წელამდე წყალი და დატბორილი სახლები – ასეთი მდგომარეობა იყო, წუხელ ღამის 3 საათზე დაბა ურეკში.
ურეკში მაცხოვრებლებს მიაჩნიათ, რომ საწრეტი არხები გაწმენდილი არ არის, ამიტომაც გადაუღებელი წვიმები იწვევს სახლების დატბორვას.
ურეკში "გურია ნიუსი" მოსახლეობისა და დამსვენებლების თხოვნით ჩავიდა.
"მერამდენედ ხდება ეს, არ ვიცი. დაკეტილია საწრეტი არხები, არ არის გაწმენდილი, წყალი არსად არ გადის და როგორც კი გადაუღებლად გაწვიმდება, იტბორება სახლები, მაღაზიები, ქუჩები, მუხლამდე წყალში ვიყავით წუხელ მთელი ღამე, დამსვენებლები ლამისაა გაიქცნენ, სანამდე უნდა ვიყოთ ასე? თუ არ მოგვაქცევენ ყურადღებას, იძულებულები ვიქნებით, სხვა ზომებს მივმართოთ. ყოველ წელს გვპირდებიან, ურეკის მოწესრიგებას, მაგრამ არაფერი. შარშან როგორი სიტუაცია იყო სტიქიის დროს და წელს კიდევ არავინ არაფრად არ გვაგდებს. კატეგორიულად მოვითხოვთ, რომ ეს პრობლემა ერთხელ და სამუდამო უნდა მოგვარდეს, ნახეთ რა მდგომარეობა გვაქს მაღაზიაში, სულ წყალში იყო ყველაფერი", _ გვითხრა ანზორი ბოლქვაძემ.
ოზურგეთის მუნიციპალიტეტის სოფელ ნატანებში მცხოვრები ცაცა ბაღათურია ამბობს, რომ წლების განმავლობაში ურეკში ვაჭრობას ეწევა.
"წუხელ ლამის მთელი ურეკი წყალში ცურავდა. კიდევ დიდხანს რომ ეწვიმა, არ ვიცით რა მოხდებოდა. დღეს გადაიღო. საწრეტი არხები სულ დაჭაობებული და ამოუწმენდავია, არავინ არ არის პატრონი ამ საცოდავი ურეკის, ამ გაჭირვებული ხალხის მომკითხავი, სადამდე უნდა გაგრძელდეს ასე? შეხედეთ ცენტრალურ გზებს, ნახეთ შიდა გზები, ქუჩებში წყალი როგორ დგას, რა დავაშავეთ ასეთი? ვითხოვთ ყურადღება მოგვაქციონ", _ გვითხრა ცაცა ბაღათურიამ.
ერთ-ერთი სასტუმროს მეპატრონე გელა ნაცვალაძე ამბობს, რომ შარშან სტიქიამ ძალიან დიდი ზარალი მიაყენა.
მისი თქმით, თითქოს ცოტა მოგვარდა პრობლემა, რადგან გზაზე ხრეში დაყარეს, წელს ისევ ცუდ მდგომარეობაში აღმოჩნდა.
ურეკის რწმუნებული და ამჟამად ახალი მოწვევის საკრებულოს დეპუტატი ბიძინა იმნაიშვილი ამბობს, რომ წუხელ ურეკში სტიქია ნამდვილად იყო.
"გადაუღებლად წვიმდა, მომმართ განცხადებით რამდენიმე ოჯახმა. გასაწმენდი იყო საწრეტი არხები და დროებით ეს პრობლემა მოვაგვარეთ. არხების გაწმენდის საკითხი სპეციალურად შემსწავლელმა კომისიამ უნდა შეისწავლოს, რომ მოხდეს შიდა არხების ამოწმენდა და გაფართოება."
ბატონო ბიძინა, ხედავთ თუ არა გამოსავლს ამ ეტაპზე?
_ უნდაამოიწმინდოს მთელ ტერიტორიაზე საწრეტი არხები, რომელიც კომუნისტების დროიდან არ ამოწმენდილა. შარშან გაწმინდეს რამდენიმე ასეული მეტრი. ურეკი არის ჭაობიანი, ეს პრობლემა წლებია უკვე არსებობს.
_მოხდება თუ არა წელს ამ პრობლემის მოგვარება?
_წელს ვერ გეტყვით რამდენად მოხდება ამ პრობლემების მოგვარება. არ მაქვს ინფორმაცია, რომ ასეთი მასშტაბური ღონისძიებები გატარდეს, ეს ძალიან დიდ თანხებთან არის დაკავშირებული. მცირე სამუშაოები ჩვენ დღესაც შევასრულეთ.
