საქართველოს კულტურისა და ძეგლთა დაცვის მინისტრის პოსტზე დღეს წარდგენილი მიხეილ გიორგაძის ქონებრივი დეკლარაცია 2014 წლის 12 მარტს არის შევსებული.
დეკლარაციის თანახმად, მიხეილ გიორგაძე 87.00 კვ.მ ფართობის ბინას ფლობს (100% წილით), თბილისში, ვ. გაბაშვილის 1, ბ. 11.
მეუღლის, ნინო ქომეთიანის საკუთრებაშია ბინა თბილისში, ჭავჭავაძის გამზირზე, 83, ბ. 18-19, რომლის ფართობიც 166.00 კვ.მ-ია.
ასევე მეუღლის საკუთრებაშია 3.00 კვ.მ-ის ფართობის არასაცხოვრებელი ფართი, თბილისი, ფასანაურის 19-ში.
მიხეილ გიორგაძე ფლობს ფასიან ქაღალდებს სს "ლიბერთი ბანკში“, რომელთა რაოდენობა 104021-ია, ფასიანი ქაღალდის ნომინალი კი 0.01 ლარი.
ასევე გიორგაძის საკუთრებაშია "თი–ბი–სი ბანკში“ ანაბარი 26647.51 დოლარის ოდენობით, ამავე ბანკში ანაბარი 2000.00 ევროს და 0.47 ლარის ოდენობით.
ასევე, დეკლარაციის შევსების მომენტში, მიხეილ გიორგაძეს "თი-ბი-სი ბანკში“ სახელფასო ანგარიშზე ერიცხებოდა 1118.05 ლარი, ხოლო საკრედიტო ანგარიშზე 5600.93 ლარი.
რაც შეეხება სამეწარმეო საქმიანობას, დეკლარაციის თანახმად, 2010 წლის 5 აგვისტოდან შპს "ითერნ პრომოუშენის“ პარტნიორის და დირექტორის თანამდებობა ეჭირა, საიდანაც მისი შემოსავალი 40988.91 ლარი იყო.
მანამდე, 2006 წლის 18 სექტემბრიდან იყო ააიპ თბილისის სახელმწიფო საკონცერტო დარბაზის განვითარების ფონდის პარტნიორი და დირექტორი, საიდანაც შემოსავლის სახით ანაზღაურება მიღებული არ აქვს.
2005 წლის 7 თებერვლიდან იყო შპს "ინტერნეიშენალ ივენთს“-ის პარტნიორი, თუმცა ანაზღაურების სახით თანხა მიღებული აქაც არ აქვს.
2013 წლის 31 დეკემბრიდან დეკლარაციის შევსებამდე, მიხეილ გიორგაძეს შპს-თბილისის სახელმწიფო საკონცერტო დარბაზის ტექნიკური დირექტორის პოსტზე მუშაობის პერიოდში მიღებული აქვს შემოსავალი 51146.15 ლარიო ოდენობით, ხოლო შპს "ინტერნეიშენალ ივენთს“-ის ტექნიკური დირექტორის თანამდებობიდან კი 34387.50 ლარის შემოსავალი.
მიხეილ გიორგაძის სახელზე იპოთეკური სესხი 50000.00 დოლარის ოდენობით, ასევე იპოთეკური სესხი 5000.00 დოლარის ოდენობით.
რაც შეეხება მის მეუღლეს, დეკლარაციის თანახმად, ნინო ქომეთიანმა 2013 წლის 31 ოქტომბერს ბინის გაყიდვიდან შემოსავლის სახით მიიღო 125000 დოლარი, თუმცა ამავე წლის 1 ნოემბერს მან 135000.00 დოლარი ახალი ბინის შესაძენად გადაიხადა.
აღსანიშნავია ისიც, რომ მიხეილ გიორგაძემ 2014 წლის 9 იანვარს მიწის ნაკვეთი გააჩუქა, საიდანაც შემოსავალი არ აუღია.
მიხეილ გიორგაძეს ჰყავს მეუღლე და ერთი შვილი.
