თუმცა, მოგვიანებით ეს საკითხი სხვანაირად განმარტა და აღნიშნა, რომ გამგებლების მოხსნა_დანიშვნა მის კომპეტენციაში არ შედის.
მის კომპეტენციაში არც ლანჩხუთის საფეხბურთო კლუბ “გურიას” საკადრო პოლიტიკა შედის, თუმცა, გასულ დღეებში ამ საკითხზე ერთგვარი თავის მართლებაც კი მოუხდა.
გიორგი ჩხაიძესთან “გურია ნიუსმა” ვრცელი ინტერვიუ ჩაწერა და იმ დეტალების გარკვევას შეეცადა, რომელიც ამ დრომდე უცნობია და რომელიც საზოგადოებას აინტერესებს.
დღევანდელ ნომერში მხარის პირველ პირთან ჩაწერილ ბლიც_ინტერვიუს შემოგთავაზებთ. მომდევნო ნომერში კი გაიგებთ, რასთან დაკავშირებით “დაიბანა ხელები”, რა ანგარიშები აქვს ძველ ხელისუფლებასთან და გაიგო თუ არა პოლიტიკის ანბანი ბიზნესიდან მოსულმა გუბერნატორმა.
_ მე, გურიის გუბერნატორი გიორგი ჩხაიძე ვარ ერთი ჩვეულებრივი, თავისი ქვეყნისა და საქმის ერთგული, ტრადიციულ ქართულ ოჯახში გაზრდილი კაცი, რომელიც ცდილობს ასეთივე ტრადიციებით, ღმერთისა და მოყვასის სიყვარულით გაზარდოს თავისი სამი შვილი.
_ არის თუ არა თქვენი პირველ პოლიტიკურ შეცდომა ლანჩხუთის “გურიასთვის” მწვრთნელად საკუთარი კანდიდატურის შეთავაზება და ხომ არ არის ეს თქვენი მხრიდან უფლებამოსილების გადამეტება?
_ შეცდომას ვერ დავარქმევთ იმას, რაც ბუნებაში საერთოდ არ მომხდარა. ჩემი “ჩართულობა” მაგ საკითხში ბევრი გარემოებით იყო განპირობებული. გარდა იმისა, რომ ლანჩხუთელი კაცი ვარ და ლაჩხუთის “გურია” ზოგადად მტკივნეული თემაა ჩემთვის, თავად გამგებელმა რამდენჯერმე მთხოვა კლუბის დღევანდელი პრობლემებით დავინტერესებულიყავი. მე შევხვდი ყველას ერთად _ ადგილობრივ ხელისუფლებასა და კლუბის მესვეურთ და ჩემი მოსაზრება გავაცანი. ვფიქრობ, აბსოლუტურად სწორი ხედვა მქონდა: მოდით, ერთად ვიფიქროთ კლუბის წინაშე დაგროვილი პრობლემების დაძლევაზე, იქნება ეს ფინანსური, მენეჯმენტის თუ შიდა კლუბური. დამეთანხმეთ, რომ ყველა ეს პრობლემა აწუხებს დღეს ამ გუნდს. მე მათ ვუთხარი _ მივცეთ ადამიანებს შანსი, წარმოგვიდგინონ თავიანთი ხედვები გუნდის კრიზისიდან თავდასაღწევად, ვინც უკეთეს, რეალობასთან შესაბამისობაში მოსულ გეგმას დადებს, იმის კანდიდატურაზე შემდგომში ვიმსჯელოთ,_მეთქი. ეს იყო ჩემი მოსაზრება და ასე ვფიქრობ დღესაც, თუმცა, ამ შეხვედრიდან მეორე დღესვე სულ სხვა ინტერპრეტაციები და სხვა გადაწყვეტილებები წამოვიდა ლანჩხუთიდან. მე პატივს ვცემ ამ გადაწყვეტილებას და ამავდროულად, ვიტოვებ უფლებას, საჯაროდ დავაფიქსირო ჩემი პოზიციაც: ამიერიდან გუნდთან ჩემი დამოკიდებულება მოექცევა მხოლოდ იმ ფარგლებში, რასაც, ზოგადად, გუბერნატორისა და საფეხბურთო კლუბის ურთიერთობა ითვალისწინებს _ ეს გახლავთ პროცესების მონიტორინგი. სხვა ყველა პასუხისმგებლობას კლუბისა და მუნიციპალიტეტის ხელმძღვანელები აიღებენ საკუთარ თავზე. ეს თემა რომ საბოლოოდ ამოვწუროთ, მაგ კონკრეტულ შემთხვევაში მე არა თუ არ გადამიმეტებია ჩემი უფლებამოსილებისთვის, არამედ კანონით დაშვებულიც კი არ გამომიყენებია. თუმცა, ვიმეორებ, მომავალში, კლუბთან მიმართებაში ამ უფლებამოსილებას აუცილებლად გამოვიყენებ.
_ ჩვენი წყარო ამტკიცებს, რომ ლანჩხუთის გამგებელი არ მოგწონთ და მისი შემცვლელი უკვე მოძებნილი გყავთ…
_ ეს არასწორი ინფორმაციაა. მე ზოგადად წინააღმდეგი ვარ ასეთი მოდგომის _ “არ მომწონს გამგებელი”. როგორ შეიძლება ასეთ მოკლე ვადაში მომეწონოს ან არ მომეწონოს მუნიციპალიტეტის პირველი პირი? ზერელე დამოკიდებულება საერთოდ არ მჩვევია, მით უმეტეს, ასეთ შემთხვევაში. ჩემი მხრიდან მოწონება_არ მოწონება უამრავი არგუმენტითა და ფაქტით უნდა იყოს გამყარებული და რაც მთავარია, ესა თუ ის დაქირავებული მოხელე, მათ შორის გამგებელი, აპრიორში არა გუბერნატორს, არამედ ხალხს უნდა მოსწონდეს.
_ ერთ თვეზე მეტია, გუბერნატორი ხართ და მხოლოდ ერთი მოადგილის დანიშვნა მოახერხეთ…
_ ვფიქრობ, ეს ასე “ძნელად მოსახერხებელი” საკითხი არაა. მე არ ვარ შეზღუდული დროში და არც საქვეყნო საქმე ზიანდება. შესაბამისად, როცა ჩამოვყალიბდები, გადაწყვეტილებასაც მაშინ მივიღებ.
_ გულწრფელად გვითხარით, მამუკა დოლიძის კანდიდატურა მოადგილის პოსტზე ვინ შემოგთავაზათ და ზოგადად რას და ვის ეყრდნობით კადრების შერჩევისას?
_ ამ თემაზე არა ერთხელ მომიწია კომენტარის გაკეთება. ეს კი, მამუკა დოლიძესთან მიმართებაში, რომელსაც საერთოდ არც კი ვიცნობ, ვფიქრობ, მინიმუმ, უხერხულია. გუბერნატორის მოადგილეობაზე ძალიან ბევრი ადამიანის კანდიდატურა განიხილებოდა. მე პირადად, ასეთი ადამიანის მონაცემები, აღარაფერს ვიტყვი მასთან უშუალო გასაუბრებაზე, ამ პროცესში არ შემხვედრია. თუმცა, არ გამოვრიცხავ, ეს კონკრეტული ადამიანის ან ადამიანთა ჯგუფის სურვილი იყო და ამაში უცნაური არაფერია.
_ წესით, ამ დროში საკუთარი აზრი უნდა შეგქმნოდათ გამგებლებზე… დანიშვნის დღეს გვითხარით, მოვიკითხავ, ხალხის აზრს გავიგებ და რეკომენდაციებს შესაბამისად გავწევო… რა გაიგეთ ხალხისგან თამაზ ჯინჭარაძეზე, კონსტანტინე შარაშენიძეზე, ზაზა ურუშაძეზე…
_ როგორ წარმოგიდგენიათ, ერთ თვეში სრულად შევიქმნა წარმოდგენა იმ ადამიანებზე, რომლებიც ამდენი ხანია, შეძლებისდაგვარად მართავენ მუნიციპალიტეტებს, ეწევიან მრავალმხრივ და უზარმაზარ სამუშაოს? ეს არასერიოზულობა და უპასუხისმგებლობა იქნებოდა ჩემი მხრიდან როგორც საზოგადოების, ისე ცენტრალური ხელისუფლების წინაშე.
ასე რომ, არსებობს ასეთი გამოთქმა: იჩქარე ნელა! ამ შემთხვევაში ეს ყველაზე სწორი გზაა. ისე კი, ზედმეტად ცნობისმოყვარეთათვის დავძენ, რომ მეტნაკლებად, უკვე ყველა მათგანზე გამაჩნია გარკვეული მოსაზრებები, შეფასებები და არ მგონია, ამ შეფასებებში ვცდებოდე.
