საკრებულოს საინფორმაციო დაფაზე გამოკრული დღის წესრიგის თანახმად, დეპუტატები სულ ოთხ საკითხს განიხილავენ. აღსანიშნავია, რომ დღის წესრიგი საინფორმაციო დაფაზე მხოლოდ მას შემდეგ გამოაკრეს, როცა “გურია ნიუსი” რიგგარეშე სხდომაზე განსახილველი საკითხებით დაინტერესდა.
პირველი და ყველაზე მნიშვნელოვანი საკითხი, რომელსაც საკრებულოს წევრები მოისმენენ და ძალიან მაღალი ალბათობით ხმათა უმრავლესობით მხარს დაუჭერენ, ეს ოზურგეთის მუნიციპალიტეტის გამგებლის მოვალეობის შემსრულებლად ილია ვაშაყმაძის დანიშვნაა.
როგორც დღის წესრიგში ვკითხულობთ, პირველი საკითხი ოზურგეთის მუნიციპალიტეტის საკრებულოს თავმჯდომარისთვის მუნიციპალიტეტის გამგებლის თანამდებობაზე მოვალეობის შემსრულებლის დანიშვნაზე თანხმობის მიცემის შესახებ ოზურგეთის მუნიციპალიტეტის საკრებულოს განკარგულების დამტკიცებაა, მეორე საკითხად კი უკვე ილია ვაშაყმაძის საკრებულოს წევრობის უფლებამოსილების ვადამდე შეწყვეტას განიხილავენ.
არადა, კანონის თანახმად, ჯერ დეპუტატს ჯერ უფლებამოსილება უნდა შეუწყდეს, შემდეგ დაინიშნოს თანამდებობაზე.
როგორც საკრებულოს იურიდიული განყოფილების უფროსმა ლაშა თავაძემ გვითხრა, გამგებლის მოვალეობის შემსრულებლის დანიშვნის დროს, საჯარო სამსახურის შესახებ საქართველოს კანონის 23-ე მუხლის მე-2 პუნქტის ა ქვეპუნქტს გამოიყენებენ.
_ ბატონო ლაშა, როგორც იურისტები ამბობენ, ადგილობრივი თვითმმართველობის შესახებ ორგანული კანონი იერარქიულად მაღლა დგას, ვიდრე საჯარო სამსახურის შესახებ კანონი.
_ თვითმმართველობის კანონში წერია, რომ გამგებლის არყოფნის დროს მისი მოადგილე ასრულებს მოვალეობას.
_ დიახ, მაგას ვგულისხმობ.
_ დიახ, მაგრამ როცა მოადგილე უარს აცხადებს გამგებლის მოვალეობის შესრულებაზე, მაშინ?
_ ხომ ჰყავს კიდევ ორი მოადგილე? მათაც უარი განაცხადეს?
_ ისინიც უარს ამბობენ.
ამის შემდეგ, საკრებულოს საჯარო ინფორმაციაზე პასუხისმგებელ პირს მივწერეთ და მოვითხოვეთ გამგებლის მოვალეობის შემსრულებლის განცხადების ასლი, სადაც ქვილორია უარს ამბობდა მოვალეობის შესრულებაზე. ამასთანავე, გარდა ქვილორიას განცხადებისა, ვითხოვეთ, მოეწოდებინათ კიდევ ორი მოადგილის _ მიხეილ გოგოტიშვილის და ლაშა ღლონტის წერილობითი განცხადების ასლი, რომელშიც იქნებოდა მითითებული, რომ ისინიც უარს ამბობენ გამგებლის მოვალეობის შესრულებაზე.
ქვილორია საკრებულოს თავმჯდომარეს 18 აგვისტოს სთხოვს, მოუხსნას დაკისრებული მოვალეობა, რომელზეც, რაღა თქმა უნდა, მამეშვილს უარი არ უთქვამს. როგორც ჩვენი წყარო ამბობს, განცხადების დაწერა ქვილორიას ბიუროს სხდომის ჩატარების შემდეგ “აიძულეს”.
თუმცა, საკრებულომ ვერ მოგვაწოდა გოგოტიშვილის და ღლონტის განცხადებების ასლი. 22 აგვისტოს სამუშაო საათები ისე დასრულდა, რომ კანცელარიაში მათ განცხადება არ შეუტანიათ, სადაც აღნიშნული იქნებოდა, რომ ისინი ვერ შეასრულებდნენ გამგებლის მოვალეობას. თუმცა რა მოტივით დაწერდნენ განცხადებას, როცა მათთვის მსგავსი არავის შეუთავაზებია?!
როგორც თვითმმართველობის საკითხებში ექსპერტი კონსტანტინე კანდელაკი განმარტავს, “გამგებლის (მერის) არყოფნისას, მის მიერ უფლებამოსილების გახორციელების შეუძლებლობისას, თანამდებობიდან მისი გადადგომისას, ან გათავისუფლებისას, გამგებლის (მერის) მოვალეობას საკრებულოს თავმჯდომარის დავალებით ასრულებს გამგებლის (მერის) მოადგილე”.
