როგორც გვითხრეს, მინისტრმა უწყებას დაქვემდებარებული სამსახურები მოინახულა და თანამშრომლები გაიცნო.
იუსტიციის სამინისტროს პირველი პირი ჩოხატაურში საღამოს 8 საათისთვის ჩამოვიდა. საჯარო და სამოქალაქო რეესტრის მონახულების შემდეგ კი, როგორც გავარკვიეთ, ჩოხატაურის სოფლის მეურნეობის სამსახურის უფროსის, მანანა მინდაძის ოჯახში იმყოფებოდა.
ჩვენი გადამღები ჯგუფის დანახვაზე დაცვის წევრები, მანქანებიდან გადმოვიდნენ და გადაღების შეწყვეტა მოგვთხოვეს:
_ ნუ იღებთ, არ შეიძლება, _ გვითხრა დაცვის წევრმა, რომელმაც ვინაობა არ დაგვისახელა.
_ ცენტრალურ ქუჩაზე გადაღებას გვიკრძალავთ?
_ ჩემი მანქანაა და არ გადაიღოთ.
_ მანქანა, სახელმწიფო ნომრებით, რომელიც ბიუჯეტის, ანუ ხალხის ფულით არის შეძენილი, როდის მერე გახდა თქვენი საკუთრება?
_ აქ ერთი მანქანა ჩემია და გადაღება არ შეიძლება.
_ ზუსტად ასე იქცეოდნენ “ნაციონალური მოძრაობის” მაღალჩინოსნების დაცვის წევრები. როგორც ჩანს, პრაქტიკას აგრძელებთ… თუმცა, ნამდვილად არ გვახსოვს შემთხვევა, ქუჩაში გადაღება აეკრძალოთ…
_ არ შეიძლება გადაღება, წესია ასეთი, _ დაგვიკონკრეტეს დაცვის წევრებმა და ფოტოების გადაღება აქეთ დაგვიწყეს:
_ თქვენ მანქანით ხართ მოსულები? მოდით, მეც გადაგიღებთ სურათებს, _ მიუხედავად ცუდი ამინდისა, დაცვის წევრი მონდომებით გვიღებდა ფოტოებს.
ფოტოკორესპოდენტობა მას სატელეფონო ზარმა შეაწყვეტინა, რომლის შემდეგაც დაცვის ყველა წევრი მინდაძის სახლში შევიდა.
იმის გასარკვევად, ზუსტად რა მიზეზით იმყოფებოდა წულუკიანი გურიაში, იუსტიციის სამინისტროს პრესსამსახურის ხელმძღვანელს, მარიამ სხილაძეს დავუკავშირდით და ვთხოვეთ მინისტრისგან კომენტარის მიღებაში დაგვხმარებოდა:
_ გირჩევთ, არ დაელოდოთ. ძალიან რთული გზა გამოიარა და წინ კიდევ რთული გზა ელის. ვერანაირ კომენტარს ვერ გააკეთებს, ახლობელთან არის ოჯახში და ძალიან გთხოვთ, მანდ ნუ დაელოდებით, _ გვითხრა სხილაძემ, რომლის განმარტებით წულუკიანმა უწყებას დაქვემდებარებული სიპ-ები მოინახულა.
_ ეს იყო სამსახურეობრივი ვიზიტი და შესაბამისად მედიისთვის ინფორმაციის მიწოდება არ მოხდება, _ განმარტება არ დაიშურა პრესსამსახურის ხელმძღვანელმა.
მოგვიანებით, სხილაძე თავად დაგვიკავშირდა და გვითხრა, რომ წულუკიანმა კომენტარზე უარი განაცხადა:
_ მე მაინც გადავეცი თქვენი თხოვნა მინისტრს და კატეგორიული უარი თქვა. იმედია, სახლში არ შეუვარდებით (“გურია ნიუსის” ჟურნალისტებმა ეთიკის და ქცევის კოდექსი, განსხვავებით მაღალჩინოსნებისგან, ძალიან კარგად იციან და შესაბამისად, სახლში არავის უვარდებიან ავტ.) და კიდევ ერთხელ გირჩევთ, მანდ ნუ დაელოდებით, არანაირ კომენტარს არ გააკეთებს, _ აღნიშნა სხილაძემ.
აღსანიშნავია, რომ წულუკიანის ჩოხატაურში ვიზიტს, გარდა დაცვის სამსახურისა, ადგილობრივი პოლიციაც იცავდა. ეს იმ დროს ხდებოდა, როცა ჩოხატაურის სოფლების 95%-ს ელექტროენერგია არ მიეწოდებოდა, როცა სასწრაფო დახმარების ავტომანქანები უგზოობის გამო ავადმყოფებთან ვერ მიდიოდნენ და როცა მოსახლეობა ხელისუფლების დროულ დახმარებას ითხოვდა.
უნდა ითქვას ისიც, რომ მინისტრების ჩუმი, მედიისგან დაფარული ვიზიტები “ნაციონალების” დროს იყო მოდაში. ოღონდ, ამ ხელისუფლებისგან განსხვავებით, მინისტრები იქვე, “შემთხვევით” აღმოჩენილი მედიის წარმომადგენლებს არ ემალებოდნენ, კომენტარის გაკეთებაზე “კატეგორიულ უარს” არ ამბობდნენ და თოვლსა და ქარბუქში დაცვის წევრებს არ აგზავნიდნენ ჟურნალისტებთან, ქუჩაზე გადაღება არ შეიძლებაო.
