ოზურგეთის მუნიციპალიტეტის ბიუჯეტიდან წელს პირველად, საგრანტო კონკურსის ფარგლებში სოციალურ-კულტურული პროექტები დაფინანსდა. ამ ნოვაციამ თავისი დადებითი შედეგები უკვე გამოიღო, რასაც ადასტურებს პროექტების ფარგლებში განხორციელებული ის აქტივობები, რომელიც ჩვენი საზოგადოებისათვის უკვე კარგად ცნობილია. ამჯერად ყურადღება გვინდა გავამახვილოთ, რბილად რომ ვთქვათ, იმ უზუსტობებზე, რაც გაზეთ “გურია ნიუსის” 18 ივლისის ნომერში გამოქვეყნებულ სტატიაშია. თავად სტატიის სათაურს “ოზურგეთის მუნიციპალიტეტის ბიუჯეტიდან, პროექტები კონკურსის გარეშე დაფინანსდა”, მკითხველი თავიდანვე შეცდომაში შეჰყავს. პუბლიკაციაში სათაურიდანვე არასწორადაა იტერპრეტირებული ფაქტები, რაც საკითხისადმი არაკომპეტენტურ მიდგომასთან ერთად, ადგილობრივი ხელისუფლების დისკრედიტაციისათვის გამიზნულ მცდელობად მიგვაჩნია. რაც შეეხება საგრანტო კონკურსს, კომისიაში განსახილველად შემოვიდა სულ 22 პროექტი, აქედან დაფინანსდა 9. ოზურგეთის მუნიციპალიტეტის საკრებულოს თავმჯდომარემ ბრიფინგზე დაასახელა ოთხი გამარჯვებული აპლიკანტი, ხოლო დანარჩენ ხუთს მიეცა რეკომენდაციები, რათა შესწორებით წარმოედინათ პროექტები. ბრიფინგის შემდეგ, 17 მაისს, გაიმართა საგრანტო-საკონკურსო კომისიის მორიგი სხდომა, სადაც კომისიის წევრებმა მიწანშეწონილად მივიჩნიეთ დაგვეფინანსებინა გამოცხადებული საგრანტო კონკურსის მეორე ეტაპის უკვე შესწორებული, ფორმატთან შესაბამისობაში მოყვანილი და დეტალურად გაწერილი პროექტები. ინფორმაციისათვის, საგრანტო-საკონკურსო პროგრამით გათვალისწინებული იყო 36900 ლარი. ვინაიდან გამარჯვებული პროექტების ბიუჯეტი აღემატებოდა გათვალისწინებულ თანხას, კომისიის თხოვნის შედეგად, პროგრამას დაემატა 11800 ლარი. ხასგასმით აღვნიშნავთ, რომ კონკურსის ჩატარებისათვის საჭირო პროცედურები წარიმართა შესაბამისი ნორმატიული აქტისა და საჯაროობის პრინციპის სრული დაცვით და რაც მთავარია, არცერთი პროექტი არ დაფინანსებულა კონკურსსგარეშე. საგრანტო-საკონკურსო კომისიის მუშაობის შესახებ დოკუმენტაცია, სადაც ყველა გადაწყვეტილება ასახულია, არა მხოლოდ მედიისთვის, არამედ ნებისმიერი დაინტერესებული პირისათვის ხელმისაწვდომია. ეს მნიშვნელოვანი, საყურადღებო დეტალია იმ პრესის წარმომადგენლებისათვის, რომლებთაც პრეტენზია აქვთ მკითხველს ობიექტური, ფაქტებზე დამყარებული ინფორმაცია მიაწოდონ. რასაც ვერ ვიტყვით აღნიშნულ პუბლიკაციაზე, რომელიც ზოგიერთი ოპოზიციურად განწყობილი პოლიტიკური პარტიის, ფუჭი, ხმამაღალი განცხადებების საბაბი გახდა.
ბიუჯეტის ზრდის შესაბამისად, აღნიშნული საგრანტო პროგრამების წარმატებით განხორციელების შემთხვევაში, შემოდგომაზე იგეგმება მეორე ეტაპი, სადაც მსურველებს შეეძლებათ წარმოადგინონ პროექტები, საიდანაც დაფინანსდება საუკეთესოები.
ირინე საჯაია, ლავრენტი ქვილორია, მარინა ჯაფარიძე, ლაშა თავაძე,
ოზურგეთის მუნიციპალიტეტის საკრებულოს საგრანტო-საკონკურსო კომისიის წევრები
რედაქციისგან: “მკითხველის შეცდომაში შეყვანა”, როგორც საპასუხო წერილის ავტორები წერენ, არც ისე ადვილია _ მკითხველს ფაქტებზე დაყრდნობილი ინფორმაცია მიეწოდა და ორივე პუბლიკაციის ყურადღებით წაკითხვისას, მას კარგად შეუძლია გაარჩიოს შეცდომაში შეყვანაც, არაკომპეტენტურობაც და ადგილობრივი ხელისუფლების დისკრედიტაციის მცდელობის შესახებ, 30-იანი წლებისთვის დამახასიათებელი, სრულიად უადგილო რიტორიკაც.
სტატიის მომზადების საფუძველი გახდა ოზურგეთის მუნიციპალიტეტის ოფიციალურ ვებგვერდზე 11 მაისს განთავსებული ინფორმაცია, რომლის თანახმადაც “საგრანტო კონკურსის 22 პრეტენდენტიდან, პირველ ეტაპზე, კომისიის მიერ ოთხი აპლიკანტის განაცხადი დაკმაყოფილდა”; გარდა ამისა, აქვეა აღნიშნული, რომ “ექვსი პროექტის ავტორს მიეცა რეკომენდაციები, რათა მოამზადონ პროექტების საბოლოო ვერსიები საგრანტო პროგრამის მეორე ეტაპში მონაწილეობისთვის”. გარდა საკრებულოს ვებგვერდზე განთავსებული ინფორმაციისა, გვაქვს ოზურგეთის მუნიციპალიტეტის საკრებულოს თავმჯდომარის მიერ, 11 მაისსვე გამართულ ბრიფინგზე გაკეთებული განცხადების აუდიო ჩანაწერი, რომელშიც საკრებულოს თავმჯდომარე, კონკურსის მეორე ეტაპის შემოდგომაზე გამართვის შესახებ საუბრობს. ვებგვერდზე განთავსებული ინფორმაცია და საკრებულოს თავმჯდომარის კომენტარი აბსოლუტურად იდენტურია. რედაქციაში ინახება, აგრეთვე, ყველა რესპონდენტის აუდიო ჩანაწერი. ამის მიუხედავად, კონკურსის პირველივე ეტაპზე, არა 4, არამედ 9 პროექტი დაფინანსდა. ამას თავად პასუხის ავტორები ადასტურებენ:
“ბრიფინგის შემდეგ, 17 მაისს(?!), გაიმართა საგრანტო-საკონკურსო კომისიის მორიგი სხდომა, სადაც კომისიის წევრებმა მიწანშეწონილად მივიჩნიეთ, დაგვეფინანსებინა გამოცხადებული საგრანტო კონკურსის მეორე ეტაპის უკვე შესწორებული, ფორმატთან შესაბამისობაში მოყვანილი და დეტალურად გაწერილი პროექტები. ინფორმაციისათვის, საგრანტო-საკონკურსო პროგრამით გათვალისწინებული იყო 36 900 ლარი. ვინაიდან გამარჯვებული პროექტების ბიუჯეტი აღემატებოდა გათვალისწინებულ თანხას, კომისიის თხოვნის შედეგად, პროგრამას დაემატა 11 800 ლარი”.
თავად ეს პასუხი, რამდენიმე ძალიან საინტერესო დეტალს შეიცავს, მათ შორის, ინფორმაციას პროგრამისთვის გამოყოფილი თანხების კორექტირების შესახებ, თუმცა, ამ ეტაპზე, დამატებითი კომენტარის გაკეთება მიზანშეუწონლად მიგვაჩნია; უბრალოდ, ჩვენ მიერ დაქირავებულ საჯარო მოხელეებს ვურჩევთ, განცხადებების გაკეთებამდე, მათსავე ვებგვერდზე განთავსებულ ინფორმაციას მაინც გაეცნონ.
