(გურია ნიუსი, ლანჩხუთი) _ ლანჩხუთის მუნიციპალიტეტის საკრებულოს მორიგ სხდომაზე პირველ საკითხად მთავარმა ფინანსისტმა როლანდ ლაშხიამ საბიუჯეტო ცვლილებები წარმოადგინა. მისი თქმით, ვინაიდან მუნიციპალიტეტის ბიუჯეტის 6 თვის გეგმა-შესრულება 102,7%-ს შეადგენს, შემოსავლების მობილიზაციის დინამიკიდან გამომდინარე, წლის დარჩენილ პერიოდში, შესაძლებელია დამატებით მიღებული იქნეს 112 070 ლარი. ხელისუფლება დამატებითი შემოსავლების მიღებას შემდეგი წყაროებიდან გეგმავს: შემოსავალი ჯარიმებიდან და საურავებიდან _ 57 070 ლარი; სათამაშო ბიზნესის მოსაკრებელი _ 30 ათასი ლარი; საწარმოთა ქონების გადასახადი _ 25 ათასი ლარი. როგორც ლაშხიამ თქვა, ამ დამატებით შემოსავლებს, სავარაუდოდ, ასე დახარჯავენ: ქალაქ ლანჩხუთში, შს გურიის სამხარეო მთავარი სამმართველოს ლანჩხუთის რაიონული სამმართველოს ადმინისტრაციული შენობის შიდა ეზოს კეთილმოწყობის სამუშაოების დაფინანსება _ 61 750 ლარით; ამავე შენობის მიმდებარე ტერიტორიასთან გზების სარეაბილიტაციო სამუშაოების დაფინანსება _ 42 820 ლარით. ასევე, შესაძლებელია, კიდევ გაიზარდოს ბიუჯეტის მუხლი _ “ადმინისტრაციული სამსახურის სხვა საქონელი და მომსახურება” _ მუნიციპალიტეტის ქონების ექსპერტიზისა და შემოწმების ხარჯები 3 ათასი ლარით, ადმინისტრაციული სამსახურის ოფისის მუხლი საოფისე ინვენტარის შეკეთებისთვის 1 500 ლარით და ზედამხედველობის სამსახურის ოფისის მუხლი ოქმების დაბეჭდვისთვის 300 ლარით, სამხედრო სამსახურის ოფისის ხარჯი სპეციალური ფორმების დაბეჭდვის ხარჯებისთვის 200 ლარის ოდენობით. სახელმწიფო შესყიდვების სააგენტოს თავმჯდომარის 2011 წლის 23 ივნისის #15 ბრძანების შესაბამისად, სატენდერო განცხადებისა და სატენდერო დოკუმენტაციის გამოქვეყნების საფასურის გადახდის წესის დამტკიცებასთან დაკავშირებით, 2 500 ლარით უნდა გაიზარდოს ადმინისტრაციული სამსახურის სხვა საქონლის და მომსახურების მუხლი. მკითხველს შევახსენებთ, რომ ლანჩხუთის საკრებულო წლეულს კარტრიჯების, ასლგადამღები აპარატურის სახარჯი მასალების, ქაღალდებისთვის ასეულობით ათას ლარს ხარჯავს.
საინტერესოა კიდევ ერთი ინფორმაცია: რადგან, თურმე, მრავალშვილიანი ოჯახების დახმარების პროგრამით გათვალისწინებული თანხა ამოიწურა, ადგილობრივ ხელისუფლებას მიზანშეწონილად მიაჩნია, 16 ათასი ლარით შემცირდეს ახალშობილთა პირველადი საჭიროების დახმარების პროგრამით გამოყოფილი თანხა და გაიზარდოს მრავალშვილიანი ოჯახების დახმარების პროგრამის ხარჯები.
საკრებულოს დეპუტატებმა როლანდ ლაშხიას მიერ წარმოდგენილი ცვლილებებს მხარი დაუჭირეს.
სესიის მეორე საკითხის შესახებ შესყიდვების სამსახური უფროსმა მაია აფხაზავამ ისაუბრა. მისი თქმით, შესყიდვების გეგმაში შეიცვალა საქართველოს მთავრობის 2011 წლის პირველი აპრილის #735 განკარგულებით გამოყოფილი 500 ათასი ლარით განსაზღვრული სამუშაოების შესყიდვის საშუალება. კერძოდ, ყველა სახის სამუშაოების შესყიდვის საშუალებად განსაზღვრულია “ელექტრონული ტენდერი”.
მუნიციპალიტეტის ქონების მართვის სამსახურის უფროსმა ზაზა ქავზინაძემ დეპუტატებს ლანჩხუთის მუნიციპალიტეტის ქონების საპრივატიზაციო ობიექტების ნუსხაში არსებული ცვლილება წარუდგინა: “დამტკიცდეს საპრივატიზებოდ ლანჩხუთის მუნიციპალიტეტის ქონება; კერძოდ, ქალაქ ლანჩხუთში, კვირკველიას ქუჩა #21-ში მდებარე: ა) შენობა-ნაგებობა საერთო ფართით 688,22 კვ.მ მასზედ მიმაგრებული 651 კვ.მ არასასოფლო-სამეურნეო დანიშნულების მიწის ნაკვეთით; ბ) 866 კვ.მ არასასოფლო-სამეურნეო დანიშნულების მიწის ნაკვეთი; გ) 380 კვ.მ არასასოფლო-სამეურნეო დანიშნულების მიწის ნაკვეთი”.
საკრებულოს თავმჯდომარემ ქავზინაძის მიერ წარმოდგენილი განკარგულების შესახებ განმარტება გააკეთა: “საუბარია ყოფილ სამხატვრო სკოლაზე. ეს შენობა, მოგეხსენებათ, ქალაქის ცენტრალურ ნაწილში მდებარეობდა, მაგრამ ის დაიშალა. გამოთავისუფლდა საკმაოდ დიდი ტერიტორია, რომლის პრივატიზება შემოსავალს გაუზრდის ჩვენს ბიუჯეტს. ჩვენ ეს ტერიტორია დავყევით სამ ნაწილად. ასე იმიტომ მოვიქეცით, რომ მყიდველს შეეძლოს მისი ნაწილ-ნაწილ შესყიდვა”.
ზაზა ქავზინაძემ ასევე წარმოადგინა სამი საპრივატიზაციო ობიექტი: ავტობუსი პაზ-672მ _ 1988 წლის გამოშვება, ავტომანქანა ვაზ-21051 _ 1985 წლის გამოშვება და ავტომანქანა “ოპელ-ვექტრა” _ 1989 წლის გამოშვება.
საკრებულომ წარმოდგენილი საპრივატიზაციო ნუსხა დაამტკიცა და მუნიციპალიტეტის იურიდიული სამსახურის უფროსს, შოთა ჩაგუნავას მოუსმინა, რომელმაც დეპუტატებს “ფიზიკური და კერძო სამართლის იურიდიული პირების მფლობელობაში (სარგებლობაში) არსებულ მიწის ნაკვეთებზე საკუთრების უფლების აღიარების კომისიის შემადგენლობა გააცნო. კომისიის წევრები არიან: გია ორაგველიძე, ლანჩხუთის მუნიციპალიტეტის საკრებულოს აგრარულ საკითხთა, ბუნებრივი რესურსების და გარემოს დაცვის კომისიის თავმჯდომარე _ კომისიის თავმჯდომარე; ზორბეგ ხუხუნაიშვილი, ლანჩხუთის მუნიციპალიტეტის საკრებულოს წევრი _ თავმჯდომარის მოადგილე; ლევან იმნაძე, ლანჩხუთის მუნიციპალიტეტის საკრებულოს წევრი; გოჩა ჩხაიძე, საქართველოს ეკონომიკისა და მდგრადი განვითარების სამინისტროს სახელმწიფო ქონების აღრიცხვისა და პრივატიზების სამეგრელო-გურია-ზემო სვანეთის სამხარეო სამმართველოს სპეციალისტი; ომარ ჯანაძე, ლანჩხუთის მუნიციპალიტეტის გამგეობის ეკონომიკური განვითარების, სტატისტიკის და ქონების მართვის სამსახურის მთავარი სპეციალისტის მოვალეობის შემსრულებელი.
ამის შემდეგ, საკრებულოს სხდომა მედიისთვის და სამსახურების წარმომადგენლებისთვის დახურულად გამოცხადდა, თუმცა, საკრებულოს სხდომის დახურვას საგანგებო პროცედურები სჭირდება და მისი დახურვის საფუძველი წინასწარ უნდა იყოს ცნობილი.
