გავრცელებული ინფორმაციით, გუბერნატორის ერთ-ერთ მოადგილედ “ქართული ოცნების” ზუგდიდის ორგანიზაციის თავმჯდომარე ლაშა გოგია მოიაზრება, რომელიც ადასტურებს, რომ შეთავაზება ნამდვილად მიიღო და პასუხიც სავარაუდოდ დადებითი იქნება. ასევე, ვრცელდება ინფორმაცია გუბერნატორის მოადგილედ “ქართული ოცნების” სამეგრელოს რეგიონის კოორდინატორის ხვიჩა ჯიშკარიანის დანიშვნის შესახებ. მიუხედავად იმისა, რომ ოფიციალურად ჯერ არაფერია ცნობილი, ჯიშკარიანის სავარაუდო კანდიდატურამ უკვე გამოიწვია საზოგადოების გარკვეულ ფენაში უკმაყოფილება.
სამეგრელო-ზემო სვანეთის არასამთავრობო ორგანიზაცია “ქალები მშვიდობისთვის” ლიდერი ინგა ქარდავა ამ თემასთან დაკავშირებით ოფიციალურ განცხადებას აკეთებს და პრემიერს მიმართავს.
“ხვიჩა ჯიშკარიანის სამეგრელოს გუბერნატორის მოადგილეს დანიშცნის შემთხვევაში, მე, ინგა ქარდავა, რომელიც წარმოვადგენ არასამთავრობო სექტორს სამეგრელოს რეგიონში, რომელმაც წლების განმავლობაში უანგაროდ ვიბრძოლე ჩემი ქვეყნის უკეთესი მომავლისთვის და დღევანდელი ხელისუფლების მოსვლისთვის, სიცოცხლის ფასად ყველაფერს გავაკეთებ სამართლიანობის მისაღწევად. ალბათ, მე ვიქნები ამ ხელისუფლების პირველი პოლიტპატიმარი, რომელიც სამართლიანობას აღავლენს. ჯიშკარიანმა ჯერ ბევრ კითხვას უნდა გასცეს პასუხი და თანამდებობაზე მერე იზრუნოს. თანამდებობაზე პრეტენზიის მქონე ადამიანმა კარგად უნდა გააცნობიეროს, მასზე ნეგატიური კრიტიკის შემთხვევაში, ქალებზე მუქარებს არ უნდა ახორციელებდეს და მასზე არარსებულ დაუსაბუთებელ ჭორებს არ უნდა ავრცელებდეს. რა გაუჭირდა ისეთი დღევანდელ ხელისუფლებას ლევან შონიას მოადგილედ უღირსი ჯიშკარიანი რომ არ დანიშნოს? სამეგრელოში კაცი არ მოიძებნა?”, _ აცხადებს ქარდავა.
თავად ლევან შონია აცხადებს, რომ ჯერ არაფერია გადაწყვეტილი და ამ კვირაში ახალი გუნდის ჩამოყალიბების შემდეგ ოფიციალურად გახდება ყველა ინფორმაცია ცნობილი.
სამეგრელო-ზემო სვანეთის გუბერნატორის თქმით, ის აქტიურად ითანამშრომლებს მედიასთან.
