პარლამენტის თავმჯდომარის განცხადებით, სახელმწიფომ, თავისი ფუნქციის შესასრულებლად, და არა ბოროტი განზრახვით, დაიწყო ისეთი მონაცემების შეგროვება თავის მოქალაქეებზე, რომელთა ერთად თავმოყრამ ხიფათი შეუქმნა ადამიანებს და მთლიანად საზოგადოებას, ამიტომ გახდა საჭირო იმ ინსტიტუციონალური თანამდებობის შემოღება, როგორიც პერსონალურ მონაცემთა დაცვის ინსპექტორია.
“დღეს, ჩვენ, ცივილიზებულ სამყაროსთან ერთად აღვნიშნავთ პერსონალური მონაცემების დაცვის დღეს. დღევანდელ დღეს შევხვდით კანონით პერსონალური მონაცემების დაცვის შესახებ, რომელიც შეესაბამება ევროპულ კონვენციას და პერსონალური მონაცემების დაცვის ინსპექტორით. თანამედროვე ცხოვრებამ მოიტანა როგორც ახალი შესაძლებლობები, ასევე ახალი პრობლემები. ერთ-ერთი ასეთი პრობლემაა პირადი, კერძო ცხოვრების დაუცველობა იმ ვითარებაში, როდესაც სახელმწიფოს ხელში აღმოაჩნდა ძალიან ბევრი ინფორმაცია თითოეულ ჩვენგანზე. საჯარო დაწესებულებებში უნდა გაიაზრონ, რომ მოქალაქეების შესახებ მათ ხელთ არსებული მონაცემები არის მოქალაქეების და არა სახელმწიფოს კუთვნილება. არ უნდა იყოს იმის განცდა, რომ, რომელიმე საჯარო დაწესებულება გაასაჯაროებს ჩვენს მონაცემებს ჯანმრთელობის მდგომარეობის ან პირადი ცხოვრების შესახებ“, – განაცხადა უსუფაშვილმა და აღნიშნა, რომ ეს თემა საქართველოში განსაკუთრებით მტკივნეულია ბოლო ხანებში გამომზეურებული მასალების გამო. დავით უსუფაშვილის განცხადებით, “ირკვევა, რომ იმ დღეებში, როდესაც სახელმწიფოს ერთ დაწესებულებაში იქმნებოდა კანონი პერსონალური მონაცემების დაცვის შესახებ, მეორე უწყებაში ხდებოდა იმ ვიდეომასალების შექმნა და დაარქივება, რომელზეც მოქალაქეების პირადი ცხოვრება იყო დაფიქსირებული, ეს დაუშვებელია. ეს პრობლემა არ შემოიფარგლება რომელიმე ერთი უწყებით, ერთი ინსპექტორი ვერ აუვა ამ საქმეს, თუ ვერ მოხერხდა იმ მნიშვნელოვანი ძალის ფორმირება, რასაც პოლიტიკურ ნებას ვუწოდებთ. ვერც კანონი მოერევა მას თუ ის მორალურად არ იქნება კუთხეში მიყენებული”.
პარლამენტის პრესსამსახურის ინფორმაციით, შეხვედრაზე შეთანხმდნენ, რომ ხელისუფლება, არასამთავრობო ორგანიზაციები და ექსპერტები ერთად იმუშავებენ სტანდარტების გაუმჯობესების მიმართულებით, ასევე, პერსონალურ მონაცემთა დაცვის კანონმდებლობის გაუმჯობესებაზე, რომ სისტემა გახდეს მოქალაქეთა პერსონალურ მონაცემთა დაცვაზე ორიენტირებული. შეხვედრაზე საქართველოს იუსტიციის მინისტრმა, თეა წულუკიანმა განაცხადა, რომ ელექტრონული პირადობის მოწმობაზე, მოქალაქის თანხმობის გარეშე, სახელმწიფოს აეკრძალება იმაზე მეტი ინფორმაციის შეტანა, ვიდრე დღეს ამ ბარათში არის მოცემული. მინისტრის განცხადებით ამ ინიციატივაზე ფიქრობენ და მალე ეს კონსულტაციების საგანიც გახდება.
დღესვე პერსონალურ მონაცემთა დაცვის ინსპექტორის აპარატის ვებგვერდის პრეზენტაცია გაიმართა. შეხვედრაზე მოწვეულები იყვნენ სახელმწიფო, არასამთავრობო და საერთაშორისო ორგანიზაციების წარმომადგენლები და ექსპერტები.
