ლაშა ჩხარტიშვილმა განაცხადა, რომ თუკი ხუდონჰესის პროექტი განხორციელდება, ეს იმის ნიშანი იქნება, რომ ბიძინა ივანიშვილი ავტორიტარული რეჟიმის ჩამოყალიბებას უწყობს ხელს.
“ქართული ოცნების” ერთ-ერთი მთავარი პოსტულატი იყო წინასაარჩევნო დაპირება, სადაც საუბარი იყო დიდი კაშხლების და ატომური სადგურების აშენების წინააღმდეგ. დღეს კი ჩვენ შედეგად მივიღეთ არადემოკრატიული, ავტორიტარული, მახინჯი, მძიმე შედეგების მომტანი ტენდენციის გაგრძელება, რაც საქართველოსთვის, სამწუხაროდ, ახალი არ არის. თუმცა, მისი შედეგები წინა და წინის წინა ხელისუფლების დროს ყველას გვაქვს ნანახი და ამაში ყველა ვთანხმდებით. ამომრჩევლის მოტყუება იყო ტრადიცია, რომელიც დღეის მდგომარეობით “ქართულმა ოცნებამ” გააგრძელა, რადგან ამ დაპირებაში საუბარი იყო დიდი კაშხლების აკრძალვაზე. დღეს, ჯერ არ მიღებულ გადაწყვეტილებაზე, ყოფილი პრემიერი, ბიძინა ივანიშვილი და მოქმედი ხელისუფლების სხვა უმაღლესი თანამდებობის პირები საუბრობენ ისე, თითქოსდა ეს გადაწყვეტილება უკვე მიღებულია და საზოგადოების წარმომადგნელებს არაფერს ეკითხებიან.
მე შეგახსენებთ ბიძინა ივანიშვილის 16 სექტემბრის გამოსვლას, სადაც მან ხუდონჰესის შესახებ გარემოზე ზემოქმედების დოკუმენტის განხილვის წინა დღეს, გადაწყვეტილება პრაქტიკულად მიღებულად გამოაცხადა, რომელთან შეგუებისაკენ მოუწოდა საზოგადოებას. ამით მან პირდაპირ განახორციელა ზეწოლა საზოგადოებაზე და დასკვნის მიმღებ პირებზე და პირდაპირ განაცხადა, რომ ხუდონჰესი უნდა აშენდესო.
საკითხი სცილდება მხოლოდ ხუდონჰესს და ეკოლოგიას. საუბარია ავტორიტარული მმართველობის გამოხატულებაზე, თუკი ეს საკითხი ასე დასრულდება.” _ განაცხადა ლაშა ჩხარტიშვილმა.
შეგახსენებთ, რომ საქართველოს პრემიერ-მინისტრი, ბიძინა ივანიშვილმა “გურია ნიუსთან” ექსკლუზიურ ინტერვიუში განაცხადა, რომ სვანეთში დაძაბულობის პროვოცირებას რამდენიმე ადამიანი ახდენს.
_ რთულადაა სიტუაცია სვანეთში, რადგან იქ სოფელი იძირება, მოსახლეობის ნაწილს უწევს გასახლება და მე დღესაც ამას განვიცდი და დიდი გრძნობით, განცდით ვეკიდები. მაქსიმალურად შევეცდები მომავალშიც მხარში დავუდგე მათ და გავუიოლო ეს ყოფა, მაგრამ ზედმეტი დრამატიზირება არაფრის არ შეიძლება. ჩვენ რა გვინდა, გვინდა მომავალი შევქმნათ თუ არ გვინდა? მარტო კაკლის ჩრდილში წამოწოლა გვინდა? აი ისე, ანეგდოტი ხომ გახსოვთ? _ ასე არ არის. რა თქმა უნდა, განვიცდი დღესაც ამას, მაგრამ ჩვენ უამრავი ეკომიგრანტი გვყავს, უამრავი სვანი გადასახლდა სვანეთიდან თავისით. ამას ახლა ზედმეტი ტრაგიზმი და დრამატიზირებაც არ სჭირდება. ეს არის ქვეყნისთვის საჭირო. სვანებს ეს ესმით და ქვეყნისთვის უამრავი საქმე აქვთ გაკეთებული. ჩემთვისაც შემოუთვლიათ _ თუ იტყვი, რომ ეს ქვეყანას სჭირდება ჩვენ დავდგებით და გავაკეთებთო. იქ არიან პიროვნებები, ვინც ზემდეტად ძაბავენ სიტუაციას და ჩვენ ვსწავლობთ, ვერკვევით. ისე გავაკეთებთ, რომ მოსახლეობისთვის იყოს მაქსიმალურად სასარგებლო და გასაგები ეს ყველაფერი, _ აღნიშნა ჩვენთან საუბრისას ბიძინა ივანიშვილმა.
