“ხალხს ეუბნებიან, რომ მოგვცემენ ასიათასებს, მილიონებს. ნაციონალები უდგანან ამას ყველაფერს სათავეში და ხალხი გაუცნობიერებლად გამოდის ქუჩაში. ერთი ოთარ იაკობაძეა აქ, დაინტერესებული პიროვნება, რომელიც აბუნტებდა ხალხს, დადიოდა კარდაკარ და ხალხი გაუცნობიერებლად გამოიყვანა. იქვე ჭალაში ვმუშაობდი და შემთხვევით მივედი, თორემ ისე აქციაზე არც მივსულვარ.”-ამბობს შავაძე.
მისი თქმით პოლიცია ხალხის მიერ ბლოკირებული გზის გახსნას ცდილობდა, ცემა და მიზანმიმართული ძალადობა მათი მხრიდან არ ყოფილა.
“იქ იყო ვაგონი, სადაც მშენებლობა უნდა დაწყებულიყო. ხალხმა ჩაკეტა გზა, რომ არ უნდა შეეშვათ ტრაქტორი. ხოდა პოლიციამ ეს ვაგონი გადააგორა გვერდით ანუ გზა გაუთავისუფლა ტექნიკას. ამან გამოიწვია ხალხის წინააღმდეგობა. ხალხი ითხოვს კომპენსაციებს. მოკლედ ვისაც ეკუთვნოდა ეს ფული, კომპანიამ გადაუხადა, მაგრამ ვისაც არ ეკუთვნის, სურვილი აქვს რომ სარგებელს როგორმე გამოკრას ხელი. ეს არის ამ ხალხის მღელვარების მიზეზი, რომ ბოლოსდაბოლოს ბათუმისკენ ან დასავლეთ საქართველოს რომელიმე ქალაქში გადაგვასახლონ. ვის არ უნდა ქალაქში ცხოვრება? აქციის ორგანიზატორ იაკობაძეზე ამბობენ, რომ ნაციონალური მოძრაობის წევრია, ზუსტად არ ვიცი მაგ ამბავი, მაგრამ ძალიან გათვითცნობიერებულია, ტელევიზიებში რეკავს, ყველაფრის მეთაური და თავიდათავია.
-თქვენ ამბობთ, რომ ნაციონალებმა სოფელში ამდენი ხალხის გამოყვანა შეძლეს?
– აქციაზე დანარჩენი სოფლებიდან მოგროვდა ხალხი, გაჭირვებული სოფლებია მაღალმთიან აჭარაში, ყველას უნდა ქალაქში ცხოვრება, ბინის ყიდვა და რადგან თქვეს, რომ ამდენ მილიონებს იხდიან, რატო ჩვენ არ გვაძლევენო და ასეთი ცუდი ამინდის მიუხედავად ჩამოვიდნე რომ ეგებ ბინის ფულს გამოვკრათ ხელიო.
-ის ვინც უკვე აიღო კომპენსაცია, კმაყოფილია?
– რატომ არ უნდა იყვნენ კმაყოფილები? მეორეხარისხოვან მიწებში, როგორიცაა ტყისპირა, მდინარისპირა ადგილები, საძოვრებადაც რომ არ გამოიყენებოდა ასეთ ხრიოკ მიწებში ხალხმა 20, 30 და ზოგმა 100 ათასი ლარიც კი აიღო.
-გავრცელდა ინფორმაცია, რომ პოლიციამ ბავშვებს და ქალებს სცემა,
_ ბავშვები საერთოდ არ ყოფილან აქციაზე და ხალხის ცემისა რა მოგახსენო, გაზვიადებულია ყველაფერი. უბრალოდ ხალხმა შექმნა ისეთი სიტუაცია, ანუ ვაგონი რომ გადაჰქონდა პოლიციას, ამ დროს შეიქმნა აჟიოტაჟი. ვიღაცამ უთხრა ამ ხალხს, რომ სვანებს ფულს დაპირდნენ, მალე ისინი მილიონერები გახდებიან და აგენსაც ბევრი ფული უნდათ. არანაირი ძალადობა არ ყოფილა ხალხი თვითონ წიოკობდა, კიოდა, 8 მარტიაო და ასე რატომ გვექცევითო, პოლიციის მხრიდან ძალადობა არ ყოფილა.
“გურია ნიუსი” “ნაციონალური მოძრაობის” წევრს ირაკლი თავართქილაძეს დაუკავშირდა, რომელიც დღევანდელ აქციასთან პარტიის კავშირს უარყოფს.
“ნაციონალებმა ეს ამბავი საღამოს გავიგეთ, ჩვენი წარმომადგენლები საერთოდ არ მისულან იქ. ერთი კომენტარიც კი არ გაკეთებულა ადგილზე. საღამოს 6 საათზე, როცა ყველაფერი უკვე ჩავლილი იყო, პარტიის ოფისში გაკეთდა კომენტარი. ადამიანები დააპატიმრეს და უბრალოდ ამ მეთოდით ქალბატონებს 8 მარტი მიულოცეს. ეს იყო და ეს.
_ პოლიცია ხალხზე მიზანმიმართულად ძალადობდა?
_ ამ შეხლა-შემოხლის დროს რამდენიმე ადამიანი დაზიანდა. რომ გითხრათ, რომ ვინმეს იარაღი მოხვდა, ნამდვილად არ ყოფილა. მიზანმიმართულ დარბევაზე პირდაპირ საუბრობს კალაძის მოადგილე ილია ელოშვილი ინტერვიუში, როცა ამბობს, რომ ძალისმიერი მეთოდით მოხდა გზის გახსნაო. როცა ადამიანი არ იწევა და შენ ცდილობ გაწიო გვერდზე, მაშინ რა თქმა უნდა, ვიღაცას ხელი დაუზიანდება და ვიღაცას გული შეუწუხდება.
_ იაკობაძე თქვენი პარტიის წევრია?
_ იაკობაძე საერთოდ არაა ჩვენი პარტიის წევრი, ის პოლიტიკურად პირიქით ოპონენტ ბანაკშია. ის სოფლის მცხოვრებია, პედაგოგია და ადრეც აპროტესტებდა ჰესის მშენებლობას. ეხლა რაც ხდება, ყველაფრის ნაციონალებისთვის მიწერა უნდათ და ესეც არაა ეს ქვეყანა ჩალით დაფარული.
“გურია ნიუსი” ხულოს გამგებელ ბესიკ ბაუჩაძეს დაუკავშირდა, რომელიც ამტკიცებს, რომ შეხლა-შემოხლას ადგილი არ ჰქონია.”ჩემი იქ ყოფნის პერიოდში ასეთი სიტუაცია არ ყოფილა. უბრალოდ ხალხი აპროტესტებდა მშენებელი კომპანიის ტერიტორიაზე შესვლას”-ამბობს გამგებელი.
დღეს, ხულოს მუნიციპალიტეტის სოფელ ღურტას მოსახლეობა მთავრობის წარმომადგენლებს დაუპირისპირდა. სოფლის მოსახლეობა აჭარის მთავრობის თავმჯდომარე არჩილ ხაბაძეს, ენერგეტიკის მინისტრის მოადგილე ილია ელოშვილს და გარემოს დაცვის თანამშრომლებს იმ ტერიტორიის დათვალიერების საშუალებას არ აძლევდნენ, სადაც ჰესის მშენებლობა უნდა დაიწყოს. საპატრულო პოლიციის ჩარევის შედეგად გზა გახსნეს და მთავრობის წევრებს ჰესის ტერიტორიაზე შესვლის საშუალება მიეცათ.
“გურია ნიუსი” შეეცადა ოთარ იკობაძესაც დაკავშირებოდა, მაგრამ ვერ მოვახერხეთ ამ ეტაპზე.
(მასალაში გამოყენებულია “ბათუმელების” ფოტო)
