“ამჟამად დასავლური სპეცსამსახურები და მათი აგენტები ცდილობენ კანონიერი ხელისუფლების დამხობას. ისინი ქმნიან არეულობას დაფინანსებული მიტინგებისა და აშშ-ის მიერ გადახდილი ინტერნეტ-რესურსებზე საინფორმაციო შეტევების მეშვეობით”.
ამასთან დაკავშირებით, დეპუტატი მოუწოდებს რუსეთის პრეზიდენტს, გაუწიოს უკრაინას სამხედრო ან სხვა სახის დახმარება “სუვერენიტეტის, ყირიმის რუსული მოსახლეობისა და უკრაინის სხვა რეგიონების დაცვის მიზნით”.
“გთხოვთ შეათანხმოთ უკრაინის ხელისუფლებასთან რუსეთის ფედერაციის შეიარაღებული ძალების შემოყვანა უკრაინის ტერიტორიაზე აშშ-სა და ნატო-ს აგრესორი ჯარებისგან თავდაცვისთვის”, _ წერდა მიმართვაში ქალაქ სევასტოპოლის საკრებულოს დეპუტატი, სერგეი სმოლიანინოვი.
მაშინ, ექსპერტი უსაფრთხოების საკითხებში, ხათუნა ლაგაზიძე “გურია ნიუსთან” ამბობდა, რომ რუსეთის მხრიდან უკრაინაში ჯარების შესვლა, დიდი სურვილის არსებობის შემთხვევაშიც, არ მოხდებოდა.
“რუსეთი უკრაინის პირდაპირ ინტერვენციას ვერ განახორციელებს. მაქსიმუმი რაც შეიძლება მან გააკეთოს და მთლიანი დისბალანსი გამოიწვიოს ზოგადად მსოფლიოში, ესაა ფართომასშტაბიანი სამოქალაქო დაპირისპირება ეთნიკურად რუს და უკრაინელ ხალხს შორის, დასავლეთ და აღმოსავლეთ უკრაინის ინსპერვირება. მაგრამ ამ შემთხვევაშიც კი რუსეთის აქტიური ჩარევა არ ნიშნავს ინტერვენციას. ეს იქნება მხოლოდ კულუარებიდან დაფინანსებული პროცესები.
უნდა ითქვას, რომ ასეთი ქმედება რუსეთისთვის უფრო დიდი ბომბია, ვიდრე უკრაინისთვის, რადგან უკრაინა არაა საქართველოს ზომის ქვეყანა, სადაც მიმდინარე კონფლიქტებმა შეიძლება მას არაფერი ავნოს. ეს პირდაპირ შეიძლება რუსეთზე გავრცელდეს. რომც არ გავრცელდეს, ეს რუსეთისგან იმხელა ფინანსურ დაბანდებებს მოითხოვს, რომ მათი ეკონომიკა ვერ გაუძლებს. ამიტომ, ვფიქრობ, რუსეთი ამას აცნობიერებს და ამ მასშტაბის დაპირისპირებაზე ის არ წავა”, _ უთხრა “გურია ნიუსს” ლაგაზიძემ.
ექსპერტი კავკასიის საკითხებში მამუკა არეშიძე კი, ჩვენთან საუბარში აღნიშნავდა, რომ სევასტოპოლის საკრებულოს დეპუტატ სერგეი სმოლიანინოვის მოთხოვნაზე ყურადღების გამახვილება არც ღირდა, რადგან იგი არც თუ ისე გავლენიანი ფიგურა იყო.
თუმცა, ამ მოვლენებიდან თვე-ნახევრის შემდეგ, ცნობილი ხდება, რომ კიევში შესაძლოა, რუსეთის სპეცრაზმი ჩავიდეს. აღნიშნულ ინფორმაციას ფრაქცია “ბატკივშინას” წევრი, უკრაინის რადას დეპუტატი, ანდრეი პარუბი ავრცელებს, რომელიც ამავდროულად ევრომაიდანის კომენდანტია.
დეპუტატმა ჟურნალისტებს განუცხადა, რომ ოპოზიციამ მიიღო ინფორმაცია, რომლის მიხედვითაც, “ბორისპოლის” და “ჟულიანის” აეროპორტებში აპირებენ გადმოსხან რუსეთის სპეცრაზმი.
“ისინი სამოქალაქო ფორმაში იქნებიან. კიევში მათ “ბერკუტის” ფორმას გადააცმევენ და მაიდანზე გადმოისვრიან”, _ აღნიშნა პარუბიმ.
მისივე განცხადებით, აღნიშნულ აეროპორტებში უკვე გაემგზავრნენ მათი წარმომადგენლები და ადგილზე გადაამოწმებენ ამ ინფორმაციას.
შეგახსენებთ, რომ უკრაინაში, ოპოზიცია ვადამდელი საპრეზიდენტო არჩევნების დანიშვნას ითხოვს.
პოლიტოლოგი ირაკლი კიკიანია “გურია ნიუსის” კითხვაზე, მოსალოდნელია თუ არა რუსული სპეცრაზმის უკრაინაში შეყვანა, პასუხობს, რომ ამ ქვეყნისგან ყველაფერი მოსალოდნელია.
“როცა საქმე გვაქვს ისეთ არაპროგნოზირებად ქვეყანასთან, როგორიც რუსეთია და რომელიც ყოველგვარ საერთაშორისო ნორმებს უგულვებელყოფს, ყველაფერია მოსალოდნელი. თუმცა, ეს ძალიან ძვირი დაუჯდება რუსეთს”, _ ამბობს კიკიანი.
რუსული ჯარის უკრაინაში შესაძლო შესვლას, პუტინის დასასრულის დაჩქარებას უწოდებს საგარეო საქმეთა მინისტრის ყოფილ მოადგილე ნიკოლოზ ვაშაკიძე.
“თუ პუტინმა გადაწყვიტა უკრაინის შიდა საქმეებში უფრო მკვეთრი ჩარევა, ანუ გარკვეული ძალების შეყვანა და თავხედური გზით მოქმედება, ჩემი აზრით, ეს კიდევ უფრო დააჩქარებს თავად პუტინის დასასრულს.”
განსხვავებული მოსაზრება აქვს პოლიტოლოგი ვაჟა ბერიძეს, რომელიც მიიჩნევს, რომ რუსეთს არ აქვს საბაბი უკრაინაში ჯარი შეიყვანოს.
“არ მიმაჩნია, რომ რუსეთი უკრაინაში ჯარს შეიყვანს, ამისთვის მას საბაბი არ აქვს, რომლითაც საერთაშორისო თანამეგობრობის წინაშე თავს გაიმართლებს. აქედან გამომდინარე, ეს უფრო უკრაინული ოპოზიციის მიერ გავრცელებული ვერსიები, რამდენადაც ამით ძაბავენ სიტუაციას, რათა კონფლიქტის მოგვარება დაჩქარდეს.
რუსეთის ჩარევა უკრაინის საქმეებში, ვფიქრობ, ფაქტობრივად მინიმალიზებულია, რადგან კიდევ ერთხელ ვიმეორებ, არ არსებობს მიზეზი და მოტივი ამისთვის. უკრაინული საზოგადოების დიდი ნაწილი აქტიურია, ანუ ისინი უპირობოდ მოითხოვენ ევროკავშირში შესვლას, ვიდრე ის ნაწილი, რომელსაც მიაჩნია, რომ უკრაინის ეკონომიკის 2/3, რომელიც მიბმულია რუსეთის ეკონომიკაზე გაჩერება და პრობლემები შეექმნებათ”, _ უთხრა “გურია ნიუსს” ბერიძემ.
