“არ შეიძლება პროკურატურამ ღამის პირველ საათზე დახურულ კარს მიღმა გადააყენოს მილიონნახევრიანი თბილისის მიერ არჩეული მერი. თბილისის საქალაქო სასამართლოს გადაწყვეტილებას ექნება ძალიან მძიმე შედეგები ქართული დემოკრატიისთვის. გუშინ დადასტურდა რა სურს ხელისუფლებას და რა მეთოდებით აპირებს დასახული ამოცანების მიღწევას. თავად უგულავამ ამ გადაწყვეტილების შესახებ შეიტყო მოსამართლის თანაშემწის ზარით, თბილისის მოსახლეობამ კი, რომლის არჩეულიც იყო ქალაქის მერი, მხოლოდ ამის შემდეგ. ეს ნაბიჯი სამართლებრივად სადავოა, მორალურად და პოლიტიკურად კი ძალიან მძიმე. ეს გადაწყვეტილება არის ოპოზიციაზე პოლიტიკური დევნის კამპანიის მორიგი ნაბიჯი. გუშინდელი გადაწყვეტილებით, თბილისის სასამართლომ პროკურატურას მისცა იარაღი, რომლითაც შეეძლება გაუსწორდეს ნებისმიერ თანამდებობის პირს. გუშინ პროკურატურამ და სასამართლომ თბილისელებს უთხრა, რომ საერთოდ არ აინტერესებთ მათი აზრი”.
ბაქრაძემ იმედი გამოთქვა, რომ საზოგადოები ის დიდი ნაწილი, რომლისთვისაც მნიშვნელოვანია ქვეყნის მომავალი, დემოკრატია და ღირსება, ცალსახად შეაფასებს ამ გადაწყვეტილებას როგორც მიუღებელს.
“თუ პროკურატურას არ მოეწონება თქვენს მიერ არჩეული ნებისმიერი თანამდებობის პირი, მას გააჩნია სქემა და მექანიზმი, რომ დახურულ კარს მიღმა ამ თანამდებობის პირს შეუწყვიტოს უფლებამოსილება”.
ხელისუფლების მიერ მორიგ ზეწოლად შეაფასა სასამართლოს გადაწყვეტილება ზურაბ ჭიაბერაშვილმაც და განაცხადა, რომ “ნაციონალური მოძრაობა” არ დაუშვებს საქართველოში “ჭორვილის დიქტატურის გამარჯვებას”.
“წუხელ, ღამის 1 საათზე, საქართველოში საბოლოოდ გაფორმდა ჭორვილის დიქტატურა. ჩვენ ერთი წლის განმავლობაში ვხედავდით იმის მცდელობას, რომ “ნაციონალური მოძრაობა” განადგურებულიყო.
მიუხედავად იმისა, რა უკანონობაც წუხელ ჩაიდინა ბიძინა ივანიშვილის მთავრობამ, არსებული ხელისუფლება “ნაციონალურ მოძრაობას” ვერ გაანადგურებს. ჩვენ ვრჩებით მთავარ ოპოზიციურ ძალად და არ დავუშვებთ ჭორვილის დიქტატურის გამარჯვებას საქართველოში”.
თბილისის საქალაქო სასამართლოში გიგი უგულავასთან დაკავშირებით მიღებულ გადაწყვეტილებას გამოეხმაურა “ერთიანი ნაციონალური მოძრაობის” სტრატეგიული და ორგანიზაციული განვითარების მდივანი გიორგი ვაშაძე და აღნიშნა, რომ სასამართლოს გადაწყვეტილებას აუცილებლად გაასაჩივრებენ.
“თბილისის საქალაქო სასამართლოში გამთენიისას გაიმართა “საიდუმლო სერობა”, მოსამართლემ მიიღო გადაწყვეტილება რომლითაც გიგი უგულავას მერობის უფლებამოსილება შეუჩერდა. ჩვენ მთელი საღამო სასამართლოში ვიყავით, სადაც აღმკვეთ ღონისძიებად პატიმრობის შეფარდებაზეც იყო მსჯელობა, რაზეც სასამართლომ უარი თქვა, როგორც ჩანს ეს იყო მთავრობისა და სასამართლოს მენეჯმენტის მიერ დაგეგმილი ცრუ მანევრი, რომელსაც მიაყოლეს მეორე გადაწყვეტილება ჩვენი, ასევე ადვოკატების მონაწილეობის გარეშე. სასამართლომ მიიღო პოლიტიკურად მოტივირებული უკანონო გადაწყვეტილება”.
ვაშაძე აცხადებს, რომ ხელისუფლებამ დაიწყო აშკარა თავდასხმები “ნაციონალურ მოძრაობაზე”, ამიტომ მოძრაობა გააკეთებს საკმაოდ მკაცრ პოლიტიკურ სვლებს და ასევე გაასაჩივრებენ სასამართლოს გადაწყვეტილებას.
“როგორც ჩანს, ხელისუფლებას არ უნდა ნორმალური საარჩევნო გარემო და უნდა პირდაპირი თავდასხმები, ამიტომ “ნაციონალური მოძრაობა” გადავდივართ აქტიურ ფაზაზე და გვექნება ძალიან კონკრეტული ნაბიჯები”.
პარლამენტის უფლებათა დაცვის კომიტეტის თავმჯდოამრე ეკა ბესელია კი აცხადებს, რომ გიგი უგულავას უფლებამოსილება შეუჩერდება იქამდე, ვიდრე სასამართლო საბოლოო გადაწყვეტილებას არ გამოიტანს.
“ეს არის სწორი, რადგან პროკურატურა თანამდებობაზე ყოფნის პერიოდში ჩადენილ დანაშაულზე ედავება. უგულავას უფლებამოსილება სასამართლოს საბოლოო გადაწყვეტილებამდე შეუჩერდა”.
