როგორც გვიჩიანის ადვოკატების მიერ გავრცელებულ განცხადებაშია ნათქვამი, მთავარი პროკურატურის პრესსამსახურის მიერ 17 იანვარს, გაკეთდა განცხადება, რომლის თანახმად, გიორგი გვიჩიანის ადვოკატები, ეწევიან რა მიზანმიმართულ კამპანიას, ავრცელებენ მცდარ ინფორმაციებს და მიზნად ისახავენ ირაკლი შოთაძის და პროკურატურის ინსტიტუტის დისკრედიტაციას.
“კიდევ ერთხელ ვადასტურებთ ჩვენს პოზიციას, რომ დაუშვებლად მიგვაჩნია მთავარი პროკურორის პოსტზე ირაკლი შოთაძის დანიშვნა, რადგან ეს არამარტო პროკურატურის, არამედ მთლიანად ხელისუფლების დისკრედიტაციას მოახდენს, შემდეგ გარემოებათა გამო:
1. როგორც ცნობილია, ბატონმა შოთაძემ თავისი მოღვაწეობა პროკურატურაში ზურაბ ადეიშვილის დროს დაიწყო და საზოგადოების უდიდესი ნაწილისთვის იგი სწორედ ადეიშვილის პროკურატურის სახეს წარმოადგენს. პროკურატურა “ნაციონალური მოძრაობის” მმართველობის ხანაში, პრაქტიკულად ქცეული იყო დაწესებულებად, რომელიც ეწეოდა საქართველოს მოსახლეობის დატერორება-დაშანტაჟებას, რაშიც ბატონ შოთაძეს თავის წვლილი აქვს შეტანილი. სამწუხაროდ, არავითარი ზედმეტი ძალისხმევა არ არის საჭირო ისედაც დისკრედიტირებული პროკურატურის დამატებითი დისკრედიტაციისათვის. საქმე იქამდეა მისული, რომ დაბრკოლებადაა ქცეული პროკურატურის კადრებში ისეთი ღირსეული და გაუსვრელი ადამიანის მოძებნა, რომლის წარდგენაც შესაძლებელი იქნებოდა საქართველოს მთავარ პროკურორად.
2. ხელისუფლების დისკრედიტაციას გამოიწვევს ის ფაქტი, თუ მთავარი პროკურორის პოსტზე დაინიშნება ადამიანი, რომელმაც მიზანმიმართულად შეცდომაში შეიყვანა, მოატყუა, პრემიერ-მინისტრი, მიაწოდა რა ინფორმაცია, თითქოსდა გიორგი გვიჩიანის საქმეზე იგი მონაწილეობდა როგორც სტაჟიორი და შესაბამისად არავითარი პასუხისმგებლობა არ ეკისრება აღნიშნულ საქმეზე. თვით პროკურატურის განცხადებაში აღნიშნულია, რომ სააპელაციო ინსტანციაში ბატონი შოთაძე უკვე მუშაობდა დიდუბე-ჩუღურეთის რაიონში პროკურორად. აღნიშნული განცხადებით პროკურატურა თავისდაუნებურად ცალსახად ადასტურებს ჩვენს პოზიციას, რომ პრემიერ მინისტრი მიზანმიმართულად შეცდომაში იქნა შეყვანილი.
3. პრემიერ მინისტრის წინაშე მთავარი პროკურორის კანდიდატურის წარდგენას ახდენს იუსტიციის მინისტრი. საქართველოს იუსტიციის მინისტრს, თეა წულუკიანს არაერთი საჯარო განცხადება აქვს გაკეთებული გიორგი გვიჩიანის უდანაშაულობასთან დაკავშირებით. თუ იგი წარადგენს შოთაძის კანდიდატურას, რომელიც როგორც პროკურორი, თანაავტორი და მონაწილეა ყალბ მტკიცებულებებზე აგებული, შეთითხნილი, დაუსაბუთებელი და უკანონო ბრალდებისა, ეს იქნება სრულიად ალოგიკური და მაშინ იუსტიციის მინისტრმა უნდა განმარტოს, შეიცვალა თუ არა პოზიცია გიორგი გვიჩიანის უდანაშაულობასთან მიმართებაში.
4. საზოგადოების უდიდესი ნაწილი პრაქტიკულად უკვე ინფორმირებულია იმ ე.წ. მტკიცებულებების შესახებ, რომლებზე დაყრდნობითაც გიორგი გვიჩიანს და ნიკა ჩემიას უკანონოდ აქვთ მისჯილი უვადო თავისუფლების აღკვეთა. საზოგადოების თვალში ბატონი შოთაძე იქნება მთავარი პროკურორი, რომელსაც ეყოლება პირადი უკანონო პატიმრები, რაც ასევე ხელისუფლების დისკრედიტაციის საფუძველი გახდება.
5. როგორც ცნობილია, საქართველოს მთავარ პროკურატურაში, დაწყებულია გამოძიება სამსახურებრივი უფლებამოსილების ბოროტად გამოყენების მუხლით, რათა დადგინდეს, თუ რატომ არ დაერთო სისხლის სამართლის საქმეს, 2006 წლის 4 აპრილს, საქართველოს მთავარ პროკურატურაში, აშშ-ის გამოძიების ფედერალური ბიუროდან შესული, 31 მარტით დათარიღებული და პროკურატურაში გაურკვეველ დროს შესული, 2006 წლის 7 სექტემბრით დათარიღებული, ექსპერტიზის დასკვნები. პროკურატურის განცხადებაში, გაყალბებულადაა წარმოდგენილი ადვოკატების პოზიცია, თითქოსდა ჩვენ ბრალს ვდებთ ბატონ შოთაძეს, რომ მან დამალა დასკვნები. ჩვენ ყოველთვის ხაზს ვუსვამთ, რომ უდანაშაულობის პრეზუმპციიდან გამომდინარე, კონკრეტულად ბრალს ვერავის ვერ დავდებთ, მაგრამ არსებობს დიდი ალბათობა, რომ ბატონ შოთაძეს შემხებლობა ჰქონდეს აღნიშნულ დანაშაულთან. თეორიულად იმასაც არ გამოვრიცხავთ, რომ ობიექტური გამოძიების პირობებში იგი სხვა პირებთან ერთად, შეიძლება ბრალდებულადაც მოგვევლინოს. მისი მთავარ პროკურორად დანიშვნა ამთავითვე ყოველგვარ პერსპექტივას უსპობს მოცემული საქმის ობიექტურად გამოძიებას და საზოგადოებასაც სრული უნდობლობით განაწყობს მისი შედეგებისადმი.
6. პროკურატურის განცხადებით, ჩვენ დაგვბრალდა, თითქოს მიზანმიმართულად ვეწევით ბატონი შოთაძის პიროვნების დისკრედიტაციას. ჩვენ, რომ ეს მიზანი გვქონოდა გამოვაქვეყნებდით იმ საბრალდებო სიტყვის შინაარს, რომელზეც სააპელაციო ინსტანციაში იგი ხელს აწერს, როგორც პროკურორი და არა როგორც სტაჟიორი. საბრალდებო სიტყვის შინაარსი წარმოადგენს საუკეთესო საშუალებას ბატონი შოთაძის დისკრედიტაციისათვის, იმდენად აბსურდული და დაუსაბუთებელია იგი. რაც შეეხება “მიზანმიმართულ კამპანიას” ამას ვეწევით არა ჩვენ, არამედ თვითონ ბატონი შოთაძე, რის მაგალითსაც წარმოადგენს არა მარტო პროკურატურის ზემოაღნიშნული განცხადება, არამედ ბოლო დღეებში სხვადასხვა გაზეთებში, სხვადასხვა ავტორების სახელით, თითქოსდა “ინკოგნიტო” წყაროზე დაყრდნობით, გამოქვეყნებული, აბსოლუტურად იდენტური შინაარსის მქონე ტექსტები, რომელთა თანახმად, თითქოსდა ყოფილი მთავარი პროკურორი არჩილ კბილაშვილი, გიორგი გვიჩიანის ადვოკატების მიერ, ჩათრეული იქნა სიბინძურეში. შეუძლებელია სხვადასხვა ჟურნალისტებს დამოუკიდებლად დაეწერათ აბსოლუტურად იდენტური სტატიები. ცხადია ამ ყველაფრის უკან დგას ერთი ავტორი. ეს სტატიები, რომ მხოლოდ ბინძური ცილისწამებაა, ადასტურებს ის გარემოება, რომ ახლადგამოვლენილ გარემოებათა გამო საქმის გადახედვის გადაწყვეტილება მიიღო არა არჩილ კბილაშვილმა, არამედ სააპელაციო სასამართლომ.
ჩვენს მიერ დასახელებული იქნა ექვსი მიზეზი, თუ რატომ არ უნდა დაინიშნოს ბატონი შოთაძე მთავარ პროკურორად. ჩვენთვის როგორც ადვოკატებისთვის, მნიშვნელოვანია ის გარემოება, რომ იგი თითქმის სამი თვეა მუშაობს მთავარი პროკურორის პირველ მოადგილედ და ჯერ არ გამოუხატავს პოზიცია გიორგი გვიჩიანის და ნიკა ჩემიას ბრალდების ირგვლივ. საინტერესოა რა პოზიცია უჭირავს მას ამჟამად, ისევ მხარს უჭერს თუ არა იმ შეთითხნილ ბრალდებას, რომლის საფუძველზეც ორ უდანაშაულო ადამიანს მისჯილი აქვს უვადო თავისუფლების აღკვეთა. თუ იგი დარწმუნებულია ბრალდების ობიექტურობაში, ჩვენ ვიწვევთ მას დებატებში პირდაპირ ეთერში, რათა საჯაროდ გასცეს პასუხი საზოგადოებისათვის საინტერესო კითხვებს”, _ ნათქვამია ადვოკატების განცხადებაში.
