მეუფემ წირვის დასრულების შემდეგ, მრევლს მიმართა და ბრძანა, რომ დაუშვებელია სასულიერო პირების ლანძღვა. მეუფის თქმით, ქვეყნის გამთლიანებისთვის ერის და ბერის ერთად დგომაა საჭირო.
წირვის დამთავრების შემდეგ, სტუმრებმა სპეციალურად მოწყობილ სცენასთან გადაინაცვლეს.
დღესასწაულისადმი მიძღვნილი კონცერტი მართლაც კარგი გამოვიდა. სცენაზე ერთმანეთს ენაცვლებოდნენ ჩოხატაურის მუნიციპალიტეტის კულტურის ცენტრთან არსებული ანსამბლები “გურია” და “ნართი”, “ჯეოსტარის” აღმოჩენად წოდებული, “ოქროს გოგოდ” შეფასებული ეთო ბერძენიშვილი, ანსამბლი “გორდელა” და “ნიკოლშოუ”. ყველა გამომსვლელს მაყურებელი ოვაციებით შეხვდა. დამსწრე საზოგადოება კარგად გაერთო და მშვენიერ რეპერტუარშიც ხალისით ჩაერთო. ღონისძიების პარალელურად, სპეციალურად მოწყობილ ფაცხებში ხალხური რეწვის ნიმუშების გამოფენა-გაყიდვა მიმდინარეობდა.
მოეწყო სპორტული შეჯიბრი. მკლავჭიდში პირველობა არავის დაუთმო ჩოხატაურელმა გოგა ჭიხვარიამ. ქართულ ჭიდაობაში, სამბოში მსოფლიო ჩემპიონმა, ვახო ზოიძემ იმარჯვა და ბახმაროს ფალავნის ტიტული ღირსეულად მოიპოვა.
ღონისძიება, რომელიც 19 აგვისტოს მართლაც იქცა სახალხო დღესასწაულად, ტრადიციულმა დოღმა დაასრულა. სხვადასხვა დისტანციაზე რბოლაში საქართველოს სხვადასხვა კუთხის მოჯირითეები მონაწილეობდნენ. საინტერესოა, რომ გამარჯვებული ბედაურების უმრავლესობას სახელად “ვასკა” ერქვა. 1-კილომეტრიან შეჯიბრში, გამარჯვება ჩოხატაურის მუნიციპალიტეტის კულტურის ცენტრის ცხენს “კულტურას” ერგო, რომლის ჟოკეი თემურ ჭელიძე იყო. 2-კილომეტრიან დოღში თემურ ირემაძემ იმარჯვა, სოფელ ზოტიდან, რომელიც შეჯიბრში ცხენით “ვასკა” გამოდიოდა. 3-კილომეტრიანში, ოზურგეთის მუნიციპალიტეტის სოფელ ვაკიჯვრის მცხოვრებმა დავით მდინარაძემ (ცხენით “ვასკა”) მოიპოვა გამარჯვება. 4-კილომეტრიანი მონაკვეთი კი, ხულოელმა ჯემალ გიორგაძემ მოიგო, რომლის ცხენსაც, ასევე “ვასკა” ერქვა!
გამარჯვებულებს სხვადასხვა პრიზები გადაეცათ. “გურია ნიუსის” სპეციალური პრიზი, 3-კილომეტრიან დოღში გამარჯვებულ დავით მდინარაძეს გადაეცა.
