ვიქტორ ჯაფარიძე: “ხვალ დილით შევხვდები საპროტესტო აქციის მონაწილეებს. თუმცა, შეხვედრა დახურული იქნება”
_ ბატონო ვიქტორ, მიწა რომელზეც აზომვითი სამუშაოები უნდა ჩატარდეს, სახელმწიფოს კუთვნილება არ იყო ოფიციალურად?
_როგორ, როგორ. რა, შენ გგონია, მიწა რომელზეც მე ვცხოვრობ მამაპაპისეულ სახლში, ჩემია და… ახლა…
_ თქვენ დარეგისტრირებული გაქვთ მიწა?
_ნაწილი არ მაქვს დარეგისტრირებული მაგრამ, საბედნიეროდ, სვანეთში ამას პრობლემები არ მოყოლია. ყველამ კარგად იცის, ვისი რა არის და სვანები ერთმანეთში არ დავობენ. ეს საზღვრები კომუნისტების წასვლის შემდეგ მოსახლეობამ თვითონ დაალაგა.
_ საზღვრების დალაგება თვითნებურად თქვენთვის, როგორც საკანონმდებლო ორგანოს წარმომადგენლისთვის, მისაღებია?
_ მე მესმის, რომ კანონით, დაურეგისტრირებელი ყველა მიწა სახელმწიფოსია. მაგრამ, როგორც ჩანს დე-ფაქტოდ და არა არა დე-იურედ. დე-ფაქტო ცოტა სხვანაირად არის. ანუ, იურიდიულად სახელმწიფოსია დაურეგისტრირებელი მიწა არა მარტო სვანეთში, არამედ მთელს ქვეყანაშია. მაგრამ, ყველამ ხომ კარგად იცის, მიწა, სადაც ეს ადამიანი ცხოვრობს, არის მისი. მერე რა რომ დოკუმენტი არ არის გაფორმებული?
სამწუხაროდ, წინა ხელისუფლებამ უსინდისო და უნამუსო ნაბიჯები გადადგა და მოსახლეობის მიწები დაიკანონა. მე ვთვლი, რომ უნდა აღდგეს ისტორიული სამართლიანობა და ხაიშის მოსახლეობამ თავისი მიწები თვითონვე უნდა დაიკანონოს და დაისაკუთროს. რადგან ეს ისტორიულად ასე იყო და არ იყო ეს მიხეილ სააკაშვილისა და მისი ბანდის გადასაწყვეტი.
_ ხაიშელების გარკვეულ ნაწილს რატომ არ უნდათ აზომვითი სამუშაოების ჩატარება და მიწის დაკანონება?
_ღმერთმა დაგვიფაროს, რომ ყველა ერთნაირად ფიქრობდეს. ხაიშელები ფიქრობენ იმას, რომ მათი მიწა უკანონოდ დაიკანონა და დაისაკუთრა რომელიღაცა კონკრეტულმა კომპანიამ.
_ ქვეყნის უმაღლეს საკანონმდებლო ორგანოში თქვენ უმრავლესობის წარმომადგენელი ხართ. ამ საქმესთან დაკავშირებით თუ შეხვდით ენერგეტიკის მინისტრს, შსს-ს წარმომადგენლებს, სამეგრელო-ზემო სვანეთის გუბერნატორს. მითუმეტეს,რომ რამდენიმე დღის წინ სამხარეო პოლიციის მობილიზება გახდა საჭირო.
_ სვანეთში იყო ასული სამხარეო პოლიციის უფროსი. ერთი რამე მინდა გთხოვოთ, დაიმახსოვრეთ, რომ განსხვავებით წინა მორბედისა, ეს ხელისუფლება, რომელშიც მეც ვიგულისხმები, ძალისმიერი მეთოდით მოსახლეობას არ დაელაპარაკება. არავის არანაირი ძალა არ გამოუყენებია და არც მოხდება. მე ვფიქრობ, რაღაც კომპრომისამდე უნდა მივიდეს სახელმწიფო და მოსახლეობა.
_ ხვალ, სად და როდის შეხვდებით ხაიშელებს?
_ შეხვედრა დილით იქნება. მაგრამ ეს შეხვედრა დახურული იქნება.
_ თქვენს გარდა, შეხვედრაზე სოზარ სუბარიც ხომ არ იქნება, რომელიც ახლა, ჩვენი ინფორმაციით, სვანეთში იმყოფება.
_სოზარ სუბარი არის ჩვენი ერთ-ერთი სასახელო და საამაყო სვანი, რომელიც წარმატებული მინისტრია და იმ წარუმატებელ სამინისტროში ახორციელებს წარმატებულ რეფორმებს. რა თქმა უნდა, სოზარ სუბარის სიტყვას ძალიან დიდი მნიშვნელობა ექნება.
_ ანუ ჩამოვა სოზარ სუბარი შეხვედრაზე?
_ მგონია, რომ ჩამოვა.
“გურია ნიუსი” მესტიის მუნიციპალიტეტის გამგებელს კახა ჟოჟოლიანსაც დაუკავშირდა. რომელმაც რამდენიმე დღის წინ გვითხრა, რომ ხაიშელების პრობლემებში გაერკვეოდა.
კახა ჟორჟოლიანი: “ხვალ ვხდებით ხაიშელებს. მათ დარდს აუცილებლად საჯაროს გავხდით. რასაც ჩვენ გვეტყვიან, პრესისთვის აუცილებლად ხელმისაწვდომი იქნება. საქმის კურსში ჩაგაყენებთ ყველას.”
_ ჩვენ ინფორმაციით, ხვალ ხაიშელებთან შეხვედრას საქართველოს სასჯელაღსრულების, პრობაციისა და იურიდიული დახმარების საკითხთა მინისტრი სოზარ სუბარი დაესწრება.
_ ჩვენთან ერთად იქნება სოზარი. ასევე, მე და ვიქტორ ჯაფარიძე ვიქნებით.
