მას შემდეგ, რაც საყოველთაო ჯანდაცვის პირველი ეტაპი დაიწყო, ეს პრობლემა უკვე მოგვარებულია და ჯანმრთელობის მდგომარეობის უეცარი გაუარესების, ან უბედური შემთხვევისას უფულობის გამო ადამიანი აღარ კარგავს სიცოცხლეს.” _ განაცხადა ჯანდაცვისა და სოციალური დაცვის მინისტრმა დავით სერგეენკომ “გურია ნიუსთან” საუბრისას.
ჯანდაცვის სამინისტრო წლის ერთ-ერთ საუკეთესო სამინისტროდ სახელდება. რა იყო პოზიტიური გასული წლის განმავლობაში, რა _ არც ისე კარგი და რა დარჩა გამოწვევებად, ამის შესახებ “გურია ნიუსისთვის” მიცემულ ვრცელ ინტერვიუში დავით სერგეენკო საუბრობს.
დავით სერგეენკო: “თუ მიღწევებზე ვილაპარაკებთ, ეს მთავრობის წარმატება იყო და არა პირადად ჩემი და ასეთად მე შემიძლია დავასახელო საყოველთაო ჯანდაცვის პროგრამა. იმედი მაქვს, რომ ეს პროექტი კიდევ უფრო წარმატებული და მრავლის მომცველი იქნება. ყველაზე წარმატებულ რეფორმად სწორედ საყოველთაო ჯანდაცვას დავასახელებდი.
რაც შეეხება სოციალურ პროექტებს, რაოდენობრივ და თვისობრივ ანალიზს თუ გავაკეთებთ, ისევე როგორც ყველაფერში, ჯერჯერობით მხოლოდ რაოდენობრივი პროგრესის მიღწევა მოვახერხეთ, რაც გამოიხატა სოციალური გასაცემლებისა და პენსიების რაოდენობრივ ზრდაში. მიუხედავად იმისა, რომ სადღაც გაორმაგდა, სადღაც 50%-ით მოემატა, მაინც იმდენად მცირე რჩება დახმარება, რომ რა თქმა უნდა, ამაზე გაჩერება არ შეიძლება და კიდევ უფრო წინ უნდა წავიდეთ.
დავიწყეთ, მაგრამ საკმაოდ დიდი დრო ჭირდება სოციალურ სფეროში თვისობრივი რეფორმის განხორციელებას. აქცენტი არა მხოლოდ სოციალური დახმარებების ზრდაზე უნდა გავაკეთოთ, არამედ მივცეთ ამ ადამიანებს სამსახურის შოვნისა და თვითრეალიზაციის საშუალება, რათა თავად შეძლონ ღირსეულად ცხოვრება და ოჯახის რჩენა.
ამ მიმართულებით ძალიან მნიშვნელოვანია შრომის ბაზრის შესწავლა, რომლის სტრატეგიისა და სამოქმედო გეგმის მომზადებას დიდი დრო დაჭირდა და ახლახანს დაიწყო განხორციელება.
რაც შეეხება მესამე მიმართულებას, შრომას, აქ სამინისტროს ფუნქციაა გარკვეულ საკანონმდებლო აქტივობებში მონაწილეობა, რაც შესრულდა კიდეც და გვაქვს უკვე შრომის ახალი კოდექსი.
_ სად გქონდათ ხარვეზები და რა რჩება სამინისტროსთვის ჯერ კიდევ მოუგვარებელ პრობლემად?
_ ეს გახლავთ პირველ რიგში თვითონ სამინისტროს სტრუქტურის ძირეული რეფორმა. აქამდე ძირითადი ცვლილებები კეთდებოდა რაოდენობრივ ცვლილებებზე და მუშაობის ეფექტურობა, ორგანიზაციული ვერტიკალის გამართვა ჯერ არ დასრულებულა. ამ მხრივ, მე ვფიქრობ, რომ უფრო მეტის გაკეთება შეიძლებოდა.
_ საკადრო ცვლილებების განხორციელებასაც გულისხმობთ?
_ არა მარტო საკადრო ცვლილებების. საკადრო ცვლილებები ყოველთვის და ყველგან ხდებოდა. მე უფრო სტრატეგიულ ცვლილებებს ვგულისხმობ, ანუ სტრუქტურის შეცვლას ისე, რომ უპასუხოს ისეთ თანამედროვე გამოწვევებს, როგორიცაა: სამედიცინო ხარისხის კონტროლი, სამედიცინო სერვისების განფასების ახალი სისტემის შექმნა, სახელმწიფო პროგრამების ეფექტურობის შეფასება და საჭიროების შემთხვევაში მასში ცვლილების შეტანა. ეს დიდი მოცულობის სამუშაოა და შესაბამისი სტრუქტურის გადაწყობა ჯერჯერობით არ მოხერხდა.
_ თქვენი მინისტრობის პერიოდში მრავალწლიანი იდილია დაერღვათ სადაზღვევო კომპანიებს, რომლებიც წლების განმავლობაში სახელმწიფოს წინაშე ყოველგვარი ვალდებულებების გარეშე მოქმედებდნენ და ზოგიერთ მათგანს რამდენიმემილიონიანი დავალიანებაც კი აქვს. თქვენ საკმაოდ მკაცრი რეგულაციები განახორციელეთ მათი მისამართით. რა სირთულეების გადალახვა მოგიხდათ ამ რეფორმის განხორციელებისას?
_ ამ პროცესს, რა თქმა უნდა, უმტკივნეულოდ არ ჩაუვლია და ვერც ჩაივლიდა. ეს ჩვეულებრივი პროცესია. რა გვაქვს მოცემულობა და რატომ გვაქვს საერთოდ ურთიერთობა კერძო სადაზღვევო კომპანიებთან?
ჩვენი მიზანი არ არის სადაზღვევო ინდუსტრიის აქტივობის რაიმე სახით რეგულირება. ჩვენი ერთადერთი და უზენაესი ამოცანაა უზრუნველვყოთ საქართველოს მოქალაქეებისთვის ჯანმრთელობის დაცვის სერვისების უწყვეტობა და ხარისხი. სადაც ვხედავთ, რომ ამ მისიას საფრთხე ექმნება, რა თქმა უნდა, ვზრუნავთ ამის გამოსწორებაზე. იყო შემთხვევები, როცა კერძო სადაზღვევო კომპანიების მიერ ადმინისტრირებული, მართული სახელმწიფო ფულის გამოყენება ხდებოდა არაოპტიმალურად და ჩვენ ამაზე რეაგირებას ვაკეთებდით.
ჩვენ აქცენტს ვაკეთებთ რამდენიმე ფაქტორზე და ყოველთვის ბეწვის ხიდზე დავდივართ. ერთის მხრივ, კერძო სადაზღვევო ინდუსტრიასთან რაიმე სახის დაპირისპირება და მათი წონასწორობიდან გამოყვანა ყოველთვის იძლევა ჯაჭვურ რეაქციას და ეს რეაქცია ვრცელდება კერძო ბიზნესის სხვა ინდუსტრიებზეც, არა მარტო სადაზღვევოზე.
ამიტომ, გამოზომილი და ფრთხილი მიდგომაა საჭირო, თუმცა პირველი საზრუნავი ჩვენთვის ყოველთვის პაციენტია.
მეორე საკითხია ინვესტორებთან ურთიერთობა, რომელიც ასევე ძალიან მნიშვნელოვანია ქვეყნის ეკონომიკისთვის, მაგრამ როდესაც გადაკვეთს პაციენტის ინტერესებს, რა თქმა უნდა, ამაზეც მყისიერ რეაგირებას ვაკეთებთ. პაციენტის ინტერესებს ვერც სადაზღვევოებს გადავაყოლებთ და ვერც ინვესტორს ანუ, ჩვენ მოგვიხდა არსებული სტატუსის შეცვლა როგორც კერძო სადაზღვევო ინდუსტრიასთან, ასევე კერძო ინვესტორთან. დამერწმუნეთ, ეს არ იყო მარტივი თემა და სამართლებლის პირზე სიარული მოგვიხდა, თუმცა, მე ვფიქრობ, რომ აქამდე მოვახერხეთ ამის გაკეთება, გარკვეული შედეგები დავდეთ და უახლოესი ორი-სამი თვის განმავლობაში, ამ სტრატეგიის მიხედვით საბოლოოდ დალაგდება ქართული ჯანდაცვა იმ მიმართულებით, რაც გაცხადებული გვქონდა.
