როგორც კომისიის და “პატრიოტთა ალიანსის” წევრი კახა ნემსიწვერიძე აცხადებს, მამუკა მღვდელაძეს არასდროს გამოუთქვამს პროტესტი კომისიის საქმიანობასთან დაკავშირებით. ნემსიწვერიძე აღნიშნავს, რომ კომისიის დატოვების შემდეგ მღვდელაძესთან დაკავშირება სცადა. თუმცა, ვერ შეძლო. მისივე განცხადებით, გასულ ღამეს მამუკა მღვდელაძის ავტომობილი ქუთაისში ტაბიძის ქუჩაზე უშიშროების შენობასთან შენიშნა.
“ჩვენ ეს გადაწყვეტილება არ ვიცოდით. არც იგრძნობოდა აქამდე, რომ მამუკა ამ გადაწყვეტილებას მიიღებდა. ის განცხადება, რაც მან დღეს გააკეთა, რომ კომისია გოჩა თევდორაძის დაკვეთებს ასრულებდა, თავისთავად აბსურდია. ერთი რამე ვიცი მხოლოდ, მე შემთხვევით გავიარე ტაბიძის ქუჩაზე და მღვდელაძის მანქანა უშიშროების შენობასთან იდგა. არ ვიცი, შეიძლება ტყუილად ეყენა მისი ავტომობილი, მაგრამ ამ სიტუაციას მოჰყვა “პატრიოტების წინაშე” განხორციელებული მრავალი ზეწოლა.
მას ვთხოვდით ჩვენ, რომ მოსულიყო და სათქმელი ეთქვა. თუ მას ეს ვინმემ არ აიძულა, შეეძლო პირადად ეთქვა ჩვენთვის,” _ განაცხადა “პატრიოტთა ალიანსის” და საკონკურსო კომისიის ერთ-ერთმა წევრმა კახა ნემსიწვერიძემ.
შეგახსენებთ, რომ ბოლო დროს პარტია “საქართველოს პატრიოტთა ალიანსის” წევრების მიერ ფრაქციის დატოვებას, ამავე პარტიის იმერეთის ორგანიზაციის ლიდერი გოჩა თევდორაძე პრემიერის მრჩეველს ირაკლი მელაშვილს და იმერეთის უშიშროების სამსახურის ხელმძღვანელს ზაზა მეფარიშვილს მიაწერს. მან დღეს გამართულ ბრიფინგზე აღნიშნა, რომ ამით “პატრიოტთა ალიანსის” ჩაძირვა სურთ, რაც არ გამოუვათ.
“მე მაქვს ინფორმაცია, რომ მთელი ღამის განმავლობაში მამუკა მღვდელაძე ტაბიძის ქუჩაზე, უშიშროების შენობაში მართავდა კონსულტაციებს. მათ იდეაში სურთ ჩაძირონ “პატრიოტთა ალიანსი”, მაგრამ ამ ოცნებას ვერ აიხდენენ,”_ განაცხადა გოჩა თევდორაძემ.
საკონკურო-საატესტაციო კომისიის საქმიანობას “აფერისტობას” უწოდებს ფრაქცია “ნაციონალური მოძრაობის” თავმჯდომარე გიორგი უკლება.
მისი თქმით, მამუკა მღვდელაძე ამჯერად “ოცნების” დაკვეთას ასრულებს. უკლება “გურია ნიუსთან” საუბრისას აღნიშნავს, რომ კომისია თავიდანვე “ფიქცია” იყო და “ნაცმოძრაობა” ამაზე თავიდანვე საუბრობდა.
“მამუკა მღვდელაძე უკვე მრავალი თვეა ამ კომისიის წევრია. უფორ მეტიც, გუშინ და გუშინწინ აცხადებდა, რომ ის გოჩა თევდორაძესთან აბსოლუტურად ყველა თემაზე გადიოდა კონსულტაციებს. პრობლემა კი არცერთ თემაზე არ ჰქონია. ჩვენ თავიდანვე ვამბობდით, რომ ეს კომისია იყო ფიქცია და კომისია თევდორაძის გადაწყვეტილებების ნოტარიულ დამოწმებას აკეთებდა. იმის გამო, რომ მათმა გადაწყვეტილებებმა საზოგადოების უარყოფითი რეაქცია გამოიწვია, გადაწყვიტეს განტევების ვაცი შეერჩიათ. ახლა მამუკა მღვდელაძე ასრულებს დაკვეთას.
თუ ის გულწრფელი იყო თავის განცხადებაში, რაშიც მე ეჭვი მეპარება, მაშინ ამ კომისიის მიერ მიღებული ყველა გადაწყვეტილება უნდა გაუქმდეს. იმიტომ, რომ ამას ჰქვია “აფერისტობა” რაც აუცილებლად უნდა გაუქმდეს,” _ განაცხადა ფრაქცია “ნაც მოძრაობის” თავმჯდომარემ გიორგი უკლებამ. “გურია ნიუსთან” საუბრისას.
შეგახსენებთ, რომ ქუთაისის საკრებულოს საკონკურსო საატესტაციო კომისიის ერთ-ერთმა წევრმა მამუკა მღვდელძემ კომისია დატოვა. ის ასევე აცახდებს, რომ მზადაა საკრებულოც დატოვოს. ამის მიზეზად კი პარტია “საქართველოს პატრიოტთა ალიანსის” იმერეთის ორგანიზაციის ლიდერის გოჩა თევდორაძის მიერ საკრებულოს საქმიანობაში ჩარევა დაასახელა. აღსანიშნავია ის ფაქტიც, რომ ერთი დღის წინ ფრაქცია “პატრიოტთა ალიანსის” 5-მა წევრმა ფრაქცია დატოვა. რასაც ალიანსის ლიდერი იმერეთის უშიშროების სამსახურის უფორს ზაზა მეფარიშვილს და პრემიერის მრჩეველს თვითმმართველბის საკითხებში ირაკლი მელაშვილს მიაწერს. თუმცა, გავრცელებულ ინფორმაციას იმის შესახებ, რომ შესაძლოა პარტია დაიშალოს, გამორიცხავს.
