შეგახსნებეთ, რომ მოცემულ მომენტში, ბორდის წევრობის კანდიდატების 27 კაციანი სიიდან, მხოლოდ 6 ადამიანია შერჩეული. ესენია: სახალხო დამცველი – მარინა მუსხელიშვილი და ლელა გაფრინდაშვილი; აჭარის უმაღლესი საბჭო – გენო გელაძე; საპარლამენტო უმრავლესობა – ნათელა სახოკია საპარლამენტო უმცირესობა – ნინია კაკაბაძე და ქეთი მსხილაძე.
დეპუტატების თქმით, პარლამენტი დატვირთულ რეჟიმში მუშაობს და სწორედ ამიტომ არ ეყოთ დრო, კანდიდატები სრულად შეერჩიათ.
აღნიშნულ საკითხთან დაკავშირებით დღეს განცხადება გავრცელა კოალიციამ მედიის ადვოკატირებისათვის და დეპუტატების ქმედების გამო შეშფოთება გამოთქვა:
“სრულიად გაუგებარია, რატომ ვერ შეძლეს დეპუტატებმა შესაბამისი რაოდენობის კანდიდატთა შერჩევა წარდგენილი სიიდან. საპარლამენტო უმრავლესობის განცხადებები და ქმედება აჩენს საფუძვლიან ეჭვს, რომ ისინი დაინტერესებულნი არიან არა საზოგადოებრივი მაუწყებლის დეპოლიტიზაციით, არამედ მაუწყებელზე კონტროლის დამყარებით. არსებობს საფრთხე, რომ მმართველი ძალა ხელახალი კონკურსის გამოცხადებისა და ახალი საზოგადოებრივი კომისიის შექმნის გზით ეცდება, პოლიტიკური ნიშნით დააკომპლექტოს მაუწყებლის საბჭო”.
ორგანიზაცია მოუწოდებს დეპუტატებს, პატივი სცენ მათ მიერვე დამტკიცებული საზოგადოებრივი კომისიის შრომასა და არჩევანს, დადგნენ ვიწრო პარტიულ და პოლიტიკურ ინტერესებზე მაღლა და შეასრულონ კანონით დაკისრებული ვალდებულება – შეარჩიონ კანდიდატები წარდგენილი სიიდან.
“შევახსენებთ საქართველოს პარლამენტს, რომ ბოლო წლების განმავლობაში პირველად მოხერხდა საზოგადოებრივი მაუწყებლის სამეურვეო საბჭოს შესარჩევი კონკურსის კომპეტენტურად და გამჭვირვალედ ორგანიზება; პირველად გაჩნდა შესაძლებლობა, რომ მაუწყებლის სამეთვალყურეო საბჭო დაკომპლექტდეს პოლიტიკურად მიუკერძოებელი პროფესიონალებისაგან. მიგვაჩნია, რომ საზოგადოებრივი მაუწყებლობის რეფორმა არის დემოკრატიის უმნიშვნელოვანესი ტესტი საქართველოსთვის. ამ პროცესის ჩაშლით მმართველი ძალა არა მხოლოდ ეჭვქვეშ დააყენებს საკუთარ წინა საარჩევნო გზავნილს მედიის პოლიტიკური გავლენებისგან გათავისუფლების შესახებ, არამედ საფრთხეს უქმნის ქვეყნის დემოკრატიულ განვითარებას”.
ცნობისთის, მაუწყებლობის შესახებ კანონის 26–ე მუხლის მე–4 პუნქტი ამბობს, რომ იმ სუბიექტებს, რომელთაც ამ კანონის თანახმად უფლება აქვთ შეარჩიონ და წარადგინონ მათთვის სასურველი კანდიდატები, ანუ, როგორც სახალხო დამცველმა, ისე აჭარის უმაღლესმა საბჭომ, საპარლამენტო უმრავლესობამ და უმრავლესობის გარეთ დარჩენილმა დეპუტატებმა წარდგენილი სიიდან მათთვის სასურველი კანდიდატები ამოირჩიონ, რომელთა საერთო რაოდენობა უნდა იყოს ცხრა. ეს უნდა გააკეთონ საკონკურსო კომისიის მიერ სიის გამოცხადებიდან 3 დღის ვადაში, რაც 25 დეკემბერს ამოიწურა.
ამის საპასუხოდ, უმრავლესობის დეპუტატი თინა ხიდაშელი ამბობს:
“საკონკურსო კომისიის მიერ მეურვეობის კანდიდატთა შერჩევიდან არაუგვიანეს 3 კალენდარული დღისა ამ მუხლის პირველი პუნქტით განსაზღვრული სუბიექტები კანდიდატურებს წარუდგენენ საქართველოს პარლამენტს, სხვაგვარად განმარტავს: აქ არ არის ლაპარაკი იმაზე, რომ სამივე კანდიდატს წარუდგენენ, ან ნახევარს – იმდენს წარუდგენენ, რამდენიც იქნება. ამ წუთის მდგომარეობით კი უმრავლესობას ეს ერთი კანდიდატი ჰყავს”.
რაც შეეხება საპარლამენტო უმცირესობის განმრტებას, თუ რატომ ვერ მოხერხდება მათი მხრიდან სამეურვეო საბჭოს კანდიდატების სრულად შერჩევა, დეპუტატი სერგო რატიანი “გურია ნიუსთან” ამბობს, რომ ამის მიზეზი მათთვის მისაღები სხვა კანდიდატების დაბლოკვაა.
“ვთვლით, რომ ნინია კაკაბაძე და ქეთი მსხილაძე ის ადამიანები არიან, რომლებიც ქმედითები და მიუკერძოებლები არიან. ამასთანავე, აქვთ რეპუტაცია. მესამე კანდიდატის დასახელებისაგან ამ ეტაპზე თავი შევიკავეთ, თუმცა კონსულტაციები მიმდინარეობს”, _ განაცხადა რატიანმა.
აღსანიშნავია ის ფაქტი, რომ მაუწყებლობის შესახებ საქართველოს კანონის მიხედვით, პარლამენტმა მეურვეობის კანდიდატები საკონკურსო კომისიის მიერ მათი შერჩევიდან 10 სამუშაო დღის ვადაში უნდა დაამტკიცოს. თუ მეურვეობის კანდიდატმა ვერ მიიღო არჩევისათვის საკმარისი ხმები, საქართველოს სახალხო დამცველი, აჭარის ავტონომიური რესპუბლიკის უმაღლესი საბჭო, საპარლამენტო უმრავლესობა და საპარლამენტო უმრავლესობის გარეთ დარჩენილ პარლამენტის წევრთა არანაკლებ ერთი მეოთხედი, 10 კალენდარული დღის ვადაში წარუდგენენ საქართველოს პარლამენტს ახალ კანდიდატურებს.
თუ ვერც ერთმა კანდიდატმა ვერ მიიღო საქართველოს პარლამენტის სიითი შემადგენლობის არანაკლებ ერთი მესამედის ხმები და საზოგადოებრივი მაუწყებლის სამეურვეო საბჭო ვერ დაკომპლექტდა 9 წევრით, დარჩენილი ვაკანტური ადგილებისათვის იმართება ხელახალი კონკურსი.
გამოცხადდება თუ არა ახალი კონკურსი, ამაზე პასუხი არ აქვს უმრავლესობის დეპუტატ თინა ხიდაშელს და ამბობს, რომ მოვლენებს არ უნდა გავუსწროთ.
საზოგადოებრივი კომუნიკაციების სპეციალისტი არჩილ გამზარდია კი მიჩნევს, რომ გონივრული იქნება, თუ მოცემული მომენტისთვის ბორდის შერჩევა ვერ მოხდება და ახალი კონკურსი გამოცხადდება, ახალი შესარჩევი კომისიით.
“მოცემული მომენტისათვის, სასურველად მიმაჩნია, რომ ბორდის შერჩევა ვერ მოხდეს. გონივრული იქნება, თუ საზმაუს ბორდისათვის ახალი კონკურსი გამოცხადდება ახალი შესარჩევი კომისიით, სადაც მედიის სპეციალისტების გარდა, შესარჩევი კომისია დაკომპლექტდება ეიჩარის, მენეჯმენტის, საზოგადოებრივი ურთიერთობებისა და ორგანიზაციული მენეჯმენტის სპეციალისტებით. ჩემი რეკომენდაცია იქნებოდა, მათი შერჩევა მოხდეს კერძო სექტორიდან, რამდენადაც სპეციალისტების დონეზე აღნიშნული დარგის წარმომადგენლები ბევრად საქმიანი ადამიანები არიან და პოლიტიკური ან გავლენითი ინტრიგების ნაცვლად, დაინტერესებულები არიან დარგობრივი მიზნების რეალიზაციით”, _ ამბობს “გურია ნიუსთან” გამზარდია.
მისივე თქმით, საზოგადოებრივი მაუწყებლის ბორდის მოცემული მომენტისთვის ვერ დაკომპლექტება, შესაძლოა ლობისტურ ჯგუფებთან იყოს დაკავშირებული და სწორედ მათი ინტერესთა შეუთავსებლობით ფერხდებოდეს პროცესი.
“არსებობს მოსაზრება, რომ საზოგადოებრივ მაუწყებელზე გავლენის მოპოვებას რესპუბლიკური პარტია ცდილობს. სპეციალისტები ფიქრობენ კიდეც, რომ არასამთავრობო სივრცის მოცემული წარმომადგენლობა სწორედ რესპუბლიკურ პარტიასთან დაახლოვებული სივრცეა. ასევე, მათ ინტერესთა წარმომადგენლებად შეიძლება ნაგულისხმებ იქნეს ბორდის ამ მომენტისათვის შერჩეული ნაწილი.
მიმდინარე მოცემულობით კი არსებობს სერიოზული რისკი, რომ არ მივიღოთ კვლავ კორპორატიული ტელევიზია, როგორც ვარაუდია, რესპუბლიკური პარტიის ინტერესებით, კერძოდ კი, მათთან დაახლოებული არასამთავრობო ორგანიზაციების მმართველობით. საგულისხმოა, რომ მიმდინარე პროცესში აქტიურად მონაწილეობდა ეთიკის ქარტიის ძველი და ახალი შემადგენლობა და მათთან დაახლოებული მხარეები. ჟურნალისტური ეთიკის ქარტიის იმიჯი კი დღეს არც ისე სასურველია საიმისოდ, რომ მათი მონაწილეობა დიდი დოზით მიზანშეწონილი იყოს.
პირადად მე, მიმაჩნია, რომ ადამიანური რესურსების წარმოების პროცესი საზოგადოებრივი მაუწყებლის სამეურვეო საბჭოსათვის არ შეესაბამებოდა თანამედროვე სტანდარტებს და ის მოძველებული ხედვით, რამდენიმე ჟურნალისტისა და არასამთავრობოს წარმომადგენლით დაკომპლექტებულ შესარჩევ კომისიაში გამოიხატებოდა. ეს ძალიან პრიმიტიული ხედვაა თანამედროვე ორგანიზაციისათვის ადამიანური რესურსების მართვისა”, _ ამბობს “გურია ნიუსთან” სპეციალისტი.
