აგვისტოს ომიდან 5 და საქართველოში ხელისუფლების დემოკრატიული გადაბარებიდან 1 წლის თავზე, რუსეთი “გვთავაზობს”, რომ თუ “ცხელი თავები” დაწყნარდებიან, მავთულხლართები საჭირო არ იქნება.
ლავროვმა ეს განცხადება საქართველოსთან ურთიერთობებზე, რუსი სამხედროების მიერ სამხრეთ ოსეთის ადმინისტრაციული სასაზღვრო ზოლის გასწვრივ ღობეების აღმართვასა და საქართველოს ნატოში მისწრაფებაზე კითხვის საპასუხოდ გააკეთა. მან განაცხადა, რომ ნატოს გაფართოება, არა მხოლოდ საქართველოს კონტექტსში, არამედ ზოგადად, “ცივი ომის ეპოქის ძველი ინერციული ლოგიკის გაგრძელებას” წარმოადგენს.
“ეს არა მხოლოდ გამყოფი ხაზების შენარჩუნებაა, რომლის აღების ვალდებულებაც ჩვენ ყველამ ავიღეთ, არამედ მათი შემდგომი გადაადგილება აღმოსავლეთით, რაც ძირეულად ეწინააღმდეგება იმ ვალდებულებებს, რომლებიც ჩვენ უმაღლეს დონეზე ავიღეთ უსაფრთხოების განუყოფლობის თვალსაზრისით. არავინ უნდა გადადგას ისეთი ნაბიჯები, რომლებიც რისკებს შეუქმნის პარტნიორების უსაფრთხოებას. გამოვდივარ იქიდან, რომ სწორედ ამით უნდა ვიხელმძღვანელოთ,” _ განაცხადა ლავროვმა.
ამავე დროს, მან იმედი გამოთქვა, რომ საქართველოსთან თანამშრომლობა სავაჭრო-ეკონომიკური, კულტურული და ჰუმანიტარული კუთხით გაგრძელდება და დასძინა, რომ დიპლომატიური ურთიერთობების აღდგენის საკითხის დღის წესრიგში დაბრუნების სურვილიც აქვს.
ლავროვის აღნიშნულ განცხადებას გუშინვე საქართველოს საგარეო საქმეთა მინისტრი მაია ფანჯიკიძე გამოეხმაურა და აღნიშნა, რომ “საქართველოსათვისაც ძალიან სასურველია რუსეთთან დიპლომატიური ურთიერთობების აღდგენა, რადგან ეს ითვალისწინებს ორ რამეს – ქვეყნის დეოკუპაციას და აღიარების უკან წაღებას”.
“შესაბამისად, ეს პირობები თუ იქნება შესრულებული, ჩვენ დიდი სიამოვნებით აღვადგენთ დიპლომატიურ ურთიერთობას. ხოლო, რაც შეეხება იმას თუ რისი წინააღმდეგი და რისი მომხრეა რუსეთის ფედერაცია, ამაზე პასუხი ძალიან მარტივად არის გაცემული ნატოს მხრიდან, ასევე საქართველოსა და სხვა იმ ქვეყნების მხრიდანაც, რომელთაც ნატოს წევრობა უნდათ, რომ მხოლოდ ნატოს და ამ ქვეყნების გადასაწყვეტია როგორი იქნება მათი ურთიერთობა და მესამე მხარეს ამ ურთიერთობაზე და ამ გადაწყვეტილებაზე გავლენის მოხდენა არ შეუძლია. ასე რომ, ეს არის ძალიან მარტივი პასუხი მათ პოზიციაზე,” _ განაცხადა ფანჯიკიძემ.
როგორც პოლიტოლოგი კორნელი კაკაჩია მიიჩნევს, რუსეთის მთავარი დიპლომატის განცხადების მთავარი მესიჯი აქამდე არსებული პოზიციის ხელახალი გამეორებაა და რუსეთი ცდილობს ე.წ. ახალი რეალობები დააკანონოს.
“განცხადებაში მკვეთრადაა გამოხატული, რომ სამხრეთ ოსეთი და აფხაზეთი ცალკე სახელმწიფოებია და რუსეთმა ცნო, ანუ საქართველოს და საერთაშორისო თანამეგობრობასაც მოუწევს ამ რეალობის ცნობა,” _ ამბობს კაკაჩია.
ამასთან იგი აღნიშნავს, რომ ამ განცხადებით ლავროვმა ცივი წყალი გადაასხა ხელისუფლების იმ პოზიციას, რომლის თანახმადაც, რუსეთთან ურთიერთობების ნორმალიზებით შეიძლება ოკუპირებული ტერიტორიების დაბრუნება.
“ეს არ არის ლავროვის პირველი განცხადება, სადაც საკმაოდ ხისტად აფიქსირებს, რომ რუსეთი ამ საკითხთან დაკავშირებით მოლაპარაკებებზე არ ფიქრობს. ამავე დროს, ერთადერთი, რითიც დღეს რუსეთი დაინტერესებულია, ისაა, რომ საქართველოსთან დიპლომატიური ურთიერთობები აღადგინოს გამოდინარე იქიდან, რომ მისი სტატუსისთვის საქართველოსთან დიპლომატიური ურთიერთობები არქონა დამამცირებელია. ამიტომ, ისინი ცდილობენ, რაღაცნაირად ამ ეკონომიკური, სავაჭრო, კულტურული და ა.შ. ურთიერთობებით ნელ-ნელა შეაგუონ ქართული საზოგადოება და საერთოდ ქვეყანა, რომ ეს ტერიტორიები დაკარგულია და მოდი ურთიერთობა დავიწყოთ ახალი ფურცლიდან, ოღონდ იმ რეალიების გათვალისწინებით, რომელიც არსებობს. არ მგონია, რომ ეს ის გზა იყოს, რომელიც ჩვენს ქვეყანას სჭირდება და აქედან გამომდინარე ეს კიდევ ერთი ცივი შხაპი უნდა იყოს ხელისუფლების პოზიციისთვის,” _ აღნიშნავს კაკაჩია.
პოლიტოლოგი მიიჩნევს, რომ რუსეთთან დიპლომატიური ურთიერთობების აღდგენა თითქმის შეუძლებელია და იმ შემთხვევაში, თუ საქართველო ევროკავშირთან ასოცირების ხელშეკრულებას ხელს მოაწერს, კრემლთან ურთიერთობები განსაკუთრებულად დაიძაბება.
“ხელისუფლება ალბათ, იძულებული იქნება მეტ-ნაკლებად ძველ პოზიციას დაუბრუნდეს, რადგან ეს პოზიტიური ურთიერთობები სამწუხაროდ დიდხანს ვერ გაგრძელდება და დაიძაბება. ერთმანეთს ეჯახება ორი ქვეყნის ინტერესი. ეს ხელისუფლება ვერ მოახდენს ამ გარდატეხას. რადგან რუსეთი არ ცვლის თავის პოზიციას ნატოსა და ევროკავშირთან მიმართებაში და არც საქართველო აპირებს ამ გზის დათმობას, აქედან გამომდინარე, ეს ურთიერთობები ამ ერთი წლის შემდეგ შეიძლება ძალიან დაიძაბოს. განსაკუთრებით მას შემდეგ, თუ ასოცირების ხელშეკრულება დაიდება. ამის შემდეგ რამდენიმე გზაა – შეიძლება მოხდეს ე.წ. ცივილიზებული გაყრა, ანუ როდესაც რუსეთი მიხვდება, რომ საქართველო აღარასდროს დაბრუნდება დსთ-ში და არც ევრაზიულ კავშირში გაწევრიანდება, მაშინ უკვე მოილაპარაკებენ თუ რა კომპრომისული ვარიანტი შეიძლება გამოინახოს. თუ ცივილიზებული გაყრა ვერ მოხერხდა, მეორე გზა არც თუ სასიამოვნო იქნება, რადგან შეიარაღებული პროვოკაცია არაა გამორიცხული.
პუტინმა 2 დღის წინ ერევანში განაცხადა, რომ რუსეთი აუცილებლად გააძლიერებს საკუთარ პოზიციებს. ეს სიგნალია იმისკენ, რომ ისინი დათმობას არ აპირებენ. ამ სიტუაციაში ძალიან მნიშვნელოვანი იქნება საერთაშორისო თანამეგობრობის პოზიცია.
თუმცა, აქ ყველაფერი დამოკიდებულია საქართველოს ხელისუფლების პოზიციაზე – თუ შეეჩვევა ამ ე.წ. ახალ რეალიებს, რუსეთს სხვა საპრეტენზიო არც არაფერი აქვს,” _ უთხრა “გურია ნიუსს” კორნელი კაკაჩიამ.
პოლიტიკურ მეცნიერებათა დოქტორი თამარ კიკნაძე “გურია ნიუსთან” საუბრისას ლავროვის განცხადებას აფასებს და აღნიშნავს, რომ “ეს ერთი მხრივ გაფრთხილებაა რუსების მხრიდან და მეორე მხრივ, მოწოდება იმისკენ, რომ რეალურად შეაფასონ სიტუაცია”.
“ეს ულტიმატუმსაც ჰგავს, თან შეთავაზებაა, რომ თუ საქართველო რაღაც წინადადებებზე წამოვა, შეიძლება დალაპარაკება აფხაზეთის, ე.წ. სამხრეთ ოსეთისა და ამ გამყოფი ხაზების არსებობაზეც. ამ შემთხვევაში ზოგიერთი პოლიტიკური ძალა, რომელიც არის წარმოდგენილი საქართველოში და ისინი თავისი ბუნებით გლობალისტები არიან, ხშირად საქართველოს ერევნულ ინტერესებს გლობალური ძალების ინტერესებს სწირავენ.
ამიტომ, ვთვლი, რომ მოლაპარაკებას ალტერნატივა არ აქვს. მართლაც, არა ამ ცხელ თავებზე, არამედ ძალიან პრაგმატულად და რაციონალურად საქართველომ საკუთარ მომავალზე უნდა იფიქროს,” _ აღნიშნავს კიკნაძე.
ამასთან, იგი მიიჩნევს, რომ საქართველო “გარიგებების ობიექტია” და რუსეთს დასავლეთისგან ევრაზიული კავშირის შექმნის თაობაზე “მწვანე შუქი ანთებული აქვს”.
“ჩვენთან საერთაშორისო პოლიტიკას ძალიან მარტივად განიხილავენ. არსებობენ ზენაციონალური სტრუქტურები და ეს წარმომადგენლები არიან როგორც რუსეთში, ისე ამერიკასა და ევროპაში და ხშირად ამ ძალების შეთანხმებები ერთმანეთს ემთხვევა. მჯერა, რომ მსოფლიო ახალი წესრგის მოლოდინშია და მოხდა გარიგება დასავლეთსა და რუსეთს შორის. მჯერა, რომ რუსეთს დასავლეთისგან ამ ევრაზიული კავშირის შექმნის თაობაზე მწვანე შუქი ანთებული აქვს და ძალიან საინტერესოა როგორ განვითარდება მოვლენები. სამწუხაროდ, საქართველო ბუფერული სახელმწიფოა და არა სუბიექტი, არამედ გარიგებების ობიექტი.
რუსეთი ამ ეტაპზე ძალიან არის დაკავებული სოჭის ოლიმპიური თამაშებით და პუტინმა განაცხადა, რომ თქვენთვის ახალი წელი იწყება პირველი მარტიდან ანუ ოლიმპიადის შემდეგ. ასე რომ, ჯერ მკვეთრ ქმედებებს ერიდებიან. დარწმუნებული ვარ, რომ ოლიმპიური თამაშების შემდეგ რუსეთის აქტივიზაციას უნდა ველოდოთ,” _ უთხრა “გურია ნიუსს” თამარ კიკნაძემ.
