“ჩვენი შეფასებით, 2013 წელს მთავრობის მიერ გატარებული ეკონომიკური და საბიუჯეტო პოლიტიკა იყო მეტწილად მცდარი, რის გამოც ქვეყანამ მნიშვნელოვანი ზარალი ნახა. ჩვენი აზრით, ხელისუფლების მიერ შარშან დაშვებული 20 ყველაზე მნიშვნელოვანი შეცდომა იყო შემდეგი:
1. საგადასახადო კოდექსიდან იმ ჩანაწერების ამოღება, რომლებიც 2013 წლის პირველი იანვრიდან რამდენიმე გადასახადის (საშემოსავლო, დივიდენდი, როიალტი) შემცირებას გულისხმობდა;
2. შრომის ბაზარზე ახალი რეგულაციების შემოღება და ამ რეგულაციების შემოღებაზე რამდენიმე თვიანი დისკუსია საკანონმდებლო ორგანოში;
3. დისკუსიის წამოწყება, მათ შორის, პარლამენტში, აზარტული თამაშების აკრძალვის შესახებ;
4. სასოფლო–სამეურნეო მიწების სხვა ქვეყნის მოქალაქეებზე მიყიდვის აკრძალვა;
5. საბიუჯეტო შემოსავლების მობილიზების მიზნით, აქციზის განაკვეთის გაზრდა გარკვეულ პროდუქციაზე;
6. აღსრულებაზე მორატორიუმის გამოცხადების თაობაზე კანონპროექტის ინიცირება და საპარლამენტო დისკუსია;
7. ახალი ბიუროკრატიული სტრუქტურების შექმნა;
8. დისკუსია სახელმწიფო სადაზღვევო ფონდის შექმნის თაობაზე;
9. დისკუსია სახელმწიფო საპენსიო ფონდის შექმნის თაობაზე;
10. ეკონომიკური ხასიათის საერთაშორისო რეიტინგებში ქვეყნის წარმატებული პოზიციების პერმანენტული ნიველირება;
11. ქსენოფობიური განწყობების აგრესიულ გამოხატულებებზე სახელმწიფოს მხრიდან არაადეკვატური რეაქცია;
12. პოლიტიკური ოპონენტების დევნითა და შერჩევითი სამართლით ქვეყანაში არასტაბილური საინვესტიციო გარემოს შექმნა;
13. ყოფილი პრემიერ–მინისტრის, ბიძინა ივანიშვილის მიერ თანამდებობის დატოვების დაანონსება და შემდეგ თანამდებობის დატოვება;
14. ნაცვლად წინა წლებში, რიგ შემთხვევებში, დარღვეული საკუთრების უფლების აღდგენაზე რეალური ზრუნვისა, “სამართლიანობის აღდგენის“ ლოზუნგით ათასგვარ ოპორტუნისტში სახელმწიფოსგან რაიმეს გამორჩენის მიღების სურვილის გაღვივება;
15. გადახდილი დამატებითი ღირებულების გადასახადის დაბრუნების მოცულობის შემცირება;
16. უვიზო მიმოსვლის გაუქმება რიგ ქვეყნებთან;
17. გადასახადების აკრეფა, თანხების ხანიზაში მობილიზება, არ გახარჯვა და ფისკალური პროფიციტით ტრაბახი;
18. ინფრასტრუქტურული ხარჯების მკვეთრი შემცირება ან ხარჯვის ტემპის მკვეთრი შენელება;
19. ეკონომიკის გაჯანსაღების ისეთი არარეალისტური გზების არჩევა, როგორებიცაა: “რუსეთის ბაზრის გახსნა გვიშველის“, “ძლიერი სოფელი გააძლიერებს ქალაქს“ და “კაიმანის კუნძულებზე დარეგისტრირებული ფონდიდან შემოვა 10 მილიარდი დოლარი“;
20. თვეების განმავლობაში ეკონომიკური და საბიუჯეტო პრობლემების არ აღიარება, ხოლო შემდეგ, ნაცვლად რეალური მიზეზების გარკვევისა, ყველაფრის წინა ხელისუფლებაზე გადაბრალება;
2013 წელს ხელისუფლების მიერ ევროკავშირთან ასოცირების ხელშეკრულების პარაფირება, რომლის ნაწილიც არის ღრმა და ყოვლისმომცველი თავისუფალი ვაჭრობის შეთანხმება, უდავოდ იყო ყველაზე მნიშვნელოვანი და სამწუხაროდ ერთადერთი სწორი ნაბიჯი გადადგმული ეკონომიკის გაჯანსაღებისკენ.
შედეგად:
2013 წელს:
• ეკონომიკის ზრდა შემცირდა 3–ჯერ
• გაიხარჯა ბიუჯეტში არსებული უსაფრთხოების ბალიში – 1 მილიარდამდე ლარი
• დაიკარგა დაახლოებით 1.5 მილიარდი ლარი მთლიანი შიდა პროდუქტის სახით.
• დაიკარგა დაახლოებით 1 მილიარდი ლარი ბიუჯეტში
2014 წელს:
• გვიწევს 1.6 მილიარდი ახალი ვალის აღება
• საერთო ჯამში ქვეყნის ვალდებულებები იზრდება 800 მილიონით
• საბიუჯეტო დეფიციტი იზრდება 4%–მდე
• ვიღებთ 600 მილიონ ლარს შიდა ვალს
• პირველად უკანასკნელ წლებში არ იზრდება პენსიები
ასევე გვსურს გამოვეხმაუროთ პრემიერის მიერ გუშინ და დღეს გაკეთებულ რამდენიმე განცხადებას, რომლებიც, არ შეესაბამებოდა სიმართლეს და მიზნად ისახავდა საზოგადოების შეცდომაში შეყვანას.
კერძოდ, პრემიერმა განაცხადა, რომ მის ხელისუფლებას დახვდა იმპორტზე ორიენტირებული ეკონომიკა და მოსახლეობის 54% დასაქმებული აგრარულ სექტორში. გვსურს შევახსენოთ ბ-ნ პრემიერს, რომ ის რომ საქართველოს მოსახლეობის ნახევარზე მეტი ცხოვრობს არაურბანულ დასახლებებში, წარმოადგენს უმძიმეს საბჭოთა მემკვიდრეობას, რომლის გამოსწორებასაც კიდევ ბევრი წელი დასჭირდება, და არა ნაციონალური მოძრაობის დანატოვარს. მეტიც, ქართული ოცნების მიერ გატარებული პოლიტიკა ამ მიმართულებით, კიდევ უფრო აღრმავებს ამ პრობლემას და დროში ახანგძლივებს მის მოგვარებას. რაც შეეხება იმპორტზე ორიენტირებას, საქართველოს ეკონომიკა უკანასკნელ წლებში იყო და დღესაც, ჯერ კიდევ, არის თავისუფალი. ის არ ყოფილა და ვერ იქნებოდა იმპორტზე ორიენტირებული, რადგან ასეთი ორიენტაცია თავისთავად აბსურდულია. მეტიც, თუ ხელისუფლება გააგრძელებს ასეთ ჰიპოტეთურ ორიენტაციასთან ბრძოლას ე.წ. ‘ექსპორტის წახალისებით’, ეს მხოლოდ ნეგატიურ შედეგებამდე მიიყვანს ქვეყნის ეკონომიკას.
პრემიერმა ასევე განაცხადა, რომ ნაციონალურმა მოძრაობამ გაანადგურა ქვეყნის ეკონომიკა. გვსურს შევახსენოთ ბ–ნ პრემიერ, რომ 2004–2012 წლებში, როდესაც ნაციონალური მოძრაობა იყო ხელისუფლებაში, ქვეყნის ეკონომიკის ზრდა საშუალოდ შეადგენდა 6–7%–ს მიუხედავად იმისა, რომ ამ პერიოდში მოხდა ქართული სახელმწიფოს იურისდიქციის აღდგენა აჭარის რეგიონზე, რუსეთის მხრიდან განხორციელდა ჯერ ენერგო, სავაჭრო და სატრანსპორტო ემბარგო, ხოლო შემდეგ სამხედრო აგრესია ჩვენი ქვეყნის წინააღმდეგ, ხოლო 2007 წლის მეორე ნახევრიდან მსოფლიოში დაიწყო ფინანსურ–ეკონომიკური კრიზისი. ქართული ოცნების ხელისუფლებისგან წინა წლების ეკონომიკური პოლიტიკის კრიტიკას მხოლოდ მაშინ ჩავთვლით ლეგიტიმურად როდესაც ეს ხელისუფლება ეკონომიკური ზრდის იმ ტემპის მინიმუმ ნახევარს მაინც მიაღწევს, რაც წინა წლებში იყო (თუნდაც მშვიდობიან და რუსეთთან “დამთბარი“ ურთიერთობების პირობებში).
პრემიერმა ასევე მიუთითა ხელისუფლების 2013 წლის რამდენიმე მიღწევაზე, რომლებსაც ასევე გვსურს გამოვეხმაუროთ:
გაუმჯობესებული სავაჭრო ბალანსი – ეს ინდიკატორი, მიუხედავად იმისა, რომ ბევრი ეკონომისტისა და პროტექციონისტი მთავრობის საყვარელ ინდიკატორს წარმოადგენს, არის შინაარსისგან დაცლილი. ხელისუფლების მხრიდამ ამ ინდიკატორზე აპელირება უადგულოა, რადგან მისი ‘გაუმჯობესება’ მოხდა იმპორტის მკვეთრი კლების ხარჯზე, რაც აჩვენებს რომ ქვეყნის მოსახლეობის მსყიდველუნარიანობა გაუარესდა წინა წელთან შედარებით.
შექმნილი თანაინვესტირების ფონდი – ეს ფონდი არის კერძო ფონდი, რომლის მსგავსიც უამრავი არსებობს მსოფლიოში. რატომ არის ამ ფონდის შექმნა ამ ხელისუფლების დამსახურება, გაუგებარია. თუმცა, მთავარი ამ შემთხვევაში არის ის რომ არანაირი 6 მილიარდი დოლარი (თავიდან 10 მილიარდი იყო) ამ ფონდში არ არსებობს.
ბიზნესის ხელშეწყობისთვის ახალი სახელმწიფო სტრუქტურის შექმნა – ბიზნესის ხელშეწყობას არ სჭირდება ახალი სახელმწიფო სტრუქტურები. პირიქით, რაც უფრო ნაკლები სახელმწიფო სტრუქტურები იქნება, მით უფრო თავისუფალი იქნება ბიზნესი და მიმზიდველი იქნება ეკონომიკური გარემო. ამიტომ, ამ ახალი სტრუქტურისთვის გამოყოფილი საბიუჯეტო სახსრები იქნება უბრალოდ წყალში გადაყრილი ფული.
რაც შეეხება ბიზნესის თავისუფლების შემაფასებელ რეიტინგებში პოზიციების გაუმჯობესებას, ტურისტების რაოდენობის ზრდას და ევროკავშირთან ასოცირების ხელშეკრულების პარაფირებას – ეს არის წინა ხელისუფლების მიერ გატარებული სწორი რეფორმების/ნაბიჯების კონკრეტული შედეგები. შესაბამისად ამ მიღწევის საკუთარი მთავრობის აქტივში ჩათვლა არ არის ღირსეული საქციელი,” _ ნათქვამია “ნაციონალური მოძრაობის” განცხადებაში.
