"სიტყვის გამტეხი!!!" – ამ ლოზუნგით, დღეს, საქართველოს პრეზიდენტის რეზიდენციასთან, სამოქალაქო ჩართულობის ცენტრის ორგანიზებით, აქცია გაიმართა,
აქციის მონაწილეებმა პრეზიდენტ გიორგი მარგველაშვილს საჩუქრად 6 კილო პლასტელინისგან დამზადებული ბიუსტი მიუტანეს, რომელიც მათი თქმით, ერთ-ერთმა ცნობილმა მოქანდაკემ გამოძერწა. თუმცა, მოქანდაკის ვინაობა არ გაამხილეს.
აქციის მონაწილეები ამბობენ, რომ ყოფილი პრეზიდენტის, მიხეილ სააკაშვილის რეზიდენციას, პრეზიდენტმა გიორგი მარგველაშვილმა ბოროტების სასახლე უწოდა და განაცხადა, რომ რეზიდენცია სტუდენტებს გადაეცემოდა. მარგველაშვილმა სიტყვა არ შეასრულა. პირიქით, თვითონ გადმოვიდა რეზიდენციაში სამუშაოდ.
აქციის მონაწილეებს პრეზიდენტ გიორგი მარგველაშვილისგან აინტერესებთ, აპირებს თუ არა ის ათონელის ქუჩაზე მდებარე პრეზიდენტის რეზიდენციაში გადასვლას. ეს კითხვა პასუხგაუცემელი დარჩა, რადგან პრეზიდენტის ადმინისტრაციიდან აქციის მონაწილეებთან არავინ მისულა.
"გურია ნიუსთან" სამოქალაქო ჩართულობის ცენტრის გამგეობის თავმჯდომარე, ლაშა გიორგაძე ამბობს:
"თავის დროზე პრეზიდენტი გიორგი მარგველაშვილი რეზიდენციაში შესვლას არ აპირებდა. ის ამ რეზიდენციას მოიხსენიებდა, როგორც ბოროტების სასახლეს. აანონსებდა რომ, აღნიშნული რეზიდენცია სტუდენტებს გადაეცემოდა. თუმცა, რამდენიმე ხანში ამ რეზიდენციაში გადმოინაცვლა.
ის არგუმენტი, ორ ოთახში ვერ შეასრულებდა თავს უფლებამოსილებას, გასაგებია. მაგრამ, მოგეხსენებათ, ათონელის ქუჩაზე მიმდინარეობს საპრეზიდენტო რეზიდენციის მშენებლობა, რომელიც ალბათ მალე დასრულდება.
ამ პერიოდის განმავლობაში ვცდილობდით გაგვერკვია აპირებდა თუ არა ბატონი გიორგი ახალ რეზიდენციაში გადასვლას, მაგრამ კითხვაზე პასუხი ვერ მივიღეთ.
აქედან გამომდინარე, გადავწყვიტეთ, პლასტელინისგან დამზადებული, პრეზიდენტ გიორგი მარგველაშვილის ბიუსტი, რომელიც ცნობილმა ქართველმა მოქანდაკემ შეასრულა, სიმბოლურად გვეჩუქებინა მისთვის.
აქციის მონაწილეები პრეზიდენტ გიორგი მარგველაშვილისგან ვითხოვთ კითხვაზე პასუხს – აპირებს თუ არა გიორგი მარგველაშვილი გადასვლას ათონელის ქუჩაზე მდებარე პრეზიდენტის რეზიდენციაში?!"
ვინ არის ცნობილი მოქანდაკე, რომელმაც გიორგი მარგველაშვილის პლასტელინის ბიუსტი გააკეთა, ჩვენმა რესპოდენტმა არ გაამხილა. არც ის თქვა, რა დაუჯდა აქციის მონაწილეებს ბიუსტის გაკეთება.
"1 კილოგრამი პლასტელინი ღირს 9 ლარი. მარტო პლასტელინი დაჯდა 45 ლარი. სამწუხაროდ იმ ადამიანთან, რომელმაც ეს ბიუსტი გამოაქანდაკა, კომუნიკაცია არ დამიმყარებია.
უბრალოდ, არც მქონდა სურვილი მისი სახელი და გვარი მეკითხა. უფასოდ ნამდვილად არ გაუკეთებია. როგორც ვიცი, ამ ბიუსტის გაკეთება ძალიან დიდი თანხა დაჯდა. სამწუხაროდ არ ვიცი რამდენი გადავხადეთ", _ განაცხადა ლაშა გიორგაძემ.
