როგორც უკვე ცნობილია, პატიმრები ხარვეზების დამდგენი კომისიის შექმნას ითხოვენ. ამ მოთხოვნას, როგორც ნანა კაკაბაძე აცხადებს, დაემატა გლდანის სასჯელაღსრულების დაწესებულების ტუბერკულოზით დაავადებული პატიმრების მოთხოვნა – მათი ქსანში გადაყვანა.
სწორედ სასჯელაღსრულების დაწესებულებებში არსებული დარღვევები და მთლიანად ამ სისტემის არასწორი მუშაობა იყო პარტია “მომავალი საქართველოს” ლიდერ გიორგი ლაღიძის ბრიფინგის თემა.
“ნაციონალური მოძრაობა” ციხეებში მომხდარმა წამების ფაქტებმა გადაიყოლა. ახალი ხელისუფლება მოსვლის დღიდანვე აცხადებდა, რომ პენიტენციალურ სისტემაში მდგომარეობას მოაწესრიგებდა, თუმცა სოზარ სუბარისა და ხელისუფლების სხვა წარმომადგენლების დაპირება, დაპირებად დარჩა. ციხეებში უმძიმესი მდგომარეობაა. გამოდის ხმები, რომ პატიმრები საეჭვო ვითარებაში იღუპებიან, თუ პატრონი არ გყავს რა დაავადებაც არ უნდა ჰქონდეს პატიმარს, სამედიცინო დაწესებულებაში არ გადაგიყვანენ. ამას წინათ ერთი პატიმრის ძმა მოვიდა ჩემთან, გვარად ფარფალია, ჩემს ძმას ქვედა კიდურები პარალიზებული აქვს, ზედა კიდურებს ძლივს ამოძრავებს ცე-ჰეპატიტით და თირკმლის უკმარისობით არის დაავადებული, მაგრამ ყურადღებას არ აქცევენო. ციხეების უმძიმეს პრობლემას ე.წ. მაყურებელთა პრობლემაც დაემატა, რომლებიც ნაციონალების ხელისუფლებაში ყოფნის დროს საგრძნობლად იყვნენ შესუსტებულები, ახლა უბრალო პატიმრებს მათი პრობლემაც კისერზე დააწვათ, მოკლედ უმძიმესი ვითარებაა ქართულ ციხეებში. უბრალო პატიმრებისთვის არაფერი შეცვლილა, აი პრივილეგირებული პატიმრებისთვის კი, ნამდვილად შეიცვალა ვითარება უკეთესობისკენ. სადაც სამართალია ამ ყველაფერზე სასჯელაღსრულების მინისტრმა უნდა აგოს პასუხი, სულ მცირე თანამდებობის დატოვებით, თუმცა ვნახოთ რას იზამს ღარიბაშვილის ხელისუფლება, მანამდე კი შეიძლება ითქვას – ციხეების გადაუჭრელი პრობლემა ამ ხელისუფლების თავზე დამოკლეს მახვილივით კიდია”.
“გურია ნიუსმა” რამდენიმე კითხვით მიმართა გიორგი ლაღიძეს.
_ რას გულისხმობთ პრივილეგირებულ პატიმრებში და ვინ მიანიჭა მათ ეს პრივილეგია?
_ პრივილეგირებულები არიან ე. წ. ის პატიმრები, ვისაც ფინანსური შესაძლებლობები გააჩნიათ და ასევე ისინი, ვისაც გავლენიანი სანაცნობო წრე ჰყავთ. მათ შორის დღევანდელ ხელისუფლებაში.
_ თქვენ ამბობთ, რომ სასჯელაღსრულების მინისტრმა თანამდებობა უნდა დატოვოს. მინისტრის მოხსნით გამოსწორდება ის ვითარება,რაზეც თქვნ საუბრობთ?
_ მიმაჩნია, რომ მინისტრის პასუხისმგებლობის საკითხი აუცილებლად უნდა დადგეს იმ მიზეზთა გამო, რაც ხდება ქართულ ციხეებში. ის პირდაპირ არის პასუხისმგებელი. მინდა მოვიყავნო მაგალითები, პირველ რიგში ხდება რეალური სტატისტიკის დამალვა რა დანაშაულებიც ხდება ციხეებში, ამასთან ერთად სუბარის მინისტრობის დროს საგრძნობლად გაძლიერა ე.წ. მაყურებელთა ინსტიტუტი ციხეებში. ასევე, მისი ინიციატივით გაუქმდა საზოგადოებრივი მონიტორინგის საბჭო, რომელსაც ევალებოდა მონიტორინგი ციხეებში და გამჭვირვალეს ხდიდა იქ არსებულ მდგომარეობას და სხვა მრავალი ფაქტი თუ მიზეზი, რაც შეეხება სუბარის მოხსნით გამოსწორდება თუ არა ციხეებში მდგომარეობა, ვფიქრობ, სისტემური მიდგომა თუ შეიცვლება, მდგომარეობა მნიშვნელოვანწილად გაუმჯობესდება ციხეებში.
_ ვრცელდება ინფორმაცია, რომ თითქმის ყველა ციხეში დაიწყო პატიმრების შიმშილობა…
_ რაც შეეხება პატიმართა შიმშილობის საკითხს, მიმაჩნია, რომ უნდა შეიქმნას საკანონმდებლო დონეზე ეფექტური მექანიზმი, რომლის მიხედვითაც მოხდება საქმეების, ანუ უკვე დამდგარი განაჩენების გადასინჯვა და უდანაშაულო პირების განთავისუფლება მოხდება ციხეებიდან.
_ სუბარის განცხადებით, სისტემის ბევრი თანამშრომელი შეიცვალა და კიდევ ბევრი შეიცვლება. თქვენი აზრით რამ გამოიწვია ასეთი მასობრივი საკადრო პოლიტიკა და ექნება თუ არა ამას რაიმე გადამწყვეტი მნიშვნელობა?
_ ვფიქრობ, რიგითი თანამშრომლების შეცვლა შედეგს ვერ გამოიღებს, ეს არის სისტემური პრობლემა და უნდა იყოს ხელისუფლების კეთილი ნება, რომ პენიტენციალურ სისტემაში პრობლემები მოგვარდეს.
