ეროსი კიწმარიშვილის გარდაცვალების ფაქტთან დაკავშირებით ჩატარებული ექსპერტიზის პასუხები ოჯახისთვის ცნობილი ამ დრომდე არ არის, თუმცა დამუკიდებელი ექსპერტი მაია ნიკოლეიშვილი ფიქრობს, რომ DNM-ის პასუხები გამოძიებისთვის, ცნობილია.
ამის შესახებ "გურია ნიუსს“ დამოუკიდებელმა ექსპერტმა მაია ნიკოლეიშვილმა განუცხადა.
"მიმდინარეობს ან დასრულდა თუ არა ექსპერტიზა, ამას ვერ გეტყვით. ამ ეტაპზე არანაირი კომუნიკაცია არ მაქვს. ადვოკატმა უნდა მიიღოს პასუხები და გადმომცეს, მხოლოდ ეს არის ჩემი რეჟიმი. ვალდებულები არ არის, მე როგორც დამოუკიდებელ ექსპერტს და საქმეში ჩართულ პირს, ეს პასუხები გამაცნონ. დღევანდელი კანონმდებლობით, ამის ვალდებულება გამოძიებას არ აქვს. ის, რომ მე მონაწილეობა მივიღე საგამოძიებო მოქმედებების ნაწილში, ეს პროკურატურის კეთილი ნება იყო“, _ აღნიშნავს ნიკოლეიშვილი.
უნდა აღინიშნოს ისიც, რომ მისთვის ცნობილი არ არის აპირებს თუ არა ოჯახი სინჯების გაგზავნას საზღვარგარეთ და დამოუკიდებელი გამოკვლევის ჩატარებას.
"რაც შეეხება საქართველოში ჩატარებული ექსპერტიზის პასუხებს, მართალი გითხრათ, უკვე უნდა იყოს და ველოდებოდი კიდეც. შესაძლოა, არის ეს პასუხები და უბრალოდ დახურულია ჯერჯერობით, ესეც არ ვიცი. გამოძიება მუშაობს ასეთ საკითხებზე და შეიძლება მიიჩნევდეს, რომ ეს პასუხები არ უნდა გასაჯაროვდეს. ასევე, გამოძიების მიზნებიდან გამომდინარე, არ ჩათვალოს საჭიროდ, მისი გაცნობა დაზარალებულის მხარისთვის, ასეც ხდება ხოლმე. ეს გამოძიების მუშაობაზე მიუთითებს“, _ აღნიშნავს ნიკოლეიშვილი და დასძენს, რომ მისთვის ცნობილი არ არის, ჩაუტარდა თუ არა სამხარაულის ექსპერტიზის ეროვნულ ბიუროში ეროსი კიწმარიშვილის იმ თანაგუნდელების ტანსაცმელს ექსპერტიზა, რომლებმაც გარდაცვლილი პირველად ნახეს.
რაც შეეხება იმ საკითხს, რომ ულტრაიისფერი სხივებით და მიკროსკოპული კვლევით იარაღზე სისხლის ლაქები არ აღმოჩნდა, ნიკოლეიშვილი ამბობს, რომ მთავარი DNM-ის პასუხია.
"ვიზუალურად, თვალით, ლუპით, ულტრაიისფერი სხივებით და მიკროსკოპული კვლევით მე და ბატონმა ზურაბ კიწმარიშვილმა იარაღი სამხარაულის ექსპერტებთან ერთად დავათვალიერეთ. იარაღზე და მის ლულაში სისხლის კვალი არ აღინიშნებოდა. ამიტომ გვაინტერესებდა DNM-ის პასუხი, ხომ არ იყო რაიმე კვალი დარჩენილი იარაღზე. განსაკუთრებით თუ DNM-ის კვალი ლულის ჭრილზე იქნებოდა, მაშინ ვისაუბრებდით, ეს იარაღი იყო თუ სხვა იარაღიდან მოხდა გასროლა.
ვიმეორებ, რომ ეს იყო მიბჯენით გასროლა. არის სრული, ჰერმეტული მიბჯენა. ამ დროს წამოიქმნება ხოლმე იარაღის ლულაში უარყოფითი წნევა, რის გამოც შესაძლებელია, რომ ლულაში მოხვდეს სისხლი და სხვადასხვა ქსოვილები. თუმცა, 100%-ით იმის თქმა, რომ ეს აუცილებლად უნდა მოხვდეს ლულაში, არ შეიძლება. ან მოხვდება, ან არა. თუ მოხვდა, ეს უკვე ბევრი რამის მაჩვენებელია. მაგრამ მეორე საკითხია ის, რომ თვით ლულის ჭრილზე, რომელიც მჭიდროდ იყო სხეულზე მიბჯენილი და მოხდა გასროლა, აუცილებლად უნდა იყოს DNM-ის კვალი. ვიცით, რომ იარაღი, რომლიდანაც გასროლა მოხდა, მჭიდროდ იყო მიბჯენილი სხეულზე და გასროლის შემდეგ მან ნაჭდევი დატოვა. აი, სწორედ DNM-ით შეიძლება დადგინდეს, მანქანაში აღმოჩენილი იარაღი იყო ის, რომლიდანაც გასროლა მოხდა, თუ არა. მაგრამ ეს პასუხები არ გვაქვს. ვვარაუდობ, რომ DNM-ის პასუხები არის, მაგრამ ჩვენთვის არ არის ცნობილი. რაც შეეხება დენთის კვალს, ყველა მასალა ჩვენი თანდასწრებით აიღეს, თუმცა, ექსპერტიზის პასუხი დაზარალებულის ოჯახისთვის ამ შემთხვევაშიც არ არის ცნობილი“, _ აცხადებს ექსპერტი.
მისივე თქმით, იმის ვარაუდი, ხომ არ მალავს პროკურატურა ექსპერტიზის პასუხებს, წინასწარ არ შეიძლება, რადგან ოჯახი გამოძიებას ენდობა.
"მოვისმინე ბატონი ზურაბის განცხადებები და ის გამოძიებას ეჭვქვეშ არ აყენებს, მას უფრო მეტი კომუნიკაცია აქვს გამოძიებასთან, მისი ეჭვი არ მომისმენია, ამიტომ ჩემს ეჭვს, გამოძიება ფარავს თუ არა სპეციალურად ექსპერტიზის პასუხებს, ვერ ვიტყვი. ბუნებრივია, მე დამოკიდებული ვარ მხარეზე, თუ მომაწვდიან ინფორმაციას, ან ჩამრთავენ პროცესში“, _ განაცხდა "გურია ნიუსთან“ საუბრისას მაია ნიკოლეიშვილმა.
შეგახსენებთ, რომ ეროსი კიწმარიშვილის გარდაცვალების საქმეზე გამოძიებას პირველადი სურათი სავარაუდოდ მომავალ კვირაში ექნება.
ეროსი კიწმარიშვილის ძმა, ზურაბ კიწმარიშვილი ამბობს, რომ ჩატარებული ექსპერტიზების ძირითად ნაწილზე პასუხები უკვე არსებობს და გამოძიება ამ ეტაპზე მხოლოდ მცირე ნაწილ დასკვნებს ელოდება.
"მომავალი კვირის ბოლომდე, შესაძლოა, დასაწყისშიც ველოდები ამ ექსპერტიზის პასუხებისაგან, დაკითხვის ოქმებისაგან, გამოძიების მხრიდან, ვიდეომასალის დამუშავებისაგან შედგენილ ვერსიას. უკვე ამ ეტაპზე ვართ და მომავალ კვირაში უკვე პირველად სურათს ველოდებით", _ აცხადებს კიწმარიშვილი.
გამოძიების პირველადი ვერსიის შემდეგ, ზურაბ კიწმარიშვილი დამატებითი განცხადების გაკეთებას გეგმავს, რაც მისივე თქმით, სწორედ გამოძიების პირველად შედეგზეა დამოკიდებული.
რაც შეეხება მის ვერსიას, ზურაბ კიწმარიშვილი მიიჩნევს, რომ მისი ძმა მოკლულია.
შეგახსენებთ, რომ ეროსი კიწმარიშვილი 15 ივლისს საკუთარ ავტომობილში გარდაცვლილი იპოვეს. გამოძიება საქართველოს სისხლის სამართლის კოდექსის 115-ე მუხლით (პიროვნების თვითმკვლელობამდე მიყვანა) მიმდინარეობს.
