“გურია ნიუსმა” გავრცელებულ ვიდეო კადრში, სამხედრო ატაშე დიდ ბრიტანეთში, გენერალი დავით ნაირაშვილი ამოიცნო. რომელიც თავდაცვის ყოფილი მინისტრის, ბაჩო ახალაიას მიერ არის დანიშნული აღნიშნულ თანამდებობაზე.
“არაფერი არ ხდება. ეს არის მუხროვანის ამბოხება. მე ვხელმძღვანელობდი შტაბს. მაგის “სასტავი” რომ გაიქცნენ. ორი-სამი კაცი რომ იყვნენ. გახსოვთ?! უბრალოდ ისინი გაიქცნენ და ვანო (ვანო მერაბიშვილი. ავტ) გაღიზიანდა ამ კონკრეტულ საკითხზე. იგულისხმა ან დაიჭირეთ, ან რაღაცა ქენით, მომიყვანეთ ეს ხალხი. მეტი არაფერი. უბრალოდ გეუბნებით: ის იდიოტური აჟიოტაჟი, რომელიც არსებობს, რამენაირად უნდა მოიხსნას, მეტი არაფერი.” _ აცხადებს “გურია ნიუსთან” საუბრისას სამხედრო ატაშე დიდ ბრიტანეთში, გენერალი დავით ნაირაშვილი.
სამხედრო ექსპერტი, გიორგი თავდგირიძე “გურია ნიუსთან”საუბრისას აცხადებს, რომ “ოფიცრის ღირსებაზე, მოქალაქეობრივ პასუხისმგებლობაზე, ადამიანობასა და მსგავს მაღალ მატერიებზე საუბარი ზედმეტია როდესაც გენერალ ნაირაშვილისა და შმაგი თელიას საქციელს უყურებ იმ ვიდეოზე, სადაც ასახულია როგორ გასცემს ვინმე კრიმინალი მერაბიშვილი ბრძანებას ორი ადამიანზე ნადირობის დასაწყებად.
_ ბატონო გიორგი, როგორ ფიქრობთ, ნაირაშვილი და თელია თანამონაწილეები არიან იმ პროცესის, რაც ვიდეოშია ასახული?
_ ყველა ოფიცერმა იცის, რომ დანაშაულებრივი ბრძანება არ უნდა შეასრულოს და ისიც, რომ ზემდგომის ბრძანება არ ათავისუფლებს შემსრულებელს დანაშაულის ტვირთისაგან. მაგრამ სამწუხაროდ გენერალური შტაბის უფროსი და სახმელეთო ჯარების სარდალი არც კი ცდილობენ აუხსნან პოლიტიკურ ხელმძღვანელობას, რომ არც შეიარაღებულ ამბოხს ჰქონია ადგილი და გართულებაც მოსალოდნელი აღარ არის. გაუგებარია, რატომ ემორჩილებიან ისინი და ასრულებენ სხვა უწყების, შსს-ს ხელმძღვანელის ბრძანებას? მითუმეტეს, როცა ეს ბრძანება აშკარად უკანონოა?
_ გენერალი ნაირაშვილი “გურია ნიუსთან”საუბრისას აცხადებს, რომ ის ყველაფერი “იდიოტური აჟიოტაჟი” იყო და მეტი არაფერი.
_ დასკვნა ნათელია, რომ შეიარაღებული ძალებისა და შინაგან საქმეთა სამინისტროს მაღალჩინოსნები თავს არა სახელმწიფოს სამსახურში აღიქვამდნენ, არამედ ნაციონალური მოძრაობის. თუ მოვლენებს ამ ჭრილში შევხედავთ, გასაგები ხდება, გენერალი ნაირაშვილი პარტიის დისციპლინირებული წევრია, რომელიც თავისი პოლიტიკური ლიდერის, ვანო მერაბიშვილის დავალებას უსიტყვოდ ასრულებს. მისთვის კანონზე უფრო მაღლა პარტიული დავალება დგას.
ზოგადად კი, შეიარაღებული ძალების ხელმძღვანელობას უნდა სცოდნოდათ ჯარში მიმდინარე პროცესები, არ დაეშვათ უკმაყოფილების გამოხატვის კოლექტიური ფორმები, ისე რომ საფრთხე არ შექმნოდა სამხედრო მოსამსახურეების სიცოცხლეს. იმ შემთხვევაშიც კი, თუ რაიმე ამბოხის ნიშნები იყო გენერალურ შტაბს თავის თავზე უნდა აეღო პასუხისმგებლობა და განემუხტა სიტუაცია.
_ გენერალი ნაირაშვილი დღესაც მოქმედი ატაშეა დიდ ბრიტანეთში…
_ სამწუხაროდ, იშვიათი გამონაკლისის გარდა, დღესაც შეიარაღებულ ძალებს ის ოფიცრები მართავენ, რომლებიც ნაციონალური მოძრაობის იარაღს წარმოადგენდნენ. ამიტომაცაა აუცილებელი ძირეული ცვლილებები შეიარაღებულ ძალებში.
_ როგორი უნდა იყოს თავდაცვის სამინისტროს რეაგირება? ჩვენთან კომენტარში აცხადებენ, რომ ნაირაშვილის გადაყენებასთან დაკავშირებით პროკურატურის მიმართვას დაელოდებიან.
_ თავდაცვის სამინისტროს უნდა შეექმნა კომისია, რომელიც შეისწავლიდა ნაციონალური მოძრაობის მმართველობისას დაგროვილ პრობლემებს. რაც შეეხება კონკრეტულად ნაირაშვილსა და თელიას, მათზე უნდა დაიწყოს სამსახურებრივი მოკვლევა.
_ სამსახურებრივი მოკვლევის პერიოდში უნდა ინარჩუნებდნენ თუ არა თანამდებობებს?
_ არა, კადრების განკარგულებაში უნდა გავიდნენ, ან დროებით შეუჩერდეთ უფლებამოსილება.
