დაეფიქსირებინა. კერძოდ, პატარკაციშვილების ოჯახმა აღიარა და სასამართლომ დაადგინა რომ:
1. ვანო ჩხარტიშვილი იყო, აქამდე პატარკაციშვილების მიერ სადაოდ მიჩნეული, ყულევის ტერმინალის მფლობელი კომპანიის 49 აქციის ერთადერთი მესაკუთრე; 2. ოჯახს არ გააჩნია დაინტერესება ამ აქციებთან დაკავშირებით და შესაბამისად არ გააგრძელებს დავას აღნიშნულ საკითხზე.
ასე, რომ პატარკაციშვილების ოჯახმა წააგო, საკუთარი ინიციატივით დაწყებული სამწლიანი სასამართლო დავა იმ აქტივთან დაკავშირებით, რომელიც ყველაზე მსხვილი და წონადია მათ მიერ ვანო ჩხარტიშვილისთვის წაყენებულ პრეტენზიათა ნუსხაში.”
