“ეს არის ჩვენი მხრიდან მასობრივი სუიციდი, 300-მდე პატიმარი ვშიმშილობთ ქსანში და ვითხოვთ შელახული კონსტიტუციური უფლებების აღდგენას. ხელისუფლება კი ცდილობს სულ სხვა მიზნები მოგვაწეროს, თითქოს ჩვენ ვცდილობთ სისხლის სამართლის 223-ე პრიმა მუხლის გაუქმებას, რაც ქურდული სამყაროს წევრობას ნიშნავს. თითქოს ამ მოთხოვნის უკან კანონიერი ქურდები დგანან. თუ ესენი ასე არიან მოძლიერებულები, მაშინ ციხეების დირექტორები დღეში სამჯერ არიან შესაცვლელი, იმიტომ, რომ მათ გარეშე აქ ვერავინ მოძლიერდება, კენჭი არ გადაიდება გვერდზე მათი თანხმობის გარეშე. ამ პრობლემის წამოწევა აწყობთ, იმიტომ რომ ჩვენი პროტესტი “გაალაითონ”, _ ამბობს პატიმარი ინაშვილი.
მისი თქმით, ადამიანის უფლებათა დაცვის კომიტეტის თავმჯდომარე ეკა ბესელიას ციხეში ვიზიტებს ერთადერთი მიზანი აქვს: “დაამშვიდოს პატიმრები, რომ მთავრობამ მშვიდად იცხოვროს”.
“ჯერ იყო და მთელი წელი მართლმსაჯულების ხარვეზების კომისიის შექმნაზე დაგვაკარგვინეს, ეხლა გვპირდებიან რაღაც ახალს გამოვიგონებთ თქვენთვისო. ჩვენ გვინდა იმ ხარისხის სამართლინი სასამართლო, რომელსაც უტარებენ ახალაიას, მერაბიშვილს. დღეს სასამართლოში სასჯელების მიმართ მიდგომა რადიკალურად არის შეცვლილი. სააკაშვილის დროს რომ 20-30 წელს გვისჯიდნენ, დღეს სასაცილო სასჯელებია. გუშინ ეკა ბესელია იყო შემოსული, თავზე მოგვახვია თავისი აზრები და წავიდა. იმის საშუალებაც არ არის, რომ აქეთ ვუთხრათ რა არის გამოსავალი. კანონში დევს არაერთი მექანიზმი და თუ მთავრობის ნება იქნება, შეიძლება ჩვენი მდგომარეობის შეცვლა. მთავრობის პოზიცია არის ასეთი: თქვენ დაწყნარდით, რომ ჩვენც წყნარად ვიყოთო. 300-მდე პატიმარი ვშიმშილობთ და თანდათანობით გვემატება. ამათი მოსვლა კიდევ უფრო აღიზიანებს ხალხს. ან არ მოვიდნენ, ან თუ მოდიან კონკრეტული წინადადებები მოგვიტანონ. საათობით გვიხსნიან, სამწუხაროდ ასე მოხდა, ისე მოხდაო, რამე ახალს მოვიფიქრებთო. არაფერის მოგონება არ არის საჭირო, როცა არსებობს შეწყალება. პირველივე შეწყალებაზე 150 საქმიდან რომელიც კრიტერიუმებს აკმაყოფილებდა, მხოლოდ 54 გაუშვეს. გარდა ამისა, შესაძლებელია განაჩენების საკასაციო წესით გასაჩივრების უფლება მოგვცენ.
კანონში ერთადერთი ჩანაწერი უნდა გაკეთდეს, რომ გვაქვს კასაციის გავლის უფლება. დაუმატონ მოსამართლეები რეზერვიდან და განიხილონ ჩვენი საქმეები.”
ზურაბ ინაშვილის თქმით, პატიმრები შიმშილობას მათი მოთხოვნების დაკმაყოფილებამდე არ შეწყვეტენ.
