ჩვენ წყაროზე დაყრდნობით, აღნიშნულ გადაწყვეტილებას ხვალვე საკრებულოს სხდომაზე ხმათა უმრავლესობით მიიღებენ. საკრებულოს ბიუროს სხდომა 18 აგვისტოს ჩატარდა და როგორც ჩვენი წყარო ამბობს, ბიუროს წევრები “ერთხმად” შეჯერდნენ ტაკიძის ვაშაყმაძით ჩანაცვლების საკითხზე. რაც მთავარია, როგორც წყარო ამბობს, ილო ვაშაყმაძის კანდიდატურა ბიუროს სხდომაზე გურიის გუბერნატორმა, ვალერი ჩიტაიშვილმა დაასახელა.
გუბერნატორს უთქვამს, ყველაზე კარგი კადრი ილოა და ის რომ ჩვენს შეთავაზებას დათანხმებოდა, ძალიან ბევრი შრომა დაგვჭირდაო. სწორედ ამის შემდეგ დაიწყეს ბიუროს წევრებმა მსჯელობა, თუ როგორ უნდა მოექციათ კანონის ჩარჩოებში აღნიშნული გადაწყვეტილება. აღსანიშნავია, რომ ბიუროს წევრების შეკრება მაქსიმალურად გასაიდუმლოებული იყო, რასაც ჩვენ მიერ მოპოვებული ჩანაწერები ადასტურებს. როგორც “გურია ნიუსთან” სატელეფონო საუბარში გურიის გუბერნატორმა, ვალერი ჩიტაიშვილმა აღნიშნა, ბიუროს სხდომა არ ჩატარებულა, უბრალოდ, ბიუროს წევრები შეიკრიბნენ.
გუბერნატორმა არც უარყო და არც დაადასტურა ჩვენი წყაროს ინფორმაცია, რომ ბიუროს წევრებს ვაშაყმაძის კანდიდატურა მან შესთავაზა:
_ ბატონო ვალერი, როგორც გვითხრეს, ბიუროს წევრებს თქვენ შესთავაზეთ ილო ვაშაყმაძის კანდიდატურა.
_ რაც შეეხება კანდიდატურას, კარგი კადრია, თუმცა სხვა კანდიდატურებიც დასახელდა.
_ ანუ ადასტურებთ თუ არა ინფორმაციას, რომ თქვენ შესთავაზეთ მისი კანდიდატურა.
_ ვადასტურებ იმას, რომ ერთ-ერთი კანდიდატურა შეიძლება, მართლაც ილო იყოს, _ გვითხრა გუბერნატორმა.
ოზურგეთის მუნიციპალიტეტის საკრებულოს საფინანსო-საბიუჯეტო კომისიის თავმჯდომარემ, კობა ხაბალაშვილმა ჩვენს კითხვაზე _ ესწრებოდა თუ არა ბიუროს სხდომას, თავდაპირველად გვიპასუხა, რომ ესწრებოდა. თუმცა, მოგვიანებით თქვა, რომ ეს იყო შეხვედრა და არა სხდომა. ის, რომ ვაშაყმაძის კანდიდატურაზე იყო საუბარი, კატეგორიულად უარყო:
_ არა, არა, არა! ვინ მოგაწოდათ ეგ ინფორმაცია? არა, სავარაუდოდ, საკრებულოს სხდომა სამშაბათს ჩატარდება.
_ არც გუბერნატორი შემოსულა ბიუროს სხდომაზე?
_ მე რომ ვიყავი, მაშინ არა, მე ცოტა დავაგვიანე და მანამდე თუ იყო, არ ვიცი.
ფრაქცია “ერთიანი ნაციონალური მოძრაობის” თავმჯდომარე თემურ მოქია ბიუროს სხდომას ესწრებოდა და ამბობს, რომ ის შვებულებაშია და არ იცის, ეს რამდენად იყო ბიუროს სხდომა, ან იყო თუ არა (?!): _ ისე აბსოლუტურად ყველა იყო ბიუროს წევრი. იყო გამგებლის კანდიდატურაზე საუბარი, მაგრამ გადაწყვეტილება როგორც ასეთი, არ მიღებულა. ეს ჩვენი კომპეტენციაც არ არის. დიახ, ვადასტურებ, რომ ილოს კანდიდატურაზე იყო საუბარი, _ გვითხრა სატელეფონო საუბარში მოქიამ. სოფლის მეურნეობის კომისიის თავმჯდომარემ, ვალია გირკელიძემ გვითხრა, რომ ბიუროს სხდომა წინასწარ იყო დაგეგმილი და “ორი-სამი” კანდიდატურაც დასახელდა. ამბობს, რომ ისიც სხვების მსგავსად, დაგვიანებით მივიდა სხდომაზე.
“გურია ნიუსი” შეეცადა ფრაქცია “მაჟორიტარების” თავმჯდომარეს, ხვიჩა კილაძეს და ინფრასტრუქტურის განვითარების კომისიის თავმჯდომარეს თამაზ სალუქვაძეს დაკავშირებოდა, თუმცა, ხალხის რჩეულნი, სამუშაო საათებში, “რატომღაც” მიუწვდომელნი აღმოჩნდნენ. კოლეგებისაგან განსხვავებით, იურიდიულ საკითხთა კომისიის თავმჯდომარის, პეტრე სალუქვაძის ტელეფონი ქრონიკულად იყო დაკავებული.
ფრაქცია “ქრისტიან-დემოკრატების” თავმჯდომარე კახა ღლონტი სხდომას არ ესწრებოდა და როგორც თავად ამბობს, არც ინფორმირებული იყო: _ არ ვიყავი აქეთ და არც არავის დაურეკავს ჩემთვის, _ გვითხრა სატელეფონო საუბარში ღლონტმა.
როგორც საკრებულოს თანამშრომელი, გივი ყაზაიშვილი გვეუბნება, არაოფიციალური სხდომა ჩატარდა და შესაბამისად, არც სხდომის ოქმი არსებობს.
10 აგვისტოდან, ოზურგეთის მუნიციპალიტეტის გამგებლის მოვალეობას ლავრენტი ქვილორია ასრულებს _ გამგებლის მოვალეობის შესრულება მას ოზურგეთის მუნიციპალიტეტის საკრებულოს თავმჯდომარის, ალეკო მამეშვილის #103 ბრძანების საფუძველზე დაეკისრა. საშტატო განრიგის თანახმად, ოზურგეთის მუნიციპალიტეტის გამგებელს სულ სამი მოადგილე ჰყავს: ინფრასტურქტურის საკითხებს მიხეილ გოგოტიშვილი კურირებს, სოფლის მეურნეობის საკითხებს _ ლაშა ღლონტი, ხოლო ქვილორია, ამ დრომდე სოციალურ საკითხებს აგვარებდა. თუმცა, ოფიციალურ წერილში, რომელიც გამგებლის დაკავებიდან მეხუთე დღეს საკრებულოდან მივიღეთ, ვკითხულობთ, რომ ოზურგეთის მუნიციპალიტეტის საკრებულოში მიმდინარეობს ოზურგეთის მუნიციპალიტეტის გამგებლის სამსახურებრივი უფლებამოსილების შეჩერების თაობაზე, სასამართლოს გამამტყუნებელი განაჩენის კანონიერ ძალაში შესვლამდე, შესაბამისი გადაწყვეტილების გაფორმება. სწორედ ამის შემდეგ, საკრებულოს გადაწყვეტილებით, გამგებლის ერთ-ერთ მოადგილეს დაეკისრება გამგებლის მოვალეობის შესრულება. წერილი 9 აგვისტოთი თარიღდება და მას ხელს ალეკო მამეშვილი აწერს.
როგორც თვითმმართველობის საკითხებში ექსპერტი კონსტანტინე კანდელაკი განმარტავს, გამგებლის (მერის) არყოფნისას, მის მიერ უფლებამოსილების გახორციელების შეუძლებლობისას, თანამდებობიდან მისი გადადგომისას, ან გათავისუფლებისას, გამგებლის (მერის) მოვალეობას საკრებულოს თავმჯდომარის დავალებით ასრულებს გამგებლის (მერის) მოადგილე.
