_ ამ საკითხთან დაკავშირებით ოზურგეთის დემოკრატიული ჩართულობის ცენტრში შეხვედრა გაიმართა. ისტორიული მუზეუმის დირექტორმა გოგა ტრაპაიძემ და ამავე მუზეუმის ფონდების მცველმა მანანა ლომაძემ საზოგადოების ნაწილს განუცხადა, რომ 2011 წელს აუქციონზე გატანილი იქნა ჩაის ფაბრიკის შენობა გასაყიდად და ასევე მიწის ნაკვეთი, სადაც, ჯერჯერობით, არ არის ჩატარებული არქეოლოგიური გათხრები და ეს ყველაფერი მოხდა ისე, რომ მათთვის ცნობილი 2014 წლის 21 იანვარს გახდა ცნობილი.
“ეროვნული ფორუმის” ოზურგეთის რაიონული ორგანიზაციის თავმჯდომარის, შოთა გოგიბერიძის თქმით, ყველა უწყებას უნდა გადაეგზავნოს წერილი და დროულად უნდა მოხდეს ამ ფაქტის შესწავლა: _ ყველა რესურსი უნდა გამოვიყენოთ და ვინც უნდა ჩავაყენოთ საქმის კურსში ეს აუცილებლად მალე უნდა მოხდეს. ძალიან ცუდი ფაქტია ის, რომ ვაშნარის ნაქალაქევის ტერიტორიაზე მდებარე ჩაის ფაბრიკა და მიწის ნაკვეთი ის გაიყიდა, რომ ახლა ხდება საზოგადოებისთვის ცნობილი.
ავთანდილ თავართქილაძე, მხატვარი: _ პირველ რიგში მაინტერესებს ვინ იყიდა და ვინ გაყიდა ეს ტერიტორია და თუ ეს ნამდვილად ასეა, როგორც მე გავიგე, ეს არის დანაშაული. ეს არ უნდა მომხდარიყო და საზოგადოებისთვის წინასწარ უნდა ეცნობებინათ. ეს საკითხი აუცილებლად უნდა შევისწავლოთ.
ღვთისმშობლის მიძინების საკათედრო ტაძრის წინამძღვარმა, მამა ბასილმა (კვირჩილაძემ) საზოგადოებას შემდეგი სიტყვებით მიმართა: _ ჩვენი დანაშაულია ის, რომ ამ ძეგლს დიდი ხნის განმავლობაში ვერ ვპატრონობდით, სახელმწიფომ ვერ მოახერხა ის, რომ გამოცხადებულიყო ნაკრძალად ეს ზონა და ასევე ვერ მოახერხა არქეოლოგიური გათხრები ჩატარებულიყო, მე ვარ ამის მომსწრე. მესმის, რომ შეიძლება მეტი პრობლემები იყო ქვეყანაში და ამისთვის ვერ მიიცალეს, ეს უკვე სხვადასხვა თემაა, მაგრამ ფაქტი ერთია _ შედეგად მივიღეთ ის, რომ ძეგლი უპატრონოდ გვქონდა და დღეს გაიყიდა. ეს ადგილი ძალიან დიდ სიწმინდეს შეიცავს, სავარაუდოდ, იქ შეიძლება ორი წმინდანის საფლავი იყოს და ათასი სხვა რამ. დღევანდელ დღეს ჩვენ გავაკეთოთ განცხადება და ეს პრობლემა ერთხელ და სამუდამოდ მოგვარდეს. ეს ტერიტორია აუცილებლად უნდა გამოცხადდეს ნაკრძალად. არცერთ ქვეყანაში არ ხდება ის, რომ ტერიტორია ისე გაიყიდოს, თუ არ შეისწავლება იმის ქვეშ რა ხდება. ჩვენ აუცილებლად უნდა მოვძებნოთ ჭეშმარიტი გზა და მოხდეს დროულად რეაქცია.
ოზურგეთის მუნიციპალიტეტის საკრებულოს დეპუტატი, ირინა საჯაია “გურია ნიუსთან” საუბრის დროს ამბობს, რომ ძეგლი არ არის გაყიდული:
ირინა საჯაია: _ თავიდან რომ გავიგე ეს ინფორმაცია, ნამდვილად საგანგაშო იყო და მესმის ამ ძეგლის მნიშვნელობა, რადგან ძალიან კარგად ვერკვევი ამ საკითხში. ადრე მუზეუმის თანამშრომელი ვიყავი და მეც მიმიღია მონაწილეობა ვაშნარის ექსპედიციებში. საქმე არც ისე არის, როგორც ეს არის ცნობილი, გაყიდულია ჩაის ფაბრიკის შენობა და შენობის ნანგრევების ტერიტორია, 2 ჰექტარი მიწის ნაკვეთი. ის ინფორმაცია, რომ 21 ჰექტარი არის გაყიდული, არ შეესაბამება სინამდვილეს და ასევე არც ის არის მართალი, რომ ძეგლი გაყიდულია.
_ 2011 წელს ისე მოხდა ამ შენობის გაყიდვა, არ იყო გამორიცხული, რომ ვაშნარის ტერიტორიის მიწის ნაკვეთის გაყიდვაც მომხდარიყო. ისტორიკოსები და მეცნიერები ამ ტერიტორიის გაყიდვას კატეგორიულად გმობენ.
_ სააქციო საზოგადოებამ გაიტანა ეს შენობა აუქციონზე.
_ რაც შეეხება 2 ჰექტარი მიწის ნაკვეთს, ისტორიულ მუზეუმში აცხადებენ, რომ ამ მიწის ნაკვეთზე აუცილებელია არქეოლოგიური გათხრების ჩატარება.
_ გასაგებია, მაგრამ იქ, მე როგორც ვიცი, არავინ არაფრის გაკეთებას აპირებს და ახლა ჩვენ ვართ იმ ეტაპზე, რომ მოხდეს დროულად ამ საქმის მოგვარება.
და ბოლოს, ოზურგეთის დემოკრატიული ჩართულობის ცენტრში გამართული შეხვედრის შემდეგ, “გურია ნიუსს” მანანა ლომაძე დაუკავშირდა და შემდეგი სახის ინფორმაცია მოგვაწოდა:
_ გურიის ექსპედიციის ხელმძღვანელმა, ვაჟა სადრაძემ და მისმა წევრმა, მერაბ ძნელაძემ კულტურის სამინისტროში უკვე შეიტანეს წერილი მინისტრის სახელზე. ისინი მზად არიან, შეხვდნენ ადგილობრივი ხელისუფლების წარმომადგენლებს და ისაუბრონ აღნიშნულ საკითხთან დაკავშირებით, _ გვითხრა მანანა ლომაძემ.
