ოზურგეთის მუნიციპალიტეტის რამდენიმე სოფლის ექიმი “გურია ნიუსის” ოზურგეთის განყოფილებაში მოვიდა _ ისინი გამოეხმაურნენ ჩვენი გაზეთის 28 ივლისის ნომერში გამოქვეყნებულ სტატიას _ “როდის მიიღებენ მედიცინის მუშაკები ხელფასს”.
“ოზურგეთის მუნიციპალიტეტში არსებული 29 ტერიტორიული ერთეულის ექიმების სახელით მოვედით, იქნებ, თქვენი მეშვეობით გავიგოთ, რა ბედი ეწია ჩვენს ე. წ. “გაყინულ ხელფასებს”? რამდენიმე თვეა, კუთვნილი ხელფასიც არ მიგვიღია. თქვენს გაზეთში გამოქვეყნებული სტატია ჩვენთვის გამონათება იყო. იქნებ, რაიმე რეაგირება მოახდინონ, რატომ უნდა იყოს ჩვენი სფერო ასე მიტოვებული?” _ გვითხრეს მათ.
_ რამდენიმე თვეა, კუთვნილი ხელფასი არ აგვიღია, არც ერთი სფერო არ დარჩენილა “ვარდების რევოლუციის” შემდეგ, რომ დავალიანება არ გასწორებულიყოს, სამედიცინოს გარდა. რა დავაშავეთ ექიმებმა? უფულობის გამო, გურიანთის, მერიისა და ნატანების ექიმები გზაზე ვიდექით, რომ გამვლელს სამსახურამდე წავეყვანეთ, თუმცა, სამსახურისთვის თავი არ დაგვინებებია, პირნათლად ვასრულებდით მოვალეობას და ახლა ასე გაწირვა შეიძლება? _ ექიმები აღშფოთებას გამოხატავენ იმის გამო, რომ ადგილობრივმა ხელმძღვანელობამ არ იზრუნა სახელფასო დავალიანების დასაფარავად; უკმაყოფილონი არიან ცრუ დაპირების გამოც _ შარშან, როცა მინისტრის მოადგილე იყო ჩამოსული, დავალიანების ეტაპობრივად დაფარვას შეჰპირდა, მაგრამ ეს შეპირებაც ქარს გაჰყვა. ისინი ეჭვობენ, რომ ასეთი დაპირება ერთგვარი ხერხია მათ გასაჩუმებლად:
_ თქვენს გაზეთში გამოქვეყნებული სტატია ჩვენთვის გამონათება იყო _ იქნებ რაიმე რეაგირება მოახდინონ, რატომ უნდა იყოს ჩვენი სფერო მიტოვებული? სოფლის ექიმებს შვებულება არ გვაქვს, რამდენიმე თვის ხელფასი არ აგვიღია, ეს მაშინ, როცა ყველას ბანკის ვალი გვაქვს. ჩვენს მოვალეობას პირნათლად ვასრულებთ და რატომ უნდა ჩაგვაგდოს სახელმწიფომ ასეთ მდგომარეობაში? პოლიკლინიკას 2009 წელს გამოვეყავით. რაღაც პერიოდში ჩამორიცხეს თანხა, მაგრამ ნაწილმა აიღო და ნაწილმა _ ვერა. ჩვენთვის არავის უთქვამს, როგორ შეარჩიეს ეს ნაწილი. ახლაც შეიძლება იგივე მოხდეს _ ჩამოირიცხოს თანხები და ისევ ერთ ნაწილს მისცენ და ჩვენ დაგვტოვონ.
_ გქონდათ თუ არა ხელმძღვანელობასთან საუბარი ამ საკითხზე?
_კი. დაგვპირდნენ, რომ ეტაპობრივად ჩამოირიცხება თანხა და დავალიანებას გაგისტუმრებთო. მერე არავისთვის არ მიგვიმართავს, იმედი აღარც გვქონდა.
სოციალური მომსახურების სააგენტოს გურიის რეგიონული საკოორდინაციო ცენტრის უფროსის მოადგილე ლევან ბაიჯანი “გურია ნიუსთან” საუბარში ამბობს, რომ ამ ვალის შესახებ მთავრობამ იცის:
_ ოზურგეთის მუნიციპალიტეტის სოფლების ექიმებს რამდენიმე თვეა, ხელფასი არ აუღიათ.
_ ამ თვეში ყველა მიმდინარე სახელფასო ანაზღაურება გასწორდება. შეიძლება, ამ კვირაშიც გადმოირიცხოს თანხა.
_ მათ აღებული არ აქვთ 2001-2003 წლის ხელფასებიც და ამბობენ, რომ ანაზღაურება პოლიკლინიკურ-ამბულატორიული გაერთიანების მხოლოდ რამდენიმე თანამშრომელმა მიიღო.
_ 2001-2003 წლის ამბავს ნამდვილად ვერ გეტყვით. ჩვენი სააგენტო მაგაზე პასუხს ვერ გაგცემთ. როცა ჩადებს პარლამენტი ბიუჯეტში თანხას, მაშინვე გადმოირიცხება. ნაწილმა აიღო იმიტომ, რომ პოლიკლინიკას მაშინ ჰქონდა საშუალება, ნაწილისთვის დაერიგებინა ხელფასი.
_ ბატონო ლევან, იქნებ, მოგვცეთ კონკრეტული პიროვნების კოორდინატები, რომელსაც შეეძლება, ექიმების კითხვებს პასუხი გასცეს.
_ ამ კითხვებზე ვერავინ გამაზე გიპასუხებთ. ეს მთავრობის ვალია. დაუკავშირდით პარლამენტის საფინანსო-საბიუჯეტო კომისიას და ჰკითხეთ, თუ აპირებენ ამ თანხის ჩამორიცხვას.
_ ესე იგი, თქვენ კონკრეტულ პასუხს ვერ გვაძლევთ?
_ ვერა.
