მიუხედავად იმისა, რომ კოალიციის შეკრებილი წევრები ამტკიცებდნენ, რომ მათი შეკრების მიზეზი ბორის ჭყონიას მხარდამჭერების მიერ ხელმოწერების შეგროვება არ იყო, თითქმის ყველამ სწორედ ამ საკითხის შესახებ ისაუბრა, გარდა გამგებლის მოვალეობის შემსრულებელ ზაზა ურუშაძისა, რომელიც ძალიან მოკლედ შეეხო ამ საკითხს და ძირითადად, მისი მოსვლის შემდეგ განხორციელებულ პროექტებსა თუ გაკეთებულ საქმეებზე ისაუბრა.
დასაწყისშივე საუბარი დაიწყო გამგებლის მოადგილე ვახტანგ ზენაიშვილმა და შესავალშივე ისევ ბორის ჭყონიას თემას შეეხო.
“გარიგებებს აქვს ადგილი, თუ რამე უნდათ საჯაროდ გამოვიდნენ და თქვან ყველაფერი, ასე ჩუმად საქმის კეთება არ შეიძლება. რა აქვთ მაგათ სათქმელი, რის ტაკიმასხარაობას აწყობენ, მაგათი გადასაწყვეტი არ არის ლანჩხუთში რაც მოხდება, მე რასაც ვამბობ, საჯაროდ ვამბობ, ასეთი ინტრიგები არ შეიძლება. 1 ოქტომბერს, როგორც ხალხმა გაიმარჯვა და გადაწყვიტა ყველაფერი, ასევე გადაწყდება გამგებლის ბედიც ხალხის მიერ. მიუხედავად დაპირისპირებისა, რომელიც საქმეს მოსდევს, მთავარ ღირებულებებში, არჩევანში, რომელიც თავის დროზე გავაკეთეთ, ერთიანნი ვართ. ჩვენ ძალით თავის აზრს ვერავინ მოგვახვევს. ბატონ თემურ ჩხაიძის სიტყვა ყოველთვის მისაღები იქნება ჩვენთვის, ის ამჯერად არ იმყოფება ლანჩხუთში, თუმცა, ცოტა ხანში მოგვეცემა საშუალება მისი პოზიცია მოვისმინოთ.”
ზენაიშვილის შემდეგ შეკრებილებს ზაზა ურუშაძემ მიმართა.
“ჩვენი მიზანი შეკრებისა არის ის, თუ რა საქმეები გაკეთდა ლანჩხუთში მას შემდეგ, რაც ჩვენ მოვედით: არასოდეს გადამიხვევია სწორი გზიდან. რა გეზიც ავიღე, მივყვები იმას. შეუშლელი ადამიანი არ არსებობს, დამოუკიდებლად გადაწყვეტილება არასდროს არ მიმიღია, ჩვენ ყოველთვის ერთმანეთს ვუთანხმებთ ჩვენს პოზიციას. რა შეეხება იმას, რომ ვიღაცას რაღაც უნდა, ყველას მიეცემა საშუალება ადგილობრივ არჩევნებში მიიღოს მონაწილეობა. მე, მაგალითად ვიტყვი, რომ გამგებელი, საკრებულოც და ქალაქის მერიც არჩევითი უნდა იყოს და ხალხმა გადაწყვიტოს. რაც დრო გადის, მით უფრო იოლია ლაპარაკი. როცა მე აქ ჩამოვედი, ალბათ, კარგად გახსოვთ რა ხდებოდა ლანჩხუთში, ვიცე პრემიერს რომ შევხვდი, მითხრა, იქნებ ამ რაიონს რამე ეშველოს. გახსოვთ, რომ კარვები იყო გაშლილი და ძალიან მძიმე მდგომარეობა იყო, მაგრამ ერთი რამ მინდა იცოდეთ, დღეს რაც ლანჩხუთში პროექტები ხორციელდება, კომუნისტების შემდეგ ასეთი რამ არ მომხდარა, ჩემი და ჩემი გუნდის დამსახურებაა”.
მაკა კვირკველიამ, რომელიც შეხვედრას ესწრებოდა, თქვა, რომ ის ფაქტი, რომ ბორის ჭყონიას გამგებლობა სურს, სულაც არაა ასეთი ყურადღების მისაქცევი და არ იმსახურებს ასეთ აჟიოტაჟს.
“ის, რომ მას სურს გამგებლობა, სულაც არ არის ასეთი ყურადღების გასამახვილებელი ფაქტი, რა საჭიროა ამხელა ამბის ატეხვა, როგორც უნდა ისე მოიქცეს.”
ამის შემდეგ უკვე პოზიცია შეცვალეს და განაცხადეს, რომ ჭყონიას თემა არ არის მხოლოდ აქ შეკრების მიზეზი, თუმცა, ვახტანგ ზენაიშვილი პირიქით მიიჩნევდა:
“თუ ასეთი უბრალო საქმეა, მაშინ რატომ აღმოჩნდა ეს თემა თითქმის ყველა გაზეთის პირველივე გვერდზე? სწორედ ამიტომაცაა ყურადღება მისაქცევი,” _ თქვა ზენაიშვილმა, რასაც გამგებლის მოვალეობის შემსრულებელი არ დაეთანხმა.
ურუშაძის თქმით, მსგავსი შეკრება გამეორებადი ხასიათის იქნება.
“ეს შეხვედრა ჩვენ საჯარო რომ არ გაგვეხადა, ჟურნალისტების მხრიდან მოჰყვებოდა ამ ფაქტს სხვანაირი რეაქცია, ჩუმად შეიკრიბნენ და ა.შ. ამიტომაც, ჩავთვალეთ მოგვეწყო კოალიციურ რეჟიმში შეხვედრა. ჩვენ იანვრის თვეში კიდევ ორჯერ შევიკრიბებით და ვიმსჯელებთ სხვადასხვა საკითხებზე, იმიტომ, რომ სულ მალე არჩევნებია და უნდა ვიყოთ ამისთვის მზად. რა შუაშია ხელმოწერების შეგროვება, ვისაც რა უნდა, ის აკეთოს”.
პარტია “რესპუბლიკელების” ადგილობრივი ორგანიზაციის ხელმძღვანელმა რომან ბიწაძემაც სწორედ ბორის ჭყონიას გააქტიურებას გაუსვა ხაზი და თავის სიტყვაში თქვა, რომ კოალიციასთან მას საერთოდ არ ჰქონია საუბარი ამ თემაზე.
ასევე ისაუბრა პარტია “დემოკრატიული საქართველოს” ადგილობრივი ორგანიზაციის ხელმძღვანელმა ელგუჯა ჩხაიძემაც.
“ჩვენი შეკრება დროულია, დალაგებული ურთიერთობები არ გვქონდა ფაქტია, ვაღიაროთ ეს ყველამ, ბორის ჭყონიას გამოჩენამ გამოგვაფხიზლა ყველა. საჭირო ყოფილა ამ ადამიანის გამოჩენა, სწორედ მისი დამსახურებით გამოვფხიზლდით. მეორე არის ის, რომ თურმე პრიორიტეტი ლანჩხუთისთვის ფეხბურთი ყოფილა, ეს ასე სულაც არ არის, პრიორიტეტი ფეხბურთი არასდროს არ იქნება, დღეს სულ სხვა სიტუაციაა, მთავარი არის ჯანმრთელობა, განათლება და ამას უნდა მიხედვა, ჩვენი მთავარი პრიორიტეტი სწორედ ეს არის. დავლაგდეთ და ერთმანეთის ინტერესები გავითვალისწინოთ,” _ განაცხადა ჩხაიძემ.
შეხვედრა თითქმის 2 საათს გაგრძელდა.
