დღეს ექსპერტმა კახა კახიშვილმა დაადასტურა, რომ ფარცხალაძის უწყებიდან არჩილ კბილაშვილის დანიშნულ კადრებს უშვებენ. თუმცა, აღნიშნა, რომ კადრების ცვლილების მაშტაბურობაზე ინფორმაციას არ ფლობს.
“მაქვს ინფორმაცია, რომ ახალი მთავარი პროკურორის მისვლის შემდეგ, არჩილ კბილაშვილის დანიშნულ კადრებს უშვებენ. რამდენად მასშტაბურია ეს ყველაფერი, ჯერ არ ვიცი. ერთ კონკრეტულ პროკურორს ვიცნობ, რომელიც წარმატებული იყო და მის სახელს რამდენიმე გახმაურებული საქმის წარმატებით გამოძიება უკავშირდება, მან მითხრა, რომ განცხადების დაწერა მოსთხოვეს“.
ექსპერტი არამართებულად მიიჩნევს ფარცხალაძის უწყებაში იმ პირების დაწინაურებას, რომელთა სახელიც ადიეშვილის სახელს უკავშირდება.
“ის ხალხი დაწინაურდა, რომლებიც ადეიშვილის სახელს უკავშირდებიან. მათ სახელებს უკავშირდება კონკრეტული სისხლის სამართლის საქმეები, რომლის საფუძველზე უკანონოდ მიესაჯათ პირებს თავისუფლების აღკვეთა, ან ჩამოერთვათ ქონება. საკადრო ცვლილებებსაც ეს სახეები უწევენ კონსულტაციებს. ბევრ კითხვას ბადებს ეს ყოველივე”.
ჯაშუშობის ბრალდებით 2009 წელს დაკავებული სამხედრო ექსპერტი და ყოფილი დიპლომატი ვახტანგ მაისაია დღეს პროკურატურის საკითხს შეეხო და განაცხადა, რომ პოლიტპატიმრები არასამთავრობო ორგანიზაციათა კოალიციის იმ მოთხოვანას უერთდებიან, რომლის მიხედვითაც პროკურატურიდან შვიდი პროკურორის გათავისუფლება უნდა მოხდეს. 2010 წელს საქალაქო სასამართლოს გადაწყვეტილებით 20 წლით თავისუფლების აღკვეთამისჯილი და ახალი ხელისუფლების პირობებში პოლიტპატიმრის სტატუსით გათავისუფლებულ მაისაიას თქმით, ამ შვიდი პროკურორიდან ერთ-ერთი მის საქმეში ფიგურირებს, რომელიც ლაფანყურის გახმაურებული საქმის გამოძიებას ხელმძღვანელობს.
ექსპერტის განცხადებით ამ პროკურორების უწყებაში დატოვება დაუშვებელია და სამართლიანობის აღდგენას ხელს შეუშლის.
“ადამიანების დატოვება თანამდებობაზე არ არის მხოლოდ სამართლიანობის აღდგენის საკითხი, ეს არის სახელმწიფოებრივი, ეროვნული ინტერესი. მაგალითად, ჩემს საქმეში წარმოდგენილი პროკურორი ვალერი ზუმბაძე, რომელიც იყო კონტრდაზვერვის წარმომადგენელი, უწყება, რომელიც ანტისახელმწიფოებრივი სტრუქტურაა, ეს ადამიანი დღესაც მონაწილეობს ისეთ მნიშვნელოვან საქმეებში, როგორიცაა ლაფანყურის საქმის გამოძიება. ამ ადამიანმა რა უნდა გამოიძიოს, როდესაც პირველი გამყალბებელი და დამნაშავეა. ყველამ პასუხი უნდა აგოს ჩადენილ ქმედებებზე, ხალხის ინტერესები და სამართლიანობის აღდგენა მათზე მაღლა უნდა დადგეს“.
ექსპერტ ლევან ალაფიშვილის აზრით, საჭიროა ამ საკადრო ცვლილებების ახსნა, წინააღმდეგ შემთხვევაში ბევრ გაუგებრობას და უკმაყოფილებას გამოიწვევს ეს ქმედებები. თუმცა, არ გამორიცხავს იმას, რომ ახალი პროკურორი უწყების პოლიტიკიდან ჩამოშორებას გეგმავს და სანდოობას ზრდის.
“დეპარტამენტების უფროსები თუ სხვა თანამდებობის პირები იყვნენ არჩილ კბილაშვილის კურსელები, მეგობრები, ერთი სიტყვით, ადამიანები, რომლებსაც ის ენდობოდა სხვადასხვა გარემოებების გამო. შესაბამისად, როდესაც სისტემა აგებულია პერსონალურ ნდობაზე და იცვლება პირი, მას შეიძლება არ ჰქონდეს ამ ადამიანების მიმართ საკმარისი ნდობა. ამიტომაც, ლოგიკურად იწყება მსგავსი წმენდა. ყველა შემთხვევაში, მე არ მინდა ერთი წლის თავზე ანალოგიური მოცემულობით მიღებული გადაწყვეტილებების მოწმენი გავხდეთ. ამ ყველაფერში, რა თქმა უნდა, პოლიტიკის ადგილიც არის. კბილაშვილი, როგორც ნაცვლიშვილი, პოლიტიკიდან მივიდნენ პროკურატურის სისტემაში. შესაბამისად, ამ განაცხადის დანახვა ამ კონტექსტშიც შეიძლება, რომ ფარცხალაძე პროკურატურას პოლიტიკიდან სრულად ათავისუფლებს.როგორც ჩანს, პოლიტიკურ სპექტრში განხორციელებულმა ცვლილებებმა განაპირობა ის ცვლილებები, რაც პროკურატურაში მოხდა”.
დღეს უკვე ცნობილი გახდა, რომ მოძრაობა “სამოქალაქო სოლიდარობა” წინა ხელისუფლების დროს დანაშაულში შემჩნეული მაღალჩინოსნების წინააღმდეგ მამხილებენ აქციებს იწყებს.
