"გურია ნიუსის" წყაროს ინფორმაციით, გურიის გუბერნატორის გიორგი ჩხაიძის მოადგილეებად ჩოხატაურის მუნიციპალიტეტის ყოფილი გამგებელი მამუკა დოლიძე, ხოლო მეორე მოადგილე წარმოშობით ოზურგეთელი მერაბ ჭანუყვაძე იქნებიან.
ეს ინფორმაცია "გურია ნიუსთან" გუბერნატორმა არც უარყო და არც დაადასტურა.
_ ყველა ინფორმაციას, მე როგორც ვთქვი, დავადასტურებ ორშაბათს, _ გვითხრა გიორგი ჩხაიძემ.
_ ბატონო გიორგი, განიხილება თუ არა მამუკა დოლიძის კანდიდატურა გუბერნატორის მოადგილის პოსტზე?
_ მამუკა დოლიძე მსმენია, ვიცი, მისი პიროვნება. ამის მეტს ვერაფერს ვერ გეტყვით.
_ ბატონო გიორგი, თქვენ ჩვენთან საუბარში აღნიშნეთ, რომ კოჰაბიტაცია დასრულდა. მამუკა დოლიძე "ნაციონალების" მმართველობის პერიოდში იყო ჩოხატაურის მუნიციპალიტეტის გამგებელი, "ნაციონალური მოძრაობის" პარტიის თავმჯდომარე. მისი აქტივობები მთელ ჩოხატაურს ახსოვს იმ პერიოდში გამართული არჩევნებზე. მის სახელს უკავშირდება უკანონო მშენებლობები, ბახმაროს სკანდალური საქმე…. ხომ არ ფიქრობთ, რომ ასეთი ფიგურის გვერდით დაყენება უხერხულ სიტუაციაში ჩაგაგდებთ და მოსახლეობის თვალში თქვენთვის ძალიან ცუდი იქნება?
_ რაც შეეხება კოჰაბიტაციას, არაერთხელ ვთქვი და კიდევ გავიმეორებ, ზუსტად: კოჰაბიტაციის დასრულება რას ნიშნავს?! ანუ თუ ვიღაცა იმ პერიოდში მუშაობდა ხელისუფლებაში, "ნაციონალებში", ყველა ისინი არიან "ნაციონალები", მაშინ რა ვქნათ? აბსოლუტურად იმ ყველაფერზე და ყველაზე უარი ვთქვათ? ჩემთვის ამომავალი წერტილი არ არის, ის ვინ ვის დროს მუშაობდა; ჩემთვის ამომავალი წერტილია, ვინ აკეთებდა საქმეს და ვინ _ არა, ვინ შეიძლება გააკეთოს საქმე და თან კარგად. მე არ მაქვს არანაირი ვალდებულება, ვიღაცა გამოვყო იმის გამო, რომ ის "ნაციონალების" დროს მუშაობდა. მე ვფიქრობ, რომ კოჰაბიტაცია ავტომატურად დასრულებულია. ჩემთან ვითარებაში ეს სიტყვა რა შუაშია მაინც გაურკვეველია.
_ ბატონო გიორგი, იქნებ კონკრეტული პასუხი გაგვცეთ კითხვაზე: განიხილება თუ არა თქვენს ერთ-ერთ მოადგილედ "ნაციონალი" მამუკა დოლიძე?
_ ასე შეიძლება ბევრი ვინმე განიხილებოდეს.
_ დაიკავებს თუ არა თქვენი მოადგილეების პოსტს მერაბ ჭანუყვაძე და მამუკა დოლიძე?
_ ამ კითხვებზე ამომწურავ პასუხს გავცემ ორშაბათს, როცა უკვე ეს პროცედურები დასრულებული იქნება.
რედაქციისგან: როგორც ახალი გუბენატორი ამბობს, მას მამუკა დოლიძის შესახებ მხოლოდ სმენია და მეტს ვერაფერს გვეტყვის. "მე არ მაქვს ვალდებულებაო", ბრძანებს, მაგრამ, დიახაც საზოგადოების წინაშე მას უკვე სწორედაც აქვს ვალდებულება, თუ არაფერი არ იცის ჩოხატაურის ყოფილი გამგებლის შესახებ, მაშინ მედიაში, საზოგადოებაში შეაგროვოს ინფორმაცია და მოიკითხოს, თუ ვის გვთავაზობს, რადგან საზოგადოებამ სწორედ ამის გამო დაიქირავა გუბერნიის ყველა თანამშრომელი საჯარო მოხელედ. ბატონმა გიორგიმ ბევრი დრო რომ არ დაკარგოს, ჩვენ შევახსენებთ: დოლიძე "ნაციონალური" ხელისუფლების დროს ჩოხატაურის მუნიციპალიტეტის ხელმძღვანელი პირი იყო და არა რიგითი ჩინოვნიკი. და თუ "ქართული ოცნება" ყოფილი ხელისუფლების მმართველობას დანაშაულებრივად მიიჩნევს, მაშინ პასუხი ყველა პასუხისმგებელ პირს უნდა მოსთხოვოს და არა რიგით ჩინოვნიკებს, რომლებიც თავიანთ საქმეს ყოველდღიურად, სამუშაო პროცესში ასრულებდნენ.
რეალობა კი, რომლის შესახებაც გურიის მოსახლეობამ კარგად იცის, რადგან არაერთხელ დაგვიწერია (ბმულებს აქაც ვდებთ დაინტერესებული პირებისთვის!), გუბერნატორის საყურადღებოდ, ამგვარია: დოლიძე აქტიურად უჭერდა მხარს "ნაციონალურ" მოძრაობას, საფუძვლიანად იყო ჩართული "ნაცმოძრაობის" ყველა საარჩევნო კამპანიაში, რომლის ტოტალურ გაყალბებაში პირდაპირ სდებს ბრალს "ქართული ოცნება" ყოფილ ხელისუფლებას; მამუკა დოლიძე იყო ის ჩინოვნიკი, რომელიც ბახმაროს მიწების სკანდალის გამო, იმდროინდელმა ხელისუფლებამაც კი ვეღარ დაუტოვა საზოგადოებას და სამსახურიდან გაათავისუფლა. თუმცა, ეს ფორმალურად იყო გათავისუფლება, რადგან მას მაშინვე შეუქმნეს არასამთავრობო ორგანიზაცია _ "გურიის განვითარების სააგენტო", რომლის დამფუძნებლებიც გუბერნიის და გამგეობების მაშინდელი მაღალჩინოსნები იყვნენ.
მიუხედავად იმისა, რომ საზოგადოებამ არაფერი იცოდა, თუ რას საქმიანობდა ეს ორგანიზაცია, იგი გურიის მუნიციპალიტეტების ბიუჯეტებიდან მსუყედ და უპრობლემოდ ფინანსდებოდა. ბიუჯეტების გარდა, "ნაციონალური ყულაბიდან" (ასეთი კი ცენტრალური საარჩევნო კომისიაც იყო) სრულიად უცნობი, ფიქტიურად არსებული ორგანიზაცია რამდენიმე მსხვილბიუჯეტიან გრანტსაც იღებდა, მაგალითად, "არჩევნების დემოკრატიულად ჩატარების პროცესზე" დასაკვირვებლად, გურიაში ეროვნული უმცირესობების ინფორმირების (?!) საბაბით!
ახალ გუბერნატორს ვურჩევთ, დოლიძეს "საარჩევნო-სადამკვირვებლო" დასკვის გაცნობა მაინც მოთხოვოს – საინტერესოა, რა ანგარიში წარადგინა დამფინანსებლის წინაშე, თუ საერთოდაც ამისთვის მაინც შეიწუხა თავი ამ "არასამთავრობო სამთავრობო" ორგანიზაციამ!
თუ ეს "აქტივობა" გურიის საზოგადოების გარდა ბევრისთვის უცნობი დარჩა, მამუკა დოლიძე იყო ის ჩინოვნიკი, რომელიც მეტად ტრაგიკომიკურად დაამახსოვრდა მთელ საქართველოს (და არა მარტო საქართველოს _ საერთაშორისო ორგანიზაციებს, ექსპერტებს, რომლებსაც ქართულ მედიასთან შეხება ჰქონიათ და აქვთ, ამ ფაქტს იმდროინდელი საქართველოსთვის "ქრესტომათიულად" მიიჩნევენ, მაგალითად მოჰყავთ, ტრენინგებზე დამსწრეთ აცნობენ!): "გურია ნიუსი" ჟურნალისტების მიმართ გახორციელებული ფიზიკური შეურაცხყოფის გამო (სხვათა შორის, ამის გამოც ჯე¬რჯერობით არავინ დასჯილა!) ჩოხატაურში სტუდია "GNS"-ის გადამღები ჯგუფი ჩამოვიდა (ყველას კარგად ახსოვს, როგორი ინტერესით ელოდა საზოგადოება ნანა ლეჟავას "კვირის რეპორტაჟებს") "გურია ნიუსის" მხარდასაჭერად და სიუჟეტის მოსამზადებლად. დოლიძე, რომელიც არც კი დაინტერესებულა, თუ რა მოხდა პოლიციის შენობაში, სადაც რესპუბლიკლი, თანაც მძიმე ავადმყოფი ახალგაზრდა მამუკა ცინცაძე სრულიად უმიზეზოდ, განსხვავებული შეხედულებების გამო დაიჭირეს, მის საშველად მისული ჟურნალისტები კი ცემეს, სიუჟეტის ერთ-ერთი რესპონდენტი უნდა ყოფილიყო. "მაესტროსა" და "კავკასიის" ოპოზიციურობის გამო გაჯიუტებული დოლიძე ჟურნალისტმა თეონა გეგელიამ კომენტარის გაკეთებაზე დაითანხმა, მიკროფონიც დაუმაგრეს, მაგრამ დოლიძე "უფროსობამ" გამოიძახა და მიკროფონდამაგრებული გამგებელიც "უფროსთან" სასაუბროდ მეორე ოთახში გავიდა. მას ჟურნალისტების კაბინეტიდან გაყრა მოთხოვეს და კარგადაც შეახურეს, რომ კომენტარის მიცემას აპირებდა. დოლიძემაც მონურად ქართულ ჟურნალისტებს დედის პრო..ის "დახურვა" აღუთქვა და "ნაჩალნიკს" კაბინეტიდან სასწრაფოდ მათი გაყრის პირობა მლიქვნელურად მისცა… თუმცა, კაბინეტში დაბრუნებულს "დუხი" აღარ ეყო და საკუთარი დედის… ავადმყოფობის მომიზეზებით, ინტერვიუ ჩაშალა. არადა, მთელ ამ საცოდაობას გამგებლის მკერდზე დაბნეული მიკროფონი იწერდა და მერე მთელი საქართველო ისმენდა! დღემდე, ინტერნეტფორუმებზე ათასობით კომენტარი იძებნება, თუ როგორ აფასებენ დოლიძის კაცობას და საქციელს ქართველი საზოგადოება!
დოლიძის სიუჟეტმა ყველა დამოუკიდებელი ტელევიზია, ყველა გადაცემა მოიარა, მნახველთა ყველა რეკორდი მოხსნა და დღემდე "ქართულ ნაციონალურ" მედიაჰიტად ითვლება!
რაც შეეხება ბახმაროს მიწების, ჩოხატაურის "ფერმერთა დახმარების ცენტრის (რომელიც ორიოდ თვეში თონედ და რესტორნად გადაკეთდა!) მშენებლობის ნებართვის და სხვა საქმიანობის შესახებ მასალებს, ახალ გუბერნატორს, თუ სურვილი გაუჩნდება, შეუძლია დამატებით მრავლად მოიძიოს.
სულ ცოტა ხნის წინ, "გურია ნიუსის" მოკვლევის თემა უკვე იყო, თუ ვის სჭირდება მარიონეტად დასმული დოლიძე ჩოხატაურში _ ეს მასალაც შეგიძლიათ ჩვენს ვებზე იხილოთ. ფინანსური და პოლიტიკური ჯგუფები, რომლებიც უკვე ორ ათეულზე მეტი წელია ჩოხატაურში კონტროლის შენარჩუნებას და "თავის ჭკუაზე" "მართვას" ახერხებენ, ისევ მწყობრში არიან! ამიტომ, "ხალხზე ზრუნვით" და "საზოგადოების ინტერესებზე" საუბრით თავს ნურავინ დაიღლის – ეს კიდევ უფრო შეურაცხმყოფელია ხალხისთვის, რომელიც კარგა ხანია თვალში ნაცარშეყრილი ცხოვრობს!
გვინდა იმედი ვიქონიოთ, რომ თუ გურიის ახალი გუბერნატორი ამ საკადრო "ნაცრის" თვალებში შემოყრას არ გვაკადრებს; მაგრამ თუ მაინც მოხდა, საზოგადოებას ვპირდებით _ ჩვენი ვებგვერდის პირველი გვერდიდან დოლიძის ჩინოვნიკობის თუნდაც ასწლიან პერიოდში, ეს სკანდალური ვიდოსიუჟეტი არ მოიხსნება!
მამუკა დოლიძის "ნაციონალური მოღვაწეობის" ამსახველი ფოტოგალერეა, საიდანაც ნათლად ჩანს, რომ ის რიგითი ჩინოვნიკი არ იყო
ცოტა რამ მამუკა დოლიძის ისტორიიდან:
