რუსეთის მთავარი დიპლომატის განცხადებას გუშინვე გამოეხმაურა შერიგებისა და სამოქალაქო თანასწორობის საკითხებში სახელმწიფო მინისტრი პაატა ზაქარეიშვილი და ლავროვს საკმაოდ “მკაცრი” განცხადებით უპასუხა:
“რაც შეეხება ახალ რეალობებს, ის მართლა არსებობს. ახალი რეალობა არის ის, რომ რუსეთი ვეღარ იქნება სამშვიდობო პროცესში ჩართული, ვერ იქნება მესამე ძალა, როგორც იყო ადრე. რუსეთი არის აგრესორი ძალა, ოკუპანტი მხარე და შესაბამისად, რეალობა შეიცვალა. საქართველო მკაფიოდ და ცალსახად, უკანმოუხედავად მიდის ნატო-სკენ, ევროპული ინსტიტუტებისკენ, შესაბამისად, ლავროვს და რუსეთს ამისთვის თვალის გასწორება მოუწევთ და ეს არის ახალი რეალობა, რომელსაც საქართველო შექმნის კავკასიაში. ვიდრე რუსეთი უკან არ წაიღებს აღიარებას და, შესაბამისად, ამ წარმომადგენლობებს, ბუნებრივია, საქართველო-რუსეთს შორის ვერ აღდგება დიპლომატიური ურთიერთობა. ყველა სხვა მიმართულებით ჩვენ მზად ვართ თანამშრომლობისთვის, სადაც ხელს არ შეგვიშლის დიპლომატიური ურთიერთობა,” _ აღნიშნა ზაქარეიშვილმა.
პოლიტოლოგი კორნელი კაკაჩია მიიჩნევს, რომ მინისტრის მიერ მისთვის ნაკლებდამახასიათებელი “მკაცრი” პასუხის მიზეზი გაცხარება იყო.
“ფაქტია, რომ რუსეთის პოლიტიკა ისეთივე ხისტია, როგორც იყო. ვფიქრობ, ამ შემთხვევაში ზაქარეიშვილი ძალიან გაცხარდა, როდესაც მან ლავროვის საპასუხო განცხადებაში ის სიტყვები (ოკუპანტი, აგრესორი და ა.შ.) გამოიყენა, რომელთაც სხვა დროს, როგორც წესი, არ ხმარობს ხოლმე. რეალურად, ლავროვის განცხადება იყო პასუხი ზაქარეიშვილისა და საქართველოს მთავრობის იმ რიტორიკასა და მოლოდინზე, რომ ნორმალიზაციის მეშვეობით რუსეთის “მოთაფვლა” შეიძლება. ლავროვმა ფაქტობრივად, ცივი წყალი გადაგვასხა და თქვა, რომ ეს არ გამოვა,” _ აღნიშნავს პოლიტოლოგი.
მისივე თქმით, ფაქტია, რომ დღეს რუსეთის პოზიცია შეუქცევადია და თუ ეს გაგრძელდა, ქართულ დიპლომატიას მოუწევს გადახედოს თავის დამოკიდებულებას, იმ შემთხვევაში, თუ თვითონ რუსეთის პოლიტიკაში არ შეიცვალა რამე სოჭის ოლიმპიადის დასრულების შემდეგ.
პოლიტოლოგი აღნიშნავს, რომ სოჭის ოლიმპიადის შემდგომი პერიოდი ქართულ-რუსულ ურთიერთობებში გარდამტეხი იქნება.
“ეს ის პერიოდია, როდესაც “თაფლობის თვე” უკვე დამთავრებული იქნება და რეალურად გამოჩნდება თუ რა შეიძლება გაკეთდეს,” _ ამბობს კაკაჩია.
იგი ჟენევის ფორმატის საკითხს და მასთან დაკავშირებით საქართველოს საგარეო საქმეთა მინისტრის პოზიტიურ მოლოდინსაც ეხმაურება და აღნიშნავს, რომ ჟენევის ფორმატისგან ძირეულ გარღვევებს არ უნდა ველოდეთ, რადგან რუსეთი ჯერჯერობით არ ცვლის საკუთარ პოზიციას.
“პირიქით, ცდილობს რომ საქართველოს შეაცვლევინოს იგივე კანონი ოკუპაციის შესახებ და ა.შ. ანუ ცალმხრივი დათმობა მიდის და რუსეთი არაფერს არ ცვლის. ჩვენი დიპლომატია ძალიან ფრთხილად უნდა იყოს ამ ყველაფერთან მიმართებაში, რომ ურთიერთობების ნორმალიზაცია ზედმეტ დაახლოებაში არ გადავიდეს.
ბოლო პერიოდში რუსეთთან ურთიერთობები კულტურის სფეროში დაახლოების კუთხით აქტიურ ფაზაში შევიდა და როგორც ჩანს, რუსეთიდან ძალიან ბევრი ადამიანი ჩამოდის – მწერლები, პოეტები… ზოგადად, ალბათ, კულტურულ-ეკონომიკური კავშირის წინააღმდეგი არ უნდა ვიყოთ, მაგრამ ამავე დროს, არ უნდა დავუშვათ ის, რომ ვინაიდან, რუსეთმა ხისტი ძალით ვერაფერი გააკეთა, ახლა რბილი ძალით მოპატიჟება ჩვენ თვითონ მოვახდინოთ, რადგან რეალურად ეს ყველაფერი მიმართულია იქითკენ, რომ საქართველოში შეიცვალოს საზოგადოებრივი განწყობა ევროპასა და ამერიკასთან მიმართებაში.
რუსეთს მათთან ურთიერთობის ნორმალიზაციის პროცესში ამის საშუალება არ უნდა მივცეთ, თორემ ეკონომიკური თუ კულტურულ დაახლოების აუცილებლობაზე არავინ არ დავობს. უბრალოდ, ეს ჩვენი ეროვნული ინტერესების დათმობის ხარჯზე არ უნდა მოხდეს,” _ უთხრა “გურია ნიუსს” კორნელი კაკაჩიამ.
