პირველი, ვინც აღნიშნული რევოლუციის შემდეგ გურიის პირველი პოლიციელი, ვიქტორ გობრონიძე შეცვალა, ნესტორ მიქატაძე იყო. მიქატაძე ძალიან მოკლე დროში ლანჩხუთელმა გელა გიგინეიშვილმა ჩაანაცვლა. გიგინეიშვილი თბილისელმა ბესო გელენიძემ შეცვალა, გელენიძე _ ოზურგეთელმა შალვა ბოლქვაძემ. ეს უკანასკნელი კი _ ასევე ოზურგეთელმა შოთა ჭანუყვაძემ. ჭანუყვაძეს წარმოშობით ლანჩხუთელი გიორგი ჯაფარიძე შეენაცვლა. აღნიშნული პოსტი დავით ცირეკიძემ გასულ კვირას დაიკავა.
გურიის სამხარეო მთავარი სამმართველოს ახალდანიშნული უფროსი, 30 წლის ცირეკიძე ჯერ იმერეთის, რაჭა-ლეჩხუმის და ქვემო სვანეთის მთავარი სამმართველოს ზესტაფონის რაიონული სამმართველოს უფროსი იყო, ბოლოს კი ქუთაისის საქალაქო სამმართველოს ხელმძღვანელობდა.
იგი სამსახურში პირველად 14 სექტემბერს გამოცხადდა. მას მასპინძლობა უკვე ყოფილმა უფროსმა, გიორგი ჯაფარიძემ გაუწია. ცირეკიძემ სამხარეო პოლიციის შენობაში სულ რამდენიმე წუთი დაჰყო, თვალი გადაავლო ახალ სამსახურს და იქაურობა მალევე დატოვა. მანამდე კი გურიის გუბერნატორს, ვალერი ჩიტაიშვილს, მის მოადგილეებს, ოზურგეთის მუნიციპალიტეტის საკრებულოს თავმჯდომარეს და მუნიციპალიტეტის გამგებელს შეხვდა. გურიის ჩინოვნიკებთან ახალდანიშნული დავით ცირეკიძე ხუთი წუთით შეჩერდა და შემდეგ გეზი პოლიციის გამჭვირვალე შენობისკენ აიღო.
წინამორბედისგან განსხვავებით, დავით ცირეკიძე “ღარიბად არ იხსენება”. როგორც “გურია ნიუსი” წერდა, გურული სამართალდამცავების ქონება, ქონებრივი და ფინანსური მდგომარეობის დეკლარაციების თანახმად, არც თუ ისე შთამბეჭდავი იყო _ თუ აღნიშნულ დოკუმენტებს დავეყრდნობოდით, საკუთარი სახლი არც ერთ მაღალჩინოსან პოლიციელს არ გააჩნდა.
დავით ცირეკიძე 1981 წლის 24 ივნისს, თბილისში დაიბადა. ჰყავს მეუღლე, თეა თარგამაძე და ორი ვაჟიშვილი _ ათი წლის ლუკა და ოთხი წლის ნიკა.
ქონებრივი და ფინანსური მდგომარეობის შესახებ დეკლარაცია, დავით ცირეკიძემ ბოლოს, 2011 წლის 12 მაისს, შინაგან საქმეთა სამინისტროს იმერეთის, რაჭა-ლეჩხუმის და ქვემო სვანეთის სამხარეო მთავარი სამმართველოს ქუთაისის საქალაქო სამმართველოს უფროსის რანგში შეავსო.
დეკლარაციის შევსების მომენტში, ცირეკიძის სახელზე ირიცხებოდა საცხოვრებელი ბინა თბილისში, ალექსანდრე ყაზბეგის ქუჩაზე, ფართი 80 კვადრატული მეტრი, ხოლო მისი მეუღლის სახელზე ასევე თბილისში, წერეთლის გამზირზე ბინა _ ფართით 150 კვადრატული მეტრი.
ცირეკიძეს ჰყავს საკუთარი ავტომანქანა Mercedes Benc SLK, 2001. ფლობს ცეცხლსასროლ იარაღს Stechkin, რომლის საბაზრო ღირებულებაც ჩვენ მიერ მოპოვებული ინფორმაციით, 3 000-დან 4 000-მდე ლარის ფარგლებში მერყეობს. თუმცა, არის განსხვავება იარაღის გამოშვების წლებს შორის _ რაც უფრო ძველია, მისი ფასი ბევრად აღემატება ზემოთ აღნიშნულ საბაზრო ღირებულებას.
12 მაისის მდგომარეობით, მის პირად ანგარიშზე საქართველოს ბანკში ხელფასის ნაშთი 500 ლარი ირიცხებოდა, ხოლო “თი ბი სი” ბანკში საკრედიტო ნაშთი _ 2 000 ლარი.
ცირეკიძის შემოსავალმა ზესტაფონის პოლიციის უფროსის თანამდებობაზე 37 960 ლარი და 85 თეთრი შეადგინა. გასავალმა კი საქართველოს ბანკში აღებული 10 000 ამერიკული დოლარის პროცენტის დასაფარავად, _ 2860 ამერიკული დოლარი და 92 ცენტი.
მოსახლეობას, ანუ დამქირავებელს, უფლება აქვს, იცოდეს და აკონტროლოს მისი ჯიბიდან ხელფასგადახდილი მაღალჩინოსნების ქონებრივი შემოსავლების დინამიკა, ანუ რას ფლობდნენ ისინი თანამდებობებზე მოსვლამდე და რას წაიღებენ წასვლის შემდეგ. თუ რა წაიღო გასულ კვირას სამსახურიდან გათავისუფლებულმა ჯაფარიძემ, ჯერჯერობით, ისევე უცნობია, როგორც მისი გათავისუფლების მიზეზი. თუმცა, ის ვალდებულია, საჯარო სამსახურში ინტერესთა შეუთავსებლობისა და კორუფციის შესახებ კანონის თანახმად, თანამდებობის დატოვებიდან ორი თვის ვადაში შეავსოს და წარადგინოს დეკლარაცია ქონებრივი მდგომარეობის შესახებ.
