კურორტ ბახმაროს, რომელიც ზღვის დონიდან 2250 მეტრზე მდებარეობს, უკვე ათასობით დამსვენებელი სტუმრობს. მიუხედავად მოუწესრიგებელი ინფრასტრუქტურისა (რომლის მოწესრიგებას წლებია, გვპირდებიან) დამსვენებელი ამ მართლაც უნიკალურ კურორტზე უარს ვერ ამბობს. თუმცა, ყოველი სეზონს სერიოზული პრობლემები ახლავს.
წინა წლების მსგავსად პრობლემაა ელექტროენერგიის დროულად მიწოდება:
_ იმის გამო, რომ ელექტროენერგია არასტაბილურად მოგვეწოდება 1500 დოლარი დავკარგე. კოტეჯები მაქვს სატყეოს ქუჩაზე. ყოველ წელს ვაქირავებ და ეს არის ჩემი ოჯახის შემოსავალი. წელს კი ესეც ვერ შევძელი. ამერიკიდან ჩამოვიდა ხალხი დასასვენებლად და სამი დღის მეტი ვერ გაძლო. ელემენტალური პირობები არ არის, _ ამბობს "გურია ნიუსთან“ საუბრისას ნათელა დოლიძე.
მის მსგავსად პრობლემებზე საუბრობენ დამსვენებლები.
_ არცერთი მაღაზია არ მუშაობს. პურსაც ვერ ვყიდულობთ. დაგვეხმარეთ რაიმე, _ ამ ტექსტით "გურია ნიუსს“ რამდენიმე ადამიანი დაუკავშირდა:
_ უკრაინიდან ჩამოვედი დასასვენებლად და მშიერი ვკვდები. ვერც პურს ვყიდულობ, ვერც საჭმელს. ეს რა ხდება. არ არსებობს ამ ქვეყანაში ვინმე, ვინც ამ სიტუაციას მოაგვარებს? _ ამბობს ჩვენთან საუბრისას უკრაინელი ტურისტი.
როგორც გავარკვიეთ, ამის მიზეზი მაღაზიების გაფიცვაა. იმის გამო, რომ კურორტზე ჯეოსელის ანძა გამორთულია, მაღაზიის მფლობელები სალარო აპარატს ვერ ამუშავებენ და, შესაბამისად, მაღაზიები დაკეტილია.
ადგილობრივ ხელისუფლებაში ამ პრობლემაზე არაფერი იცოდნენ. ინფორმაცია არ აღმოაჩნდათ კომპანია "ჯეოსელშიც“.
_ დიდი მადლობა, რომ დაგვირეკეთ და გაგვაგებინეთ. დაიწყო ტექნიკური სამუშაოები და მაქსიმუმ ხვალ ანძა ჩაირთვება, _ აღნიშნეს "გურია ნიუსთან“ საუბრისას ჯეოსელის მარკეტინგის სამსახურში.
სანამ „ჯეოსელი“ ანძას ჩართავს, მანამდე დახმარების მოლოდინში მყოფი დამსვენებლები პურისა და საკვების რიგში დგანან.
_ ყველაფერს გავაკეთებთ, რომ დამსვენებელს პრობლემები არ ჰქონდეს. სანამ ჯეოსელის ანძა ჩაირთვება, მანამდე მოვახერხებთ, რომ კურორტზე საკვები პროდუქტები და პური ავიტანოთ, _ გვითხრეს ჩოხატაურის მუნიციპალიტეტის გამგეობაში.
არადა, ჯერ კიდევ გუშინწინ, ცენტრალური მედიის საშუალებით ხელისუფლება გვაუწყებდა, რომ ბახმარო დამსვენებლის მოლოდინში იყო და პირველად ბახმაროს ისტორიაში სასტუმროც კი გაიხსნა.
ეს ის სასტუმროა, რომელიც 2012 წლის საპარლამენტო არჩევნების წინ "ნაციონალურმა მოძრაობამ“ და მიხეილ სააკაშვილმა ზარზეიმით გახსნა.
მართალია, სასტუმროში, პრეზიდენტის წასვლის შემდეგ ავეჯმაც „ფეხი აიდგა“ და უგზო- უკვლოდ გაუჩინარდა, თუმცა, კაპიტალური რემონტი რომ ძველმა ხელისუფლებამ ჩაუტარა და კურორტზე საკმაოდ მნიშნელოვანი პროექტიც განახორციელა, ეს ფაქტია.
_ ეს სასტუმრო იქნება ბახმაროს სავიზიტო ბარათი, _ განაცხადა მაშინ მიხეილ სააკაშვილმა და იმდროინდელ ინფრასტრუქტურის მინისტრს, რამაზ ნიკოლაიშვილს პროექტის იდეისთვის და გახორციელებისთვის მადლობა გადაუხადა.
ამ ამბებიდან მალე ხელისუფლება შეიცვალა. სასტუმროს ფუნქციონირება არ დაუწყია. „გურია ნიუსი“ ბევრჯერ დაინტერესდა მისი ბედით, თუმცა, ყველა უწყებას სხვადასხვა პასუხი ჰქონდა.
ჩოხატაურის მუნიციპალიტეტის გამგებლის მოვალეობის შემსრულებელი, თამაზ ჯინჭარაძე ამბობდა, რომ გუბერნია მისგან სასტუმროს ექსპლუატაციაში მიღებას ითხოვდა:
_ მე ამ მოთხოვნაზე უარით ვუპასუხე. ბევრი რამ გასარკვევია და ასეთ სიტუაციაში შენობას ექსპლუატაციაში ვერ მივიღებ, _ ამბობდა ჯინჭარაძე.
გურიის იმჟამინდელი გუბერნატორი, ვალერი ჩიტაიშვილი დეტალებს განმარტავდა და აღნიშნავდა, რომ მისთვის უცნობი იყო, რატომ არ გაიხსნა სასტუმრო 2013 წელს.
_ თანხა სამხარეო ადმინისტრაციის ანგარიშზე ჩაირიცხა და ყოველგვარი კანონის დაცვით გახორციელდა მშენებლობა. ამჟამად, სასტუმრო და დანარჩენი ობიექტები, ეკონომიკის სამინისტროს ბალანსზეა, _ ამბობდა ჩვენთან საუბრისას, 2013 წლის ზაფხულში კოჰაბიტაციის რეჟიმში მყოფი გუბერნატორი.
ბახმაროს სასტუმროს რეაბილიტაცია 879 338 ლარი დაჯდა.
ჩვენს კითხვაზე, ვინ და სად წაიღო სასტუმროს ავეჯი 2012 წლის ზაფხულში, ჩიტაიშვილს პასუხი არ ჰქონდა:
_ ვერ დავიჩემებ, მაგრამ არ მახსოვს, რომ ხარჯთაღრიცხვაში ავეჯი ყოფილიყო გათვალისწინებული და ვერაფერს გეტყვით.
_ პრეზიდენტის სტუმრობისას, სასტუმროში ავეჯი და სხვა ინვენტარიც იყო. ნათხოვარი გქონდათ?
_ არ ვიცი, იმ დროს მე იქ არ ვყოფილვარ, _ გვითხრა ჩიტაიშვილმა.
როგორც გავარკვიეთ, წელს ბახმარო იჯარით გაიცა.
აღსანიშნავია, რომ ბახმაროს სასტუმრო პირველი ობიექტი არ არის, რომლის აშენება და გახსნა "ქართულ ოცნებას“ მიეწერა.
რამდენიმე თვის წინ, ოზურგეთში, შსს მინისტრი, ალექსანდრე ჭიკაიძე ამაყად აცხადებდა ტელეკამერების წინ, რომ საპატრულო პოლიციის შენობა გახსნა. არადა, ეს შენობა 4 წელია, აშენებული და გახსნილია და იქ იუსტიციის სამინისტროს დაქვემდებარებული უწყებებია განთავსებული. საპატრულო პოლიციამ აშენებულ და გარემონტებულ შენობაში მხოლოდ ერთი ფლიგელი დაიკავა.
აშენებული შენობების ორ-სამჯერ გახსნა, საზოგადოებისთვის თვალში ნაცრის შეყრა და ახალაშენებულად წარმოჩინება “ნაციონალების“ დროს დანერგილი პრაქტიკაა, რომელსაც როგორც ფაქტები მოწმობს, ეს ხელისუფლებაც კარგად იყენებს.
