ხათუნა გოგალაძე თავის პოზიციას “გურია ნიუსთან” აფიქსირებს.
_ ქალბატონო ხათუნა, ხუდონჰესის პროექტი ერთ-ერთი მნიშვნელოვანი საკითხია ქვეყნისთვის. ერთის მხრივ საუბარია ქვეყნის ენერგოდამოუკიდებლობაზე და მეორეს მხრივ ამ ყველაფერს აპროტესტებენ გარემოსდამცველები. ის გუნდი, რომელსაც თქვენ წარმოადგენთ, აცხადებს, რომ ეს პროექტი უნდა განხორციელდეს. თქვენ რას ფიქრობთ ამაზე, ჭირდება ქვეყანას ხუდონჰესი?
_ორი აზრი არ არსებობს იმაში, რომ ქვეყანას ჭირდება ენერგეტიკული დამოუკიდებლობა და ენერგოუსაფრთხოება. ეს იქნება ხუდონი, უფრო პატარა თუ უფრო დიდი ჰესი, ნებისმიერ შემთხვევაში, უნდა მოხდეს საკითხის ღრმა შესწავლა და ანალიზი. ერთია, რომ ძალიან გვჭირდება რაღაცა და მაგაზე არავინ დავობს, დარწმუნებული ვარ ყველაზე ექსტრემალი გარემოსდამცველებიც კი, უბრალოდ, მეორეს მხრივ, დეტალურად უნდა შევისწავლოთ ყველაფერი, რათა ქვეყანას რაიმე პრობლემა არ შეექმნას.
რომ გვინდა, ეს გასაგებია, მაგრამ სად გვინდა, როგორ და რა რისკები შეიძლება გამოიწვიოს, როგორ უნდა იქნას ისინი მინიმუმამდე დაყვანილი, ამისთვის საჭიროა ღრმა და დეტალური კვლევა, რადგან საკმაოდ მნიშვნელოვან და ფართომასშტაბიან პროექტზეა საუბარი. სათანადოდ დასაბუთებულმა კვლევამ და პროფესიონალიზმმა უნდა მიგვიყვანოს სწორ გადაწყვეტილებამდე. ამავდროულად, მნიშვნელოვანია მოსახლეობის ჩართვა, ინფორმირება და მათი ინტერესების, ასევე სოციალური ფონის გათვალისწინება.
_ სვანეთის მოსახლეობას დღესაც ძალიან მძიმე პირობებში უხდება ცხოვრება, ვგულისხმობ მათ სოციალურ მდგომარეობას. ჯანდაცვის სამინისტროს მიერ მოწოდებული ინფორმაციით, მარტო მესტიაში საარსებო შემწეობას 4 000-მდე ადამიანი იღებს. მათ არ აქვთ სამსახური, არ არის განვითარებული ინფრასტრუქტურა. ხუდონჰესის მოწინააღმდგეები ძირითადად აპელირებენ განსახლებაზე, თუმცა, ფაქტია ისიც, რომ სვანეთი წლების განმავლობაში მძიმე სოციალ-ეკონომიკური პირობების გამო იცლებოდა მოსახლეობისგან…
_ რა თქმა უნდა, ყველაფერი შესწავლილი და გათვალისწინებული უნდა იყოს. კომპენსაციის საკითხი ჩვენს კომპეტენციას სცილდება, ამიტომ მაგ საკითხზე დასაბუთებული არგუმენტები ვერ მექნება. თუმცა კიდევ ერთხელ გავიმეორებ იმას, რომ ძალიან მნიშვნელოვანია მოსახლეობის ინფორმირება, მათი ჩართულობა. ვფიქრობთ, რომ მოსახლეობის აზრი მაქსიმალურად იქნება გათვალისწინებული ყველანაირ რისკთან დაკავშირებით. მე პირადად ძალიან მინდა ორივე მხარისგან არგუმენტირებული პოზიცია მოვისმინო, როგორც მომხრეებისგან, ასევე მოწინააღმდეგეებისგან.
