_ ასეთი იყო 2 წლის წინ ხელისუფლების პასუხი ოზურგეთში, ჯორჯიაშვილის ქუჩის მცხოვრებლების კითხვაზე, თუ რატომ არ შეჰყავთ არანაირი კომუნიკაცია ჯორჯიაშვილის ქუჩის უკანასკნელ ოთხ საცხოვრებელ კორპუსში. არადა, თვალისთვის შეუმჩნეველი იქ ნამდვილად არაფერია და ხუთსართულიან საცხოვრებელ კორპუსს კი არა, ზემოხსენებულ ძროხასაც მარტივად შეამჩნევს კაცი.
25 აგვისტოს, “გურია ნიუსის” რედაქციის ოზურგეთის განყოფილებას ჯორჯიაშვილის ქუჩის მცხოვრებმა მიმართა და დახმარება ითხოვა. ჩვენც ადგილზე გავეცანით არსებულ ვითარებას.
არსენა ჯორჯიაშვილის ქუჩის #55ა ნომერთან “გაზიფიცირებული, განათებული და გაბრწყინებული” საქართველო მთავრდება და შუქის გარდა, ყველანაირ კომუნიკაციას მოკლებული დასახლება იწყება. გაცდებით თუ არა 55ა-ს, რიგრიგობით შემოგხვდებათ შეწყვეტილი გაზის და წყლის მილები, გარე განათების უფუნქციო ბოძები. ჩამოთვლილთაგან მხოლოდ გარე განათების ორი ბოძი აღწევს ოთხი კორპუსიდან ორამდე. გასავლელად შეუძლებელ და უვარგის სამანქანო გზას ჯერ კიდევ საბჭოთადროინდელი პანსიონატის ნანგრევებთან მივყავართ, რომელიც, მოსახლეობის თქმით, ქვეწარმავლების მუდმივი სამყოფი და საშიში კერაა. ნანგრევების გავლის შემდეგ, მიადგებით კიდევ ორ საცხოვრებელ კორპუსს, სადაც პრობლემებით დაღლილი და შეწუხებული მოსახლეობა ცხოვრობს.
საერთო საცხოვრებელში მცხოვრებ ოცამდე ოჯახს სახლში წყლის ატანა ეზოდან უწევს, სამაგიეროდ, წყლის დიდი რაოდენობა აქვთ სახლის სახურავზე _ საქმე ისაა, რომ სახლი ჰორიზონტალურადაა დახურული, სანიაღვრე მილები კი სახურავზე დასხმულმა და შემდგომ უკვე გამდნარმა გუდრონმა დააზიანა და ჩაზნექილ სახურავზე წყლის გუბეები გაჩნდა. წყალი ჩადის საცხოვრებელ ბინებშიც და აზიანებს კედლებს _ სადარბაზოს დათვალიერებისას მარტივად შეამჩნევთ ჩამორეცხილ და სოკოსგან დაზიანებულ კედლებს, რაც სახლს დანგრევით ემუქრება. საცხოვრებელი კორპუსი ამერიკული თეთრი პეპლების შემოსევასაც განიცდის _ მთლიანად განადგურებულია ეზოში გაშენებული ხეხილი. როგორც ადგილობრივები ამბობენ, ამერიკული პეპლების ჭარბი რაოდენობა ვითარებას კიდევ უფრო ამძიმებს და ფაქტობრივად, ფანჯრის გაღების საშუალებასაც კი არ იძლევა: “შარშან ეს მაინც შეწამლეს, წელს კი იმავე ადგილას შეწყვიტეს შეწამვლა, სადაც, ზოგადად, ყველა კომუნიკაციას წყვეტენ”, _ გვითხრეს იქაურებმა.
მოსახლეობა ადგილობრივ ხელისუფლებას უკანასკნელ არჩევნებს ახსენებს და დაპირების შეუსრულებლობაში ადანაშაულებს: “ორი წლის წინ, ადგილობრივი ხელისუფლების წარმომადგენლები მოვიდნენ. ეს ერთი დღე დაგვეხმარეთ, მოდით არჩევნებზე და გპირდებით, ერთი კვირის შემდეგ დავიწყებთ მუშაობასო, შეგვპირდნენ მაშინ, თუმცა, იმ დღიდან ორი წელი გავიდა და არავინ გამოჩენილა”.
მათივე ინფორმაციით, ამ დაპირების შემდეგ, ოზურგეთის მუნიციპალიტეტის გამგეობას განცხადებით ორჯერ მიმართეს, თუმცა მათგან პასუხად არაფერი მიუღიათ.
26 აგვისტოს, ჯორჯიაშვილის ქუჩის მცხოვრებლებმა ოზურგეთის მუნიციპალიტეტის გამგებლის მოვალეობის შემსრულებელს, ილია ვაშაყმაძეს მიმართეს. ვაშაყმაძემ ჯორჯიაშვილის ქუჩის წარმომადგენლები მიიღო და მაქსიმუმ ორი დღის ვადაში მდგომარეობის ადგილზე შესწავლას დაჰპირდა: “მე რომ ყველაფრის დაუყონებლივ მოგვარებას დაგპირდეთ, ტყუილი იქნება. დღეს ან ხვალ კომპეტენტურ პირებთან ერთად მოვალ თქვენთან და შევაფასებთ ვითარებას. მხოლოდ ამ შემთხვევაში შევძლებთ სამომავლო გეგმებზე საუბარს”, _ უთხრა ილია ვაშაყმაძემ მოსახლეობას.
გამგებლის მოვალეობის შემსრულებლისგან განსხვავებით, მოსახლეობას კონკრეტული დაპირება მისცა გამგებლის მოადგილემ, მიხეილ გოგოტიშვილმა და გარე განათების პრობლემის მოგვარებას უახლოეს მომავალში დაჰპირდა.
ვაშაყმაძის კაბინეტიდან გამოსული მოსახლეობა “გურია ნიუსთან” საუბრისას იმედს გამოთქვამს, რომ დაპირება მხოლოდ დაპირებად არ დარჩება და სიტყვას ამჯერად საქმე მოჰყვება: “ანალოგიური სიტყვები ჩვენ ორი წლის წინაც მოვისმინეთ, მაგრამ შედეგი არ მოჰყოლია. იქნებ, ახლა მაინც დავაღწიოთ თავი ამ გაუსაძლის ყოფას”, _ იმედი ჩაესახათ გამგეობიდან გამოსულ მოქალაქეებს.
