საპასუხოდ, თბილისში ხაიშიდან ჩამოსული აქტივისტების წარმომადგენლებმა განაცხადეს, რომ 6 თებერვალს, ხაიშში დაგეგმილი ყრილობა, სადაც სვანეთის უხუცესები უნდა შეკრებილიყვნენ, გადაიდებოდა. თუმცა, მიუხედავად მიცემული პირობისა, შეხვედრა მაინც ჩატარდა. ადგილობრივები, ვიცე პრემიერსა და ენერგეტიკის მინისტრის, კახა კალაძის დაანონსებულ ჩასვლას არ დაელოდნენ.
მედიისთვის დახურულ შეხვედრას მესტიის მაჟორიტარი ვიქტორ ჯაფარიძე და სასჯელაღსრულების მინისტრი სოზარ სუბარი დაესწრნენ.
როგორც მესტიის მაჟორიტარმა დეპუტატმა ვიქტორ ჯაფარიძემ “გურია ნიუსთან” საუბრისას განაცხადა, ის და მინისტრი სოზარ სუბარი რიგითი სვანების სტატუსით იმყოფებოდნენ.
საბოლოო ჯამში, მიმდინარე კვირა საინფორმაციო საშუალებებმა ხუდონჰესის კვირეულად გამოაცხადეს. ყველა ახალი ამბავი ხაიშში განვითარებული მოვლენებით იწყებოდა… საქმეში სახალხო დამცველიც ჩაერთო.
3 თებერვალი…. უჩა ნანუაშვილი: “ყრილობა ხაიშში არის მოუმზადებელი და დაუგეგმავი”
3 თებერვალს, სახალხო დამცველმა უჩანანუაშვილმა ხუდონჰესის საკითხზე ხაიშის მცხოვრებლებთან შეხვედრა გამართა. ომბუდსმენის განცხადებით, ინიციატივა ხაიშელებისგან მოდიოდა.
შეხვედრამ დახურულ კარს მიღმა დაახლოებით 2 საათს გასტანა. ადგილობრივი მოსახლეობისგან პრობლემების მოსმენის შემდეგ სახალხო დამცველმა უჩა ნანუაშვილმა განაცხადა, რომ კარგი იქნებოდა, თუ 6 თებერვალს ხაიშში ხუდონჰესთან დაკავშირებით დაგეგმილი ყრილობა, უფრო გვიან გაიმართებოდა. სახალხო დამცველის განცხადებით, პროცესი საკმაოდ მოუმზადებელი და დაუგეგმავი იყო.
“ჩვენ მოვისმინეთ მათგან შეშფოთებები ყრილობის დანიშვნასთან დაკავშირებით. ინფორმაცია, რომელიც ჩვენთვის გახდა ცნობილი, გვაძლევს საფუძველს, განვაცხადოთ, რომ ეს პროცესი არის საკმაოდ მოუმზადებელი, დაუგეგმავი და არ არის გამორიცხული, ადგილი ჰქონდეს გარკვეულ ექსცესებს, რადგანაც ძალიან მცირე დროში ხდება ყრილობის ორგანიზება.” _ განაცხადა უჩა ნანუაშვილმა.
სოზარ სუბარი: “მიტინგებზე სერიოზული გადაწყვეტილებები არ მიიღება”
6 თებერვალს, ხაიშში დილას დაგეგმილი ყრილობა 2 საათისთვის გადაიდო. 2 საათზე შეკრებილებს აქციის ორგანიზატორებმა განუცხადეს, რომ კაცები ტაძარში შევიდოდნენ და ქალების და ჟურნალისტების გარეშე გამართავდნენ თათბირს. 1 საათში გადაწყვეტილების გამოცხადებას დაპირდნენ ხაიშელებს და მინისტრთან, დეპუტატთან და უხუცესებთან ერთად ტაძარში შეიკეტნენ.
მოგვიანებით, სასჯელაღსრულების მინისტრმა სოზარ სუბარმა განაცხადა, რომ შეხვედრამ უშედეგოდ ჩაიარა: “როცა ასეთ სერიოზულ ობიექტებზეა საუბარი, ამას სერიოზული აწონ-დაწონვა სჭირდება. მიტინგებზე სერიოზული გადაწყვეტილებები არ მიიღება…
“ჩვენ მზად ვართ დიალოგისთვის ადგილობრივ მოსახლეობასთან. ძალიან ხშირია განცხადებები, თითქოს სამინისტრომ და ინვესტორმა უარი განაცხადეს ადგილობრივ მოსახლეობასთან შეხვედრაზე. ეს არის სიცრუე, სრული პასუხისმგებლობით მინდა გავაკეთო ამასთან დაკავშირებით განცხადება.” _ აცხადებს ვიცე-პრემიერი და ენერგეტიკის მინისტრი კახა კალაძე “გურია ნიუსთან” საუბრისას.
ენერგეტიკის მინისტრი უახლოეს მომავალში ადგილობრივ მოსახლეობასთან შეხვედრას და მათთვის ხელსაყრელი პირობების შეთავაზებას აპირებს:
“რაც შეეხება საბოოლოო პაკეტს, რომელიც წარმოდგენილი უნდა იყოს ადგილობრივი მოსახლეობისთვის, მათ უნდა გავაცნოთ თუ რა იქნება თანხა იმისთვის, რომ მოხდეს ამ ადამიანების განსახლება . ჩვენ არ ვამბობთ იმას, რომ აი, მივცეთ ამ ადამიანებს რაღაც გარკვეული დიდი ანაზღაურება და წავიდნენ და სვანეთი დატოვონ. პირიქით, ჩვენ ვეუბნებით, რომ იქვე გამოინახება ტერიტორია, თუ მათ ამის სურვილი ექნებათ, რა თქმა უნდა და ჩვენ იქვე შეგვეძლება ერთი პატარა სოფელი ავაშენოთ, ხაიში, რომელიც ინფრასტრუქტურულად ძალიან გამართული და ყველანაირად მოწყობილი იქნება. ასევე ადგილობრივ მოსახლეობას საშუალება ექნება ამ პროექტის განხორციელებაში მიიღოს მონაწილეობა. პროექტის დასრულების შემდეგ კი მათ ექნებათ მუდმივი სამუშაო ადგილები.” _ განაცხადა კახა კალაძემ.
მიმოზა ჭკადუა: დავიღალე ამ ყველაფრით. რაღაც შედეგამდე უნდა მივიდეთ… ან იქით, ან აქეთ…
საბოლოო გადაწყვეტილების მიღებას ხაიშელებიც ელოდებიან… ელოდებიან პრემიერ-მინისტრის ჩასვლასაც… “გურია ნიუსმა” რამდენიმე მათგან კომენტარები ჩაწერა.
პასიკო გულედანი, ხაიშის საჯარო სკოლის დირექტორის მოვალეობის შემსრულებელია, მას ერთხელ უკვე აღებული აქვს კომპენსაცია 1988 წელს. მაშინ, ქალბატონ პასიკოსთან ერთად, ხაიშის 130-მა თემმა აიღო კომპენსაცია :
_ ქალბატონო პასიკო, რატომ არ დაელოდეთ კახა კალაძის ჩამოსვლას. მან ხომ თქვენი პირველი მოთხოვნა დააკმაყოფილა და მიწების აზომვა შეჩერებულია?
_ გვეგონა ჩამოვიდოდა. მაგრამ, სოზარ სუბარმა თქვა მიზეზი, რატომ ვერ ჩამოვიდა კახი კალაძე.
მერაბ გულედანი (ხაიშის მკვიდრი): “მთელი სოფელი გამოვიდა იმის წინააღმდეგ, რომ ხაიში არ დაიტბოროს. აქციაზე ხელისუფლების წარმომადგენლებიდან არც სოზარი გამოსულა, არც დეპუტატი და არც გამგეობის ვინმე წევრი.
თითო სოფლიდან სამ-სამი ადამიანი აირჩიეს. შემდეგ შეხვედრა დახურულ კარს მიღმა შედგა. იქ რაზე ილაპარაკეს, მე არ ვიცი.
ოთარ ჭკადუა: დღეს შეხვედრა კი შედგა. მაგრამ, არანაირი შედეგი არ არის…
_ უხუცესებთან შეხვედრა დახურულ კარს მიღმა ჩატარდა. თქვენ თუ დაესწარით შეხვედრას?
_თქვენ ხომ იცით, ხუდონჰესის მშენებლობასთან დაკავშირებით ხალხმა ხატზე დაიფიცა. ჰოდა ხალხმა დააფიქსირა თავისი პოზიცია. ეს იყო სულ. მინისტრი არ ჩამოსულა და როგორ უნდა დავლოდებოდით? მინისტრთან შეხვედრა არ მოუთხოვია ხაიშელებს. ეტყობა თავისი ინიციატივით განაცხადა.
_ რას ითხოვენ ხაიშელები?
_ხუდონჰესის პროექტის შეჩერებას და ალტერნატიული პროექტების განხილვას, რომელიც არ გამოიწვევს ხაიშის დატბორვას. არსებობს ასეთი პროექტები. სწორედ ეს დავაბარეთ ხელისუფლებასთან სოზარ სუბარს და ვიქტორ ჯაფარიძეს.
მიმოზა ჭკადუა: “სოზარ სუბარის, ვიქტორ ჯაფარიძის და უხუცესების შეკრება დახურულ კარს მიღმა შედგა. შეხვედრა როგორ დასრულდა, ამაზე კონკრეტულს ვერაფერს გეტყვით. იმიტომ, რომ რაღაცა, როგორც ჩანს, მთავრობისგან შემოთავაზება იყო… არ ვიცი, ალბათ ალტერნატივა. მაგრამ ხაიშელებისგან იყო, რომ აქ არ უნდა აშენდეს ალტერნატივა.
_ ორი დღის წინ ენერგეტიკის მინისტრმა განაცხადა,რომ იგი აუცილებლად შეხვდებოდა ხაიშელებსდა ადგილზე გაარკვევდა რა პრეტენზიები ჰქონდათ.
_ ეს შეხვედრა დაგეგმილი იყო. ჩამოვიდნენ ბატონი სოზარი და დეპუტატი ვიტია. კალაძემ თქვა, მერე ჩამოვალო და ჩამოვა ალბათ. ვერ გეტყვით.
_ შემდეგი შეხვედრა როდის შედგება?
_ ასე თქვეს, ყოველი თვის 20 რიცხვში ყველა სოფლიდან სამ-სამი უხუცესი შეიკრიბება. არ ვიცი ალბათ გაუზიარებენ ერთმანეთს აზრს.
_ თქვენ ხუდონჰესისმშენებლობის მომხრე ხართ თუ წინააღმდეგი?
_იცით რას გეტყვით, იმ დონემდე ვარ მისული, ნამდვილად დავიღალე ამ ყველაფრით. აქედან მთელი ძალით არას ძახილით, იქედან კის ძახილით. რაღაც შედეგამდე უნდა მივიდეთ, ან იქით, ან აქეთ. უნდა დამთავრდეს საბოლოოდ.
იცით რითი დავიღალე?! ჩვენ ხაიშელები ვიძახით, არ გვინდა აშენდესო. მთავრობა და სახელმწიფო გვეუბნება, ეს სახელმწიფოს სჭირდება და უნდა აშენდესო. რაღაცამდე ხომ უნდა მივიდეს საქმე? ან აშენდეს ეს ოხერი, ან არ აშენდეს. რაღაც გზას ხომ უნდა დავადგეთ. რამდენ ხანი უნდა ვიცხოვროთ ასეთ გაუგებრობაში? მეტისმეტია ეს ყველაფერი. ყველა ამ შეკრებაზე ერთი და იგივე და საბოლოოდ ვერაფერი დგინდება.
_ ხაიშელების პროტესტის მიუხედავად სახელმწიფომ თუ მაინც ააშენა ხუდონჰესი?
_ ნუ თუ ააშენა… მე ვფიქრობ სახელმწიფოს წინააღმდეგ ძალიან ძნელია წასვლა. ძალიან მტკივნეული თემაა, მაგრამ, როცა სახელმწიფო ასე კონკრეტულად გადაწყვეტს, ძალიან ძნელია სახელმწიფოს წინააღმდეგ გალაშქრება. უნდა ჩამოვიდეს ენერგეტიკის მინისტრი და ხალხს უნდა დაელაპარაკოს. ჩვენი შეხვედრებით რაღაცებზე ვლაპარაკობთ, მაგრამ კონკრეტულ შედეგამდე ვერ მოვედით…
