(გურია ნიუსი, ოზურგეთი) _ ოზურგეთის მუნიციპალური კულტურის ცენტრის შენობა მარტში ხანძარმა გაანადგურა. შენობასთან ერთად მთლიანად განადგურდა ოზურგეთის კულტურული ცხოვრების ამსახველი უნიკალური მასალების არქივი. კულტურის ცენტრი საზოგადოებას დახმარებისთვის მიმართავს.
კულტურის ცენტრის არქივის სპეციალისტი ნატო დოლიძე:
_ არქივი უნიკალური იყო მისი სიძველიდან გამომდინარე _ აქ ინახებოდა მასალები კულტურის სახლის დაარსებიდან მოყოლებული მისი არსებობის მანძილზე მომხდარი თითქმის ყველა მოვლენის შესახებ. არქივი უნდა აღდგეს _ საამისოდ ერთადერთი გამოსავალია, საზოგადოების გულისხმიერება და აქტიურობა. დახმარებას თქვენს რედაქციასაც ვთხოვთ _ არა ერთი უნიკალური მასალა თქვენი გაზეთშიც იყო გამოქვეყნებული.
არ შეიძლება ისეთი პიროვნებების შექმნილი ისტორია უკვალოდ დაიკარგოს, რომლებმაც არა მარტო გურიაში, არამედ მთელს მსოფლიოში გაითქვეს სახელი. ქართული ფოლკლორის უბადლო შემსრულებლების შესახებ მომავალმა თაობამ აუცილებლად უნდა იცოდეს. ამ მიზნით თანადგომას ვითხოვთ თქვენგან. თუ კი ვინმეს აქვს ფოტო ან ვიდეო მასალა, რომელიც ეხება ხსენებულ სფეროს, გთხოვთ, მოგვაწოდოთ _ შესაბამისი დამუშავების შემდეგ იგი უკან დაგიბრუნდებათ. გთხოვთ, ამ საშვილიშვილო საქმეში მხარი დაგვიჭიროთ.
დღევანდელი მდგომარეობით, მუნიციპალური კულტურის ცენტრი ოზურგეთის სახელმწიფო დრამატულ თეატრის შენობაში არის შეფარებული. როგორც შევიტყვეთ, ამ სამსახურისთვის ყოფილი სამედიცინო კოლეჯის შენობას არემონტებენ და ალბათ, შემოდგომისთვის კულტურის სამსახური ხსენებულ იქ განთავსდება.
კულტურის ცენტრის ამ ინიციატივას უკვე გამოეხმაურა რამდენიმე ადამიანი _ ოზურგეთის სახელმწიფო თეატრის ღვაწლმოსილი მსახიობი იური ჯიჯიეშვილი, ცნობილი ფოლკლორისტი, მოკრიმანჭულე ჟუჟუნა ბაბილოძე და ქორეოგრაფი, ღირსების ორდენის კავალერი ვაჟა ახვლედიანი. ამ ადამიანებმა მათ ხელთ არსებული ფოტო მასალები და პუბლიკაციები არქივის სამსახურს გადასცეს.
