საქართველოს ყოფილი პრეზიდენტი ედუარდ შევარდნაძე 86 წლის ასაკში დღეს გარდაიცვალა.
ამის შესახებ ინფორმაცია "გურია ნიუსს" ყოფილი პრეზიდენტის პრესსამსახურში დაუდასტურეს.
"გავრცელებული ინფორმაცია, სამწუხაროდ, სიმართლეა. ბატონი ედუარდი დღეს დილით, 12 საათზე ძალიან მძიმე ავადმყოფობის შედეგად გარდაიცვალა", _ გვითხრეს ყოფილი პრეზიდენტის პრესსამსახურში.
ედუარდ შევარდნაძე 1928 წლის 25 იანვარს, ლანჩხუთის რაიონის სოფელ მამათში დაიბადა.
1959 წელს ქუთაისის ა. წულუკიძის სახელობის პედაგოგიური ინსტიტუტი დაუსწრებლად დაამთავრა. 1972-1985 წლებში საქართველოს ცკ-ს პირველი მდივანი იყო, 1985-1990 წლებში – საბჭოთა კავშირის საგარეო საქმეთა მინისტრი, ხოლო 1995-2003 წლებში საქართველოს პრეზიდენტი.
თანამდებობიდან ის "ვარდების რევოლუციის" შედეგად გადადგა.
პრეზიდენტობის პერიოდში ედუარდ შევარდნაძეზე სამჯერ მოაწყვეს თავდასხმა, მათ შორის 1992 წელს აფხაზეთში, 1995 წელს საქართველოს პარლამენტის შენობის ეზოში, 1998 წელს კი, რეზიდენციისკენ მიმავალ გზაზე.
