“თქვენი 16.09.2013 წლის განცხადების პასუხად, სადაც ითხოვთ ქ. თბილისში ჭავჭავაძის გამზ. #68-ში, თქვენს კუთვნილ ტერიტორიაზე, მშენებლობის განხორციელების მიზნით, 5 (ხუთი) ძირი ფიჭვის ხის მოჭრას დიამეტრით 55 სმ, 2 (ორი) ძირი ჭადარის დიამეტრით 110 სმ, 1 (ერთი) ძირი კედარის დიამეტრით 75 სმ და 1 (ერთი) ძირი თუთის დიამეტრით 20 სმ გაცნობებთ, რომ ქ. თბილისის მერიის ეკოლოგიისა და გამწვანების საქალაქო სამსახური თანახმაა, მოიჭრას აღნიშნული ხე-მცენარეები 2013 წლის 31 დეკემბრის ჩათვლით“, _ აღნიშნულია 17 სექტემბერს მერიის მიერ გაცემულ ნებართვაში, რომელსაც ხელს ეკოლოგიისა და გამწვანების სამსახურის უფროსი გიორგი ქორქაშვილი აწერს.
როგორც მერიის არქიტექტურის სამსახურის მიერ 20 სექტემბერს გაცემული მშენებლობის ნებართვაშია აღნიშნული, 30 მეტრი სიმაღლის სასტუმრო შპს “ჰაუსარტ პროჯექტმა” შპს “გრაალის” დაკვეთით უნდა ააშენოს. დამკვეთი ლიდია დავტიანია. მშენებლობას სასტუმროების ქსელის მართვის ოპერატორი BEST WESTERN და სამშენებლო კომპანია “ტიფლის დეველოპმენტი” აწარმოებენ.
მოძრაობა “პარტიზანული მებაღეობა თბილისში” წარმომადგენლები აცხადებენ, რომ ჭავჭავაძის #68 ვაკის პარკია და იქ ხეების ჭრა სასტუმროს მშენებლობის მიზნით გაუმართლებელია.
“იგეგმება 9 ძირი ხის მოჭრა 31 დეკემბრამდე. 30-მეტრიანი სასტუმროს მშენებლობაზე ყველა ნებართვა არის გაცემული, რაც მთლიანად დაამახინჯებს ვაკის პარკს. დღეს ვესაუბრე მერიის ეკოლოგიისა და გამწვანების სამსახურის უფროსს გიორგი ქორქაშვილს. მისი თქმით, უკვე გასხვისებულ ნაკვეთზე რომ არ გაეცა ნებართვა, სასამართლოს ძალით აიძულებდნენ ამას. თუმცა კი მაინც სადაოა, რახან ხელის მოწერას თხოვენ, ე.ი. მისი ხელის მოწერა მნიშვნელოვანია და არ უნდა მოეწერა. აქ გასხვისებაა პრობლემა და სტატუსის მოხსნა ტერიტორიისთვის”.
ჭავჭავაძის #68-ს რეკრეაციულ ზონა 2 -ის სტატუსი აქვს, რაც “პარტიზანული მებაღეობა თბილისში” წარმომადგენელ მარიამ ბაქრაძის თქმით, იქ მშენებლობებს კრძალავს.
“რეკრეაციულ ზონა 2-ში, წესით, არ შეიძლება სასტუმროს მშენებლობა, მაგრამ როგორც ჩანს, კანონში შეიტანეს ცვლილება და განსაკუთრებულ შემთხვევებში დაუშვეს ნებართვის გაცემა”, _ გვითხრა მარიამ ბაქრაძემ.
“როგორც მოქალაქე, ვფიქრობ, რომ ხეების მოჭრაზე დიდი პრობლემა სასტუმროს მშენებლობაა, რომელიც მერიის მიერ გაფორმებული სპეციალური ზონალური შეთანხმების საფუძველზე იგეგმება. მერია ვალდებულია განმარტოს, თუ რატომ დაუშვა გამონაკლისი და დასაშვებად ჩათვალა პარკში სასტუმროს მშენებლობა”, _ ამბობს მოქალაქეთა საინიციატივო ჯგუფის წარმომადგენელი ერეკლე ურუშაძე.
რაც შეეხება მერიის ეკოლოგიისა და გამწვანების სამსახურის უფროსს, გიორგი ქორქაშვილი ამბობს, რომ ნებართვა სასტუმროს მშენებლობასა და ხეების ჭრაზე კანონიერად გაიცა.
“მშენებლობის ნებართვა ვაკის პარკში არ არის გაცემული და ეს ინფორმაცია ვრცელდება შეცდომით. ჭავჭავაძის #68-ში “ბუდაპეშტი” იყო რესტორანი და იმის ადგილას შენდება სასტუმრო. ვაკის პარკში, სადაც ახლა სრული რეკონსტრუქცია მიმდინარეობს, არანაირი მშენებლობა არ იგეგმება. არც ხეებს ჭრა, თუ რაიმე დაავადება არ ექნებათ. ჭავჭავაძის #68-ის ტერიტორია კერძო საკუთრებაშია, რამდენიმე ათეული წელია. ხეების ჭრის გარეშე შეუძლებელი იქნება იქ მშენებლობა. ზოგიერთი არის ჯანმრთელი ხე, ზოგიერთი ხმობაში შესული. მათ წინასწარ უნდა დარეკონ არქიტექტურის სამსახურში. შემთხვევით სხვა ხე რომ არ მოჭრან, ან რამე არ მიაყოლონ დამატებით, ამის გასაკონტროლებლად.
რაც შეეხება ვაკის პარკს, მას აქვს რეკრეაციული ზონის სტატუსი. ხოლო იმას, რაზეც ნებართვა გავეცით, რეკრეაციული ზონა 2 -ის სტატუსი. რეკრეაციული ზონა 2-ის სტატუსის მქონე ადგილი კი ითვალისწინებს ასეთი სასტუმროს მშენებლობებს”, _ განაცხადა “გურია ნიუსთან” საუბარში გიორგი ქორქაშვილმა.
პარტიზანი მებაღე ნატა ფერაძის თქმით, ხეების ჭრასთან შებრძოლება მხოლოდ სამოქალაქო აქტივიზმითაა შესაძლებელი. ამიტომ მოძრაობა “პარტიზანული მებაღეობა თბილისში” 22 დეკემბერს მერიის წინ, 15:00 საათზეაქციის გამართვას აპირებს და ყველას მოუწოდებს მობილიზაციისკენ.
შეგახსენებთ, რომ თბილისის მაცხოვრებლებმა არასამთავრობო ორგანიზაციების წარმომადგენლებთან ერთად არაერთი აქცია გამართეს, ასათიანის ქუჩის, კუს ტბის მიმდებარე ტერიტორიასა და დიღმის მე-12 კილომეტრზე ხეების ჭრის წინააღმდეგ.
