"ლალი მოროშკინას საფრანგეთმა პოლიტიკური თავშესაფარი შესთავაზა, რაზედაც მან უარი განაცხადა. ჩვენ არაერთი შეხვედრა გვქონდა საფრანგეთში, მათ შორის წამების კომისიაშიც, სადაც ლალის მოუსმინეს და მისი საქმით დაინტერესდნენ", _ ამის შესახებ რადიო "ფრანსის" ჟურნალისტმა გიორგი ფოფხაძემ განაცხადა.
"გურია ნიუსი" ლალი მოროშკინას პარიზში დაუკავშირდა. ის ადასტურებს მის მიერ საფრანგეთის შეთავაზებაზე უარის თქმას და რამდენიმე დღეში საქართველოში დაბრუნებას გეგმავს.
"ვადასტურებ, რომ მივიღე წინადადება პოლიტიკურ თავშესაფარზე, რადგან ძალიან სერიოზული საბუთები წარვადგინე იმ სამართალდარღვევებზე, რასაც ადგილი აქვს სასჯელაღსრულების დეპარტამენტში. ამ ეტაპზე უარს ვაცხადებ პოლიტიკურ თავშესაფარზე, რადგან მიმაჩნია რომ 2-3 გარეწრის, ბიუჯეტის ქურდის და “ოცნებაში” გადმოპორტირებული ნაც.ზონდერის გამო, არ მსურს უარი ვთქვა საკუთარ სამშობლოზე", _ ამბობს მოროშკინა „გურია ნიუსთან“.
მისივე თქმით, ის კორუმპირებული ჩინოვნიკების წინააღმდეგ ბრძოლას გააგრძელებს და უკანონოდ მითვისებული მილიონების უკან დაბრუნებას აიძულებს.
"იმ კვირაში სოზარ სუბარის საბოლოო პასუხი მექნება და ამის მიხედვით გავაგრძელებ ბრძოლას. ვფიქრობ, რომ პენიტენციური სისტემა ერთხელ და საბოლოოდ უნდა გაიწმინდოს უმეცარი, გაღორებული, სადისტი ადამიანებისგან. იმედია, დარბაისელს დააბრუნებინებენ 3 კვირაში 3 მილიონამდე გახარჯულ საბიუჯეტო თანხებს, რომელიც ქალთა დაწესებულებაში პირადი პაემნების ოთახების აშენებას უნდა მოხმარებოდა. ჩვენს პატიმარ ქალბატონებს არ აქვთ საშუალება მეუღლეებთან და შვილებთან ერთად ღამე გაატარონ, რადგან ამ ჰუმანური იდეის განსახორციელებლად გამოყოფილი ფული დარბაისელმა შთანთქა. ვაკის პოლიციას კი მოუწევს პასუხს გაცემა რატომ არ არის რეაგირება ჩემს საჩივრებზე", _ ამბობს მოროშკინა, რომელიც ივლისის ბოლოს კიდევ ერთხელ შეხვდება წამების კომიტეტის თავმჯდომარეს.
"დიდი მადლობა საფრანგეთს, ნამდვილად დიდი პატივი იყო მათი მხრიდან ასეთი შეთავაზება, მაგრამ მე კომფორტის სანაცვლოდ ბრძოლის ველს არ დავტოვებ! საფრანგეთმა მომცა საშუალება დაუბრკოლებელი, გრძელვადიანი ვიზიტები განვახორციელო ევროკავშირის უფლებადამცველ სტრუქტურებში", _ ამბობს სასჯელაღსრულების დეპარტამენტის ყოფილი მრჩეველი.
ლალი მოროშკინა სასჯელაღსრულების დეპარტამენტის მრჩევლის თანამდებობიდან დეპარტამენტის ყოფილმა თავმჯდომარემ დიმიტრი დარბაისელმა მას შემდეგ გაათავისუფლა, რაც ამ უკანასკნელმა გასული წლის დეკემბერში დეპარტამენტში არასდეკვატურად მაღალი პრემიების გაცემა გააპროტესტა.
