“გურია ნიუსმა” საქართველოს მთავრობის წევრების 2013 წლის დეკლარაციებს გადაავლო თვალი, რომლებიც საჯარო სამსახურის ბიუროს ვებგვერდზე რამდენიმე დღის წინ განთავსდა. მინისტრების ერთ ნაწილს 2013 წლის ქონებრივი დეკლარაცია შევსებული აქვს, მეორე ნაწილი კი საკუთარი ქონების გასაჯაროებას არ ჩქარობს.
ყველაზე შთამბეჭდავად სასჯელაღსრულების მინისტრის, სოზარ სუბარის დეკლარაცია გამოიყურება. 2013 წელს მინისტრის უძრავი ქონებას ძვირადღირებული ბინა შეემატა. 2013 წელს სოზარ სუბარს 12 468.00 დოლარიანი ხელშეკრულება აქვს გაფორმებული ამხანაგობა “ისნის სავანესთან” ბინის მშენებლობაზე და წლევანდელი შენატანი 7 000 დოლარია; ამავე წელს საცხოვრებელი ბინის შესაძენად აიღო სესხი 140 000 დოლარის ოდენობით და შეიძინა 190 000 დოლარიანი ბინა ქ. თბილისში, სულხან ცინცაძის #49-ში, 187.9კვმ, რომლის 100 პროცენტი წილის მფლობელი მინისტრის მეუღლეა.
მინისტრის მეუღლე ფლობს აგრეთვე, 2500 კვმ მიწის ნაკვეთს და 180 კვმ ფართის სახლს დმანისში.
2013 წელს სოზარ სუბარმა გააჩუქა საკუთარი წილი თბილისში, ბოგდან ხმელნიცკის ქუჩაზე მდებარე საცხოვრებელ სახლში.
დეკლარაციის მიხედვით, 2013 წელს სასჯელაღსრულების მინისტრმა 11 389 ლარის შემოსავალი მიიღო.
საქართველოს რეგიონული განვითარებისა და ინფრასტრუქტურის მინისტრ ნარმანიას 2013 წელს უძრავი ქონება არ შეუძენია. უძრავი ქონების გრაფა უცვლელია იუსტიციის მინისტრ თეა წულუკიანის დეკლარაციაშიც.
შინაგან საქმეთა ყოფილი მინისტრის, ირაკლი ღარიბაშვილის 2013 წლის დეკლარაცია 2012 წლის დეკლარაციის იდენტურია, მინისტრს არ შეუძენია არც ბინა და არც ახალი მანქანა. თავდაცვის მინისტრ ირაკლი ალასანიას ამ დრომდე არ შეუვსია 2013 წლის დეკლარაცია.
ცვლილება არ არის საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრ დავით დარახველიძის ქონებრივ დეკლარაციაში.
გასულ წელს ფინანსთა მინისტრ ნოდარ ხადურს არც მოძრავი და არც უძრავი ქონება არ შეუძენია. ჯანდაცვის მინისტრ სერგეენკოს და ეკონომიკის მინისტრს კვირიკაშვილს ჯერჯერობით არ შეუვსიათ 2013 წლის ქონებრივი დეკლარაცია.
შერიგების და სამოქალაქო თანასწორობის მინისტრ პაატა ზაქარეიშვილის დეკლარაციაში ცვლილებები რძლის ანა მარტიაშვილის უძრავი ქონების ხარჯზე განხორციელდა. მინისტრის სახელზე ახალი შენაძენი არ დარეგისტრირებულა.
ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრ ალექსი პეტრიაშვილის 2012 და 2013 წლის დეკლარაციები თითქმის არ განსხვავდება ერთმანეთისაგან, რაც შეეხება სახელმწიფო მინისტრს დიასპორის საკითხებში, კონსტანტინე სურგულაძეს, მას 2013 წლის დეკლარაცია, ჯერჯერობით, არ შეუვსია.
წინა წლის დეკლარაციის მსგავსად კვლავაც ცარიელია სპორტის მინისტრის, ლევან ყიფიანის დეკლარაციის უძრავი ქონების გრაფა, განათლების მინისტრ თამარ სანიკიძეს და ენერგეტიკის მინისტრ კალაძეს 2013 წლის დეკლარაცია ამ დრომდე არ შეუვსიათ. ცვლილებები არ არის საგარეო საქმეთა მინისტრის მაია ფანჯიკიძისა და კულტურის მინისტრის, გურამ ოდიშარიას დეკლარაციებში.
შინაგან საქმეთა ახალი მინისტრის, ალექსანდრე ჭიკაიძის, ასევე, გარემოს დაცვისა და სოფლის მეურნეობის მინისტრების დეკლარაციები, სავარუდოდ, რამდენიმე დღეში გამოქვეყნდება.
